اۋەلحان اعا – ءار وقۋشىنىڭ رۋحاني ساۋلەتكەرى

الاشتىڭ ارداقتىسى ماعجان جۇماباەۆ: «التى الاشتىڭ باسى قوسىلسا، توردەگى ورىن – مۇعالىمدىكى» دەگەن ومىرشەڭ وي ايتقانىن قالاي ۇمىتارسىڭ! بۇل ءسوز قازاق قوعامىنداعى ۇستازدىڭ ورنىن انىقتاپ تۇر. ءبىلىم جولىنا جەتەلەگەن اياۋلى ۇستازدارىمىزدىڭ ۇستازى اۋەلحان ادىلبەكۇلىن ۇلگى ەتەتىن ەدىك. سول تۇستاعى وقۋشىلارعا تۇرمىستىق ءتىل دارەجەسىنەن اسا الماي وتىرعان قازاق ءتىلىنىڭ زاڭدىلىقتارىن ۇيرەتىپ، قازاق ادەبيەتىنىڭ باي مۇراسىمەن تانىستىرعان دا وسى كىسى. ول شىن مانىندە بالا كوڭىلىمىزدىڭ قاھارمانى-تىن. ءوز باسىم وسى اعامىزعا قاراپ بوي تۇزەپ، ۇستازدىق جولدى تاڭداۋىما سەبەپكەر بولعان ەدى.

اۋەلحان ادىلبەكۇلى 1944 جىلى قحر-دىڭ شىڭجاڭ ولكەسى تارباعاتاي ايماعىنىڭ شاۋەشەك قالاسىندا دۇنيەگە كەلگەن. 1962 جىلدىڭ ءساۋىر ايىندا 9-سىنىپ وقىپ جۇرگەن كەزىندە ۇلى كوشكە ىلەسىپ، بارلىق اعايىن-تۋىسىمەن بىرگە اتامەكەنگە ورالعان. شىعىس قازاقستان وبلىسى تارباعاتاي اۋدانىنىڭ جەتىارال اۋىلىنا كەلىپ ورنالاسقان سوڭ 1964 جىلى وسى اۋىلدا ورتا مەكتەپتى ءبىتىرىپ، ءوزى وقىعان مەكتەپتە ەڭبەك جولىن باستاعان.

1968 جىلدىڭ كۇزىندە شىعىس قازاقستاننان سەمەي وبلىسىنىڭ اقسۋات اۋدانىنداعى تۋىستارىنا قونىس اۋدارىپ، 1968-69 جىلدارى قىزىل جۇلدىز باستاۋىش مەكتەبىندە، 1970-1971 جىلعى وقۋ جىلىندا ساسانبي اتىنداعى ورتا مەكتەپتە جۇمىس ىستەپ، 1971 جىلدىڭ قىركۇيەك ايىنان باستاپ، قازىرگى قارعىبا اۋىلىنداعى يۋ.گاگارين مەكتەبىنە اۋىسىپ كەلەدى.

1968-1973 جىلدار ارالىعىندا سەمەي پەدوگوگيكالىق ينستيتۋتىنىڭ فيلولوگيا فاكۋلتەتىندە وقىعان. قازاق ءتىلى مەن ادەبيەتى ءپانى مۇعالىمى ماماندىعى بويىنشا جوعارعى ءبىلىم الادى. 1971-2007-جىلدار ارالىعىندا ءبىر مەكتەپتە تابانى كۇرەكتەي 36 جىل جۇمىس ىستەدى. 1974-1981 جىلدارى ينتەرنات مەڭگەرۋشىسى، 1993-2003 جىلدارى تاربيە جۇمىسىن ۇيىمداستىرۋشى بولىپ قىزمەت اتقاردى.

2007 جىلى وسى مەكتەپتەن قۇرمەتتى دەمالىسقا، زەينەتكە شىعىپ، سەمەي قالاسىنا قونىس اۋداردى.

اۋەلحان ادىلبەكۇلى ۇستازدىقپەن قاتار اۋىلىمىزدىڭ ۇيىتقىسى، ۇرپاق تاربيەشىسى، سالت-ءداستۇردىڭ قاينار كوزى دە بولا بىلگەن جان. اۋىل تۇرعىندارىنىڭ بىرلىك-بەرەكەسىنەن باستاپ، تۇرمىسى مەن تىرلىگىن جاراستىرعان ۇستاز ۇلتتىق ءداستۇر، ءتالىم-تاربيەنىڭ دە قازىنا قاينارى، سارقىلماس بۇلاعى بولعانى جادىمىزعا مىقتاپ ءسىڭدى.

وقۋشىلارعا ۇلتقا قىزمەت ەتۋدەگى ادالدىق پەن ادىلدىك، ەلشىل، قوعامشىل ءھام وتانشىل بولۋدى ۇنەمى ايتىپ وتىراتىن اۋەلحان مۇعالىم ادال جارى نۇركامال بازاربەكقىزىمەن قىرىق ءۇش جىل وتاسىپ، ۇلگىلى وتباسى رەتىندە تانىلدى. ءۇش بالا (1 قىز، ەكى ۇل) تاربيەلەپ، قاتارعا قوستى. ۇرپاقتارىنا ۇلتتىق قۇندىلىقتاردى بويىنا دا، ويىنا دا دارىتا ءبىلدى.

زايىبى نۇركامال بازاربەكقىزى 42 جىل دەنساۋلىق ساقتاۋ سالاسىندا قىزمەت اتقارعان ەڭبەك ارداگەرى. بىرەر جىل بۇرىن نۇركامال اپاي دۇنيەدەن ءوتتى. جانى ءجانناتتا بولىپ، رۋحى پەيىشتىڭ تورىندە شالقىسىن.

ۇلدى ۇياعا، قىزدى قياعا قوندىرعان عيبراتتى عۇمىر يەلەرى 3 بالاسىنان 9 نەمەرە ءسۇيدى. بالالارى مەن كەلىندەرى جوعارى ءبىلىمدى، ءبىر-ءبىر سالانىڭ بىلىكتى ماماندارى. نەمەرەلەرىنىڭ الدى ۋنيۆەرسيتەت ءبىتىرىپ، ماگيسترانت اتانسا، كەيىنگىلەرى قالا مەكتەپتەرىندە ءبىلىم الىپ ءجۇر.

اۋەلحان ادىلبەكۇلى جوعارى ساناتتى ۇلگىلى ۇستاز، ەڭبەك ارداگەرى، ابىز اقساقال. قالاداعى قوعامدىق جۇمىستارعا بەلسەندى ارالاسقانى ءۇشىن سەمەي قالاسى اكىمىنىڭ، «اقىلداستار القاسى» ۇيىمىنىڭ العىس حاتتارىمەن جانە 2019 جىلى 75 جاسقا تولۋىنا بايلانىستى قازاقستان جازۋشىلار وداعىنىڭ العىس حاتىمەن ماراپاتتالعان.

ۇستازىمدى سول تۇستاعى ءار وقۋشىنىڭ رۋحاني ساۋلەتكەرى دەپ باعالايمىن. بۇگىندە ۇلكەن جەتىستىكتەرگە جەتكەن شاكىرتتەرى، قوعام قايراتكەرلەرى اۋەلحان ۇستازعا قارىزدار.

ۇلاعاتتى ۇستازىمىزدى مەرەيلى 80 جاسىمەن شىن جۇرەكتەن قۇتتىقتايمىز! دەنىنە ساۋلىق، وتباسىنا اماندىق تىلەيمىز! اتتان تۇسپەگەيسىز، اعا! جاساي بەرىڭىز! 

ماقالا اۆتورى: نازگۇل ماۋىتحانقىزى،

اۋەلحان ادىلبەكۇلىنىڭ شاكىرتى