بۇل تەكەلى قالالىق اۋرۋحاناسىنىڭ رەانيماتسيا ءبولىمىنىڭ دارىگەرى نۇرعازى تۇرداليەۆتىڭ ءسوزى. وقيعا 31 ناۋرىز كۇنى كەشكى ۋاقىتتا بولعان. - ساعات 19:30 شاماسىندا قىزمەت اتقارۋ بارىسىندا اۋەزوۆ كوشەسىنىڭ بويىندا بەيتانىس ازاماتتى كەزدەستىرىپ قالدىق. ول كىسى ءبىزدى توقتاتىپ، كومەك سۇرادى. وقيعا ورنىنا كەلگەندە قويمانىڭ ىشىندە ءبىر بالا ەسىنەن تانىپ جاتتى. اينالاسىندا بوياۋ توگىلگەن بولدى. ۋدىڭ ءيىسى شىعىپ تۇردى. ەسىنەن تانىپ قالعان ادامنىڭ اۋزىنان كوبىك اقتى. دەرەۋ العاشقى مەديتسينالىق كومەك كورسەتىپ، ماسساج جاسادىق، - دەدى جەتىسۋ وبلىسى پد پاترۋلدىك پوليتسيا باتالونىنىڭ اعا ينسپەكتورى ەلدار امانگەلدين. بوياۋ يىسىنە ەلتىپ، ەسىنەن تانىپ قالعان 22 جاستاعى قالا تۇرعىنى تيمۋر ابدۋللين بولاتىن. "جەتىسۋ Resort" كەشەنىندە جۇمىس ىستەيتىن جىگىت مۇنداي جاعدايعا تاپ بولامىن دەپ مۇلدەم ويلاماعان. - شامامەن 2-3 ساعاتتاي بوياۋ جاعۋمەن بولدىم. ال ەسىمنەن تانىپ قالعانىم ەسىمدە جوق، - دەدى ول. تيمۋردىڭ كولىگىن كەشەن ماڭنان ءوتىپ بارا جاتقان تانىسى ابدىبەك مولدابەكوۆ بايقاعان. جىگىتتى تابا الماعان ول وعان قوڭىراۋ شالىپ، جاۋاپ الا الماعان سوڭ دابىل قاققان. پوليتسەيلەردى دە وسى كىسى شاقىرعان. دارىگەرلەردىڭ سوزىنشە، حيميالىق زاتتاردىڭ ادام اعزاسىنا اسەرى كۇشتى. - ەس-ءتۇسسىز جاعدايدان سوڭ ادامنىڭ جۇرەگى دە توقتاپ قالۋى مۇمكىن. ياعني، ورتالىق جۇيكە جۇيەسىنىڭ قىزمەتى بۇزىلعان كەزدە ادامنىڭ تىنىس الۋ فۋنكتسياسى ناشارلايدى. العاشقى كومەك دۇرىس جاسالماسا، پاتسيەنتتى جوعالتىپ الۋ قاۋپى بار. بۇل جاعدايدا، ايتا كەتۋ كەرەك، پوليتسيا قىزمەتكەرلەرىنىڭ العاشقى كومەك كورسەتۋى وتە جوعارى دەڭگەيدە. سونىڭ ارقاسىندا جاس بالانىڭ ءومىرى ساقتالدى. بۇل دا ءبىر ەرلىك. مەديتسينا قىزمەتكەرلەرىنىڭ اتىنان پوليتسيا قىزمەتكەرلەرىنە العىس بىلدىرەمىز، - دەدى تەكەلى قالالىق اۋرۋحاناسىنىڭ رەانيماتسيا ءبولىمىنىڭ دارىگەرى نۇرعازى تۇرداليەۆ. بۇگىندە جىگىتتىڭ ومىرىنە ەش قاۋىپ جوق. ول ءوزىن اجالدان اراشالاپ قالعان ءتارتىپ ساقشىلارى ەلدار امانگەلدين، ازامات قازىباەۆ پەن جاناتبەك احمەتوۆكە دەگەن ريزاشىلىعىن جاسىرمايدى.

اقپارات كوزى Polisia.kz