Äuelhan aǧa – är oquşynyŋ ruhani säuletkerı
Alaştyŋ ardaqtysy Maǧjan Jūmabaev: «Alty alaştyŋ basy qosylsa, tördegı oryn – mūǧalımdıkı» degen ömırşeŋ oi aitqanyn qalai ūmytarsyŋ! Būl söz qazaq qoǧamyndaǧy ūstazdyŋ ornyn anyqtap tūr. Bılım jolyna jetelegen aiauly ūstazdarymyzdyŋ ūstazy Äuelhan Ädılbekūlyn ülgı etetın edık. Sol tūstaǧy oquşylarǧa tūrmystyq tıl därejesınen asa almai otyrǧan qazaq tılınıŋ zaŋdylyqtaryn üiretıp, qazaq ädebietınıŋ bai mūrasymen tanystyrǧan da osy kısı. Ol şyn mänınde bala köŋılımızdıŋ qaharmany-tyn. Öz basym osy aǧamyzǧa qarap boi tüzep, ūstazdyq joldy taŋdauyma sebepker bolǧan edı.
Äuelhan Ädılbekūly 1944 jyly QHR-dyŋ Şyŋjaŋ ölkesı Tarbaǧatai aimaǧynyŋ Şäueşek qalasynda düniege kelgen. 1962 jyldyŋ säuır aiynda 9-synyp oqyp jürgen kezınde ūly köşke ılesıp, barlyq aǧaiyn-tuysymen bırge atamekenge oralǧan. Şyǧys Qazaqstan oblysy Tarbaǧatai audanynyŋ Jetıaral auylyna kelıp ornalasqan soŋ 1964 jyly osy auylda orta mekteptı bıtırıp, özı oqyǧan mektepte eŋbek jolyn bastaǧan.
1968 jyldyŋ küzınde Şyǧys Qazaqstannan Semei oblysynyŋ Aqsuat audanyndaǧy tuystaryna qonys audaryp, 1968-69 jyldary Qyzyl jūldyz bastauyş mektebınde, 1970-1971 jylǧy oqu jylynda Sasanbi atyndaǧy orta mektepte jūmys ıstep, 1971 jyldyŋ qyrküiek aiynan bastap, qazırgı Qarǧyba auylyndaǧy Iý.Gagarin mektebıne auysyp keledı.
1968-1973 jyldar aralyǧynda Semei pedogogikalyq institutynyŋ filologiia fakultetınde oqyǧan. Qazaq tılı men ädebietı pänı mūǧalımı mamandyǧy boiynşa joǧarǧy bılım alady. 1971-2007-jyldar aralyǧynda bır mektepte tabany kürektei 36 jyl jūmys ıstedı. 1974-1981 jyldary internat meŋgeruşısı, 1993-2003 jyldary tärbie jūmysyn ūiymdastyruşy bolyp qyzmet atqardy.
2007 jyly osy mektepten qūrmettı demalysqa, zeinetke şyǧyp, Semei qalasyna qonys audardy.
Äuelhan Ädılbekūly ūstazdyqpen qatar auylymyzdyŋ ūiytqysy, ūrpaq tärbieşısı, salt-dästürdıŋ qainar közı de bola bılgen jan. Auyl tūrǧyndarynyŋ bırlık-berekesınen bastap, tūrmysy men tırlıgın jarastyrǧan ūstaz ūlttyq dästür, tälım-tärbienıŋ de qazyna qainary, sarqylmas būlaǧy bolǧany jadymyzǧa myqtap sıŋdı.
Oquşylarǧa ūltqa qyzmet etudegı adaldyq pen ädıldık, elşıl, qoǧamşyl häm otanşyl boludy ünemı aityp otyratyn Äuelhan mūǧalım adal jary Nūrkamal Bazarbekqyzymen qyryq üş jyl otasyp, ülgılı otbasy retınde tanyldy. Üş bala (1 qyz, ekı ūl) tärbielep, qatarǧa qosty. Ūrpaqtaryna ūlttyq qūndylyqtardy boiyna da, oiyna da daryta bıldı.
Zaiyby Nūrkamal Bazarbekqyzy 42 jyl densaulyq saqtau salasynda qyzmet atqarǧan Eŋbek ardagerı. Bırer jyl būryn Nūrkamal apai dünieden öttı. Jany jännatta bolyp, ruhy peiıştıŋ törınde şalqysyn.
Ūldy ūiaǧa, qyzdy qiiaǧa qondyrǧan ǧibratty ǧūmyr ielerı 3 balasynan 9 nemere süidı. Balalary men kelınderı joǧary bılımdı, bır-bır salanyŋ bılıktı mamandary. Nemerelerınıŋ aldy universitet bıtırıp, magistrant atansa, keiıngılerı qala mektepterınde bılım alyp jür.
Äuelhan Ädılbekūly joǧary sanatty ülgılı ūstaz, eŋbek ardagerı, abyz aqsaqal. Qaladaǧy qoǧamdyq jūmystarǧa belsendı aralasqany üşın Semei qalasy äkımınıŋ, «Aqyldastar alqasy» ūiymynyŋ alǧys hattarymen jäne 2019 jyly 75 jasqa toluyna bailanysty Qazaqstan Jazuşylar Odaǧynyŋ alǧys hatymen marapattalǧan.
Ūstazymdy sol tūstaǧy är oquşynyŋ ruhani säuletkerı dep baǧalaimyn. Bügınde ülken jetıstıkterge jetken şäkırtterı, qoǧam qairatkerlerı Äuelhan ūstazǧa qaryzdar.
Ūlaǧatty ūstazymyzdy mereilı 80 jasymen şyn jürekten qūttyqtaimyz! Denıne saulyq, otbasyna amandyq tıleimız! Attan tüspegeisız, aǧa! Jasai berıŋız!
Maqala avtory: Nazgül Mäuıthanqyzy,
Äuelhan Ädılbekūlynyŋ şäkırtı
