استانا قالاسىندا جانە تۇركىستان، قوستاناي، قىزىلوردا، اقتوبە، باتىس قازاقستان وبلىستارىندا بالاباقشالار، مەكتەپتەر مەن بالالارعا ارنالعان شىعارماشىلىق ورتالىقتارى اشىلدى. تۇركىستان وبلىسىنىڭ ەكى بىردەي اۋىلىندا - ەڭبەك ديحان مەن مانكەنتتە جاڭا مەكتەپتەر ەسىگىن ايقارا اشتى. ولاردىڭ ءبىرى مەملەكەت باسشىسىنىڭ باستاماسىمەن جۇزەگە اسىرىلعان «جايلى مەكتەپ» ۇلتتىق جوباسى اياسىندا سالىنعان. بۇل مەكتەپ 600 وقۋشىعا ارنالعان جانە زاماناۋي قاۋىپسىزدىك تالاپتارىنا سايكەس كەلەتىن بارلىق قاجەتتى قۇرال-جابدىقتارمەن قامتىلعان. ايتا كەتەيىك، بۇل تۇركىستان وبلىسىنداعى ەكىنشى «جايلى مەكتەپ» بولىپ تابىلادى. ال ەلوردادا ەكى اۋىسىمدا 4 مىڭ وقۋشىعا ارنالعان 11-ءشى «جايلى مەكتەپ» اشىلدى. بۇل مەكتەپ ۇركەر تۇرعىن الابىندا ورنالاسقان، ول وقۋشى ورنى تاپشىلىعىن شەشۋگە سەپتىگىن تيگىزەدى. «جايلى مەكتەپ» ۇلتتىق جوباسى اياسىندا 2026 جىلعا دەيىن استانادا 24 مەكتەپ سالىنادى دەپ جوسپارلانىپ وتىر.  باتىس قازاقستان وبلىسىنىڭ ورال قالاسىندا 400 وقۋشىعا ارنالعان جاڭا مەكتەپ پايدالانۋعا بەرىلدى. مەكتەپتە بالالار شىعارماشىلىعىن دامىتۋ مەن دەمالۋعا ارنالعان كەڭىستىكتەر، سونداي-اق جەكە شكافتار قاراستىرىلعان. سونىمەن قاتار سپورت جانە اكت زالدارى، كىتاپحانا، اسحانا، شەبەرحانا جانە 36 پاندىك كابينەت بار. قوستاناي وبلىسىنىڭ قوستاناي جانە ارقالىق قالالارىندا ەكى جاڭا مەملەكەتتىك بالاباقشا اشىلدى. بۇل مەكتەپكە دەيىنگى ۇيىمدار بارلىق زاماناۋي ستاندارتتارعا ساي. ولار جاتىن بولمەلەرىمەن، ويىن بولمەلەرىمەن، حورەوگرافيالىق، گيمناستيكالىق، مۋزىكالىق جانە سپورت زالدارىمەن، پەداگوگ-پسيحولوگ، لوگوپەد، مەديتسينالىق، قوسىمشا ءبىلىم بەرۋ كابينەتتەرىمەن قامتىلعان. ايتا كەتۋ كەرەك، وسى جىلدىڭ باسىنان بەرى ەلىمىزدە 560-تان استام مەكتەپكە دەيىنگى ۇيىم اشىلدى. ەلىمىزدىڭ ءتورت وڭىرىندە قوسىمشا ءبىلىم بەرۋ نىساندارى اشىلدى. مىسالى، اقتوبە وبلىسى قارعالى اۋدانىنىڭ بادامشا اۋىلىندا ونەر مەكتەبى اشىلدى. وندا 550-گە جۋىق بالا ءبىلىم الۋدا.

قىزىلوردا وبلىسىنىڭ جاڭاقورعان اۋدانىندا ەكى قوسىمشا ءبىلىم بەرۋ ۇيىمى – وقۋشىلار سارايى مەن ونەر مەكتەبى اشىلدى. بۇل مەكەمەلەردە 19 قوسىمشا ءبىلىم بەرۋ باعىتى بويىنشا 250-دەن استام بالا ءبىلىم الادى. سونداي-اق  پاۆلودار وبلىسىنىڭ ەكىباستۇز قالاسىندا مەملەكەت باسشىسىنىڭ تاپسىرماسىمەن سالىنعان «سامعاۋ» بالالاردىڭ زامانۋي شىعارماشىلىق ءۇيى اشىلدى. ول «بالالارعا قوسىمشا ءبىلىم بەرۋ جۇيەسىنىڭ جاڭا ۇلگىسى» عىلىمي-تەحنيكالىق باعدارلامالارى اياسىندا 12 باعىت بويىنشا بالالاردى وقىتۋعا ارنالعان جوعارى تەحنولوگيالارمەن جابدىقتالعان. ورتالىق كۇنىنە 3000-عا دەيىن بالانى قابىلدايدى. ونىڭ ىشىندە ەرەكشە ءبىلىم بەرۋدى قاجەت ەتەتىن وقۋشىلار دا بار. 

2024-2025 وقۋ جىلىنىڭ باسىنان بەرى ەلىمىزدە بارلىعى 500-دەن استام جاڭا ءبىلىم بەرۋ ۇيىمدارى اشىلدى.