كەزدەسۋ بارىسىندا دەلەگاتسيا باسشىلارى ەىۇ اياسىندا ءوزارا ءىس-قيمىلدىڭ نەگىزگى باعىتتارىن تالقىلاپ، وڭىرلىك ەكونوميكالىق ىنتىماقتاستىقتى نىعايتۋ بويىنشا ۇسىنىستاردى قاراستىردى. قر سىرتقى ىستەر ءمينيسترى ءوز سوزىندە 2025 جىلى قازاقستان رەسپۋبليكاسىنىڭ ۇيىمدا توراعالىقتى قابىلدايتىنىن جانە ونى «وڭىرلىك كولىك بايلانىسى مەن تۇراقتى دامۋدى ىلگەرىلەتۋ» ۇرانىمەن وتكىزەتىنىن مالىمدەدى. قازاق تاراپى ەىۇ مۇشە مەملەكەتتەر اراسىنداعى ساۋدا-ەكونوميكالىق بايلانىستاردى نىعايتۋ قاجەتتىلىگىن اتاپ ءوتتى. وسىعان وراي ترانزيتتىك-كولىك باعىتتارىن دامىتۋ، جوعارى جىلدامدىقتى جۇك پويىزدارىن ىسكە قوسۋ، تسيفرلىق ترانزيتتىك جۇيەنى قۇرۋ جانە ءوڭىر ىشىندەگى ساۋدا كولەمىن ۇلعايتۋ ماسەلەلەرىنە ەرەكشە نازار اۋدارىلدى.

سونىمەن قاتار ازىق-تۇلىك قاۋىپسىزدىگىن قامتاماسىز ەتۋ سالاسىنداعى ورتاق مىندەتتەردى شەشۋ ماقساتىندا ەىۇ مەن ازىق-تۇلىك قاۋىپسىزدىگى جونىندەگى يسلام ۇيىمى اراسىندا ىنتىماقتاستىق ورناتۋ ۇسىنىلدى.

قازاقستان كليماتتىڭ وزگەرۋىنە قارسى كۇرەس جانە «جاسىل» ەكونوميكانى دامىتۋ ماسەلەلەرىنە ۇلكەن ءمان بەرەتىنى اتالىپ ءوتتى. وسىعان وراي ەىۇ-عا مۇشە مەملەكەتتەر 2026 جىلى بۇۇ اياسىندا وتەتىن وڭىرلىك كليمات سامميتىنە بەلسەندى قاتىسۋعا شاقىرىلدى.

انىقتاما: ەكونوميكالىق ىنتىماقتاستىق ۇيىمى 1985 جىلى قۇرىلعان. ەىۇ-نىڭ نەگىزگى ماقساتى – مۇشە مەملەكەتتەردىڭ ەكونوميكالىق، تەحنيكالىق جانە مادەني ىنتىماقتاستىعىن دامىتۋ. ۇيىم قۇرامىنا 10 ەل كىرەدى: اۋعانستان، ازەربايجان، يران، قازاقستان، قىرعىزستان، پاكىستان، تاجىكستان، تۇرىكمەنستان، تۇركيا جانە وزبەكستان. قازاقستان 1992 جىلدان بەرى ەىۇ-نىڭ مۇشەسى.