Kezdesu barysynda delegasiia basşylary EYŪ aiasynda özara ıs-qimyldyŋ negızgı baǧyttaryn talqylap, öŋırlık ekonomikalyq yntymaqtastyqty nyǧaitu boiynşa ūsynystardy qarastyrdy. QR Syrtqy ıster ministrı öz sözınde 2025 jyly Qazaqstan Respublikasynyŋ Ūiymda töraǧalyqty qabyldaitynyn jäne ony «Öŋırlık kölık bailanysy men tūraqty damudy ılgerıletu» ūranymen ötkızetının mälımdedı. Qazaq tarapy EYŪ müşe memleketter arasyndaǧy sauda-ekonomikalyq bailanystardy nyǧaitu qajettılıgın atap öttı. Osyǧan orai tranzittık-kölık baǧyttaryn damytu, joǧary jyldamdyqty jük poiyzdaryn ıske qosu, sifrlyq tranzittık jüienı qūru jäne öŋır ışındegı sauda kölemın ūlǧaitu mäselelerıne erekşe nazar audaryldy.

Sonymen qatar azyq-tülık qauıpsızdıgın qamtamasyz etu salasyndaǧy ortaq mındetterdı şeşu maqsatynda EYŪ men Azyq-tülık qauıpsızdıgı jönındegı İslam ūiymy arasynda yntymaqtastyq ornatu ūsynyldy.

Qazaqstan klimattyŋ özgeruıne qarsy küres jäne «jasyl» ekonomikany damytu mäselelerıne ülken män beretını atalyp öttı. Osyǧan orai EYŪ-ǧa müşe memleketter 2026 jyly BŪŪ aiasynda ötetın Öŋırlık klimat sammitıne belsendı qatysuǧa şaqyryldy.

Anyqtama: Ekonomikalyq yntymaqtastyq ūiymy 1985 jyly qūrylǧan. EYŪ-nyŋ negızgı maqsaty – müşe memleketterdıŋ ekonomikalyq, tehnikalyq jäne mädeni yntymaqtastyǧyn damytu. Ūiym qūramyna 10 el kıredı: Auǧanstan, Äzerbaijan, İran, Qazaqstan, Qyrǧyzstan, Päkıstan, Täjıkstan, Türıkmenstan, Türkiia jäne Özbekstan. Qazaqstan 1992 jyldan berı EYŪ-nyŋ müşesı.