Būl Tekelı qalalyq auruhanasynyŋ reanimasiia bölımınıŋ därıgerı Nūrǧazy Tūrdalievtıŋ sözı. Oqiǧa 31 nauryz künı keşkı uaqytta bolǧan. - Saǧat 19:30 şamasynda qyzmet atqaru barysynda Äuezov köşesınıŋ boiynda beitanys azamatty kezdestırıp qaldyq. Ol kısı bızdı toqtatyp, kömek sūrady. Oqiǧa ornyna kelgende qoimanyŋ ışınde bır bala esınen tanyp jatty. Ainalasynda boiau tögılgen boldy. Udyŋ iısı şyǧyp tūrdy. Esınen tanyp qalǧan adamnyŋ auzynan köbık aqty. Dereu alǧaşqy medisinalyq kömek körsetıp, massaj jasadyq, - dedı Jetısu oblysy PD patruldık polisiia batalonynyŋ aǧa inspektory Eldar Amangeldin. Boiau iısıne eltıp, esınen tanyp qalǧan 22 jastaǧy qala tūrǧyny Timur Abdullin bolatyn. "Jetısu Resort" keşenınde jūmys ısteitın jıgıt mūndai jaǧdaiǧa tap bolamyn dep müldem oilamaǧan. - Şamamen 2-3 saǧattai boiau jaǧumen boldym. Al esımnen tanyp qalǧanym esımde joq, - dedı ol. Timurdyŋ kölıgın keşen maŋnan ötıp bara jatqan tanysy Äbdıbek Moldabekov baiqaǧan. Jıgıttı taba almaǧan ol oǧan qoŋyrau şalyp, jauap ala almaǧan soŋ dabyl qaqqan. Poliseilerdı de osy kısı şaqyrǧan. Därıgerlerdıŋ sözınşe, himiialyq zattardyŋ adam aǧzasyna äserı küştı. - Es-tüssız jaǧdaidan soŋ adamnyŋ jüregı de toqtap qaluy mümkın. Iаǧni, ortalyq jüike jüiesınıŋ qyzmetı būzylǧan kezde adamnyŋ tynys alu funksiiasy naşarlaidy. Alǧaşqy kömek dūrys jasalmasa, pasienttı joǧaltyp alu qaupı bar. Būl jaǧdaida, aita ketu kerek, polisiia qyzmetkerlerınıŋ alǧaşqy kömek körsetuı öte joǧary deŋgeide. Sonyŋ arqasynda jas balanyŋ ömırı saqtaldy. Būl da bır erlık. Medisina qyzmetkerlerınıŋ atynan polisiia qyzmetkerlerıne alǧys bıldıremız, - dedı Tekelı qalalyq auruhanasynyŋ reanimasiia bölımınıŋ därıgerı Nūrǧazy Tūrdaliev. Bügınde jıgıttıŋ ömırıne eş qauıp joq. Ol özın ajaldan araşalap qalǧan tärtıp saqşylary Eldar Amangeldin, Azamat Qazybaev pen Janatbek Ahmetovke degen rizaşylyǧyn jasyrmaidy.

Aqparat közı Polisia.kz