رۋحاني قۇندىلىقتارعا دۇرىس قارايتىن ورتا قالىپتاستىرۋىمىز كەرەك

قازىرگى اۋمالى-توكپەلى زاماندا قۇندىلىقتار وزگەرىپ، داستۇرگە سىڭگەن دۇنيەلەر جاعادا قالىپ قويىپ جاتىر. وكىنىشتىسى سول، ءبىزدىڭ قوعام وكىلدەرى مۇنداي «وزگەرىستەرگە» توتەپ بەرىپ، ماسەلەنىڭ شەشۋ جولىن قاراستىرۋدىڭ ورنىنا، ماتەريالدىق قۇندىلىقتاردىڭ سوڭىنا ءتۇسىپ الدى. الايدا، جاناشىرلىق تانىتىپ، دۇرىس جولدى كورسەتكىسى كەلەتىندەر دە جوق ەمەس. بىراق، تىم از... بۇل ماسەلە بويعا ءسىڭىپ، قوعامدىق سانادا نىق ورناسا، وزگەرىس جاساۋ قيىنعا سوعادى. سوندىقتان، ءبىز قۇندىلىقتار اۋىسقان ۋاقىتتا ءداستۇرىمىز، ءدىنىمىز بەن تىلىمىزگە قۇرمەتپەن قارايتىن، اتا سالتتى بويعا سىڭىرگەن ۇرپاق تاربيەلەۋدىڭ جاڭا ءتۇرىن ويلاپ تاپتىق. بۇل – قازىرگى بالالار، وسكەلەڭ ۇرپاقتى ۇلتتىق ءان قورجىنىمەن سۋسىنداتىپ، ءداستۇردى بويدا قايتا جاڭعىرتۋعا ۇلەس قوسۋ ەدى. وسى ماقساتتا –«Anshi bala karaoke» جوباسىنىڭ نەگىزىن قالادىق. ارينە، مۇنداي ۇلتتىق جوبانى قولعا الماس بۇرىن كوپتەگەن ازاماتتارمەن اقىلداستىق، شەشىم قابىلداۋعا ۇزاق ۋاقىت كەتتى. سەبەبى، اۋىزبەن ايتۋ وڭاي، ال ىرگەلى ءىستى قولعا الىپ، جۇرگىزۋ، قوعامعا ىقپال ەتۋ قيىننىڭ قيىنى ەكەنى راس.

ايتا كەتۋ كەرەك، بۇل - 20 جىلعا جۋىق ۋاقىت ءبىلىم بەرۋ سالاسىندا قىزمەت ەتىپ كەلگەن جۇبايىم گۇلنار ورىنبايقىزىنىڭ يدەياسىنان تۋىنداعان دۇنيە ەدى. ول ۇستازدىقپەن قاتار، قوعامداعى قازاق بالالارىنىڭ ۇلتتىق كەلبەتى، تاربيەسى مەن تانىمىنا ەرەكشە كوڭىل ءبولىپ كەلدى. بالا-باقشا، مەكتەپ جانە جەكە ۆوكال ستۋديالاردا مول تاجىريبە جيناعان بىلىكتى مامان. ءبىر كۇنى، ماعان مەرەكەلىك كونتسەرتتەردە، مەكتەپ باعدارلامالارىندا، بي ساباقتارىندا قازاقشا اندەردىڭ ازدىعى، ءتىپتى، كەي ۋاقىتتاردا تابا المايتىنىن ايتىپ، وي تاستادى. ءوز تاجىريبەسىندە ءتىپتى شەت ەل جانە ورىس تىلىندەگى ەسترادالىق اندەردى قازاقشاعا اۋدارىپ، كەلسىن كەلمەسىن قولدانۋعا ءماجبۇر بولاتىن. مىنە، وسى كەزدەرى ماعان تەرەڭ وي كەلدى. نەگە ءبىزدىڭ بالالارىمىزعا جوعارى ساپادا، تاعىلىمدى تاقىرىپتاردا اندەر جازباسقا دەپ. وسىنى نەگە جۇيەلەپ ۇسىنباسقا دەگەن وي قايدا جۇرسەم دە سانادان شىقپاي قويدى. ناتيجەسىندە ەڭ جاقسى دۇنيەنى نەگە بالالارعا ۇسىنباسقا دەگەن كەرەمەت يدەيا تۋدى.

الەۋمەتتىك جەلىنى ءتيىمدى پايدالانا بىلگەن ەل عانا، ءداستۇرلى قۇندىلىقتارىن ساقتاپ قالا الادى دەپ ويلايمىن.

نەگىزى ۇلكەن دۇنيەنى قولعا العاندا كەزدەسەتىن ورتاق ماسەلەلەر بولادى. اسىرەسە، رۋحاني دۇنيەلەردى قولعا العاندا. سوندىقتان دا، وسى جوبانى باستاردا جانە ىسكە اسىرۋ بارىسىندا كوپتەگەن قيىندىققا تاپ بولدىق. مۇنى جاسىرمايمىز. ءبىراز ازاماتتارعا ۇسىنىس ايتىپ، دەمەۋشى ىزدەپ، ءتىپتى، مەملەكەتتىك مەكەمەلەرگە حات جازىپ، ماردىمدا جاۋاپ الماي كوڭىل –كۇيىمىز تۇسكەن ساتتەر دە كەزدەستى. اشىعىن ايتۋ كەرەك، قولداۋ كورسەتىپ، دەمەۋدىڭ ورنىنا، كەرى پىكىر ايتىپ، جۇيەسىز وي بىلدىرگەندەر دە كەزدەستى.

اللاعا شۇكىر، جۇيەلى جۇمىستار مەن ادال نيەتتىڭ ارقاسىندا جوبامىزعا دەمەۋشى تابىلا كەتتى. وسىلايشا، باعىمىزعا وراي، كاسىپكەر، مەتسەنات جانە ۇلت قۇندىلىقتارىمىزعا جاناشىر ازاماتتار تابىلىپ وسى كۇندە 200 دەن استام ءان جازىلدى. تۇڭعىش «Anshi bala karaoke» ءموبيلدى قوسىمشاسى جاسالدى. ءبىزدى وقىپ وتىرعان جاناشىر قاۋىمنان، مۇمكىندىگىنشە ەل يگىلىگى جولىنداعى جوبامىزدى قولداپ، تاراتا وتىرساڭىزدار دەگەن ىزگى نيەت بار. مىسالى، بالا - باقشا، مەكتەپ، كولەدجدەردە بارىنشا قولدانسا، اشىق ساباقتار مەن ءتۇرلى كونتسەرتتىك شارالار بار بارلىق جەردە وسى پلاتفورمانىڭ يگىلىگىن قولدانىلسا دەگەن ماقساتىمىزدى جەتكىزگىمىز كەلەدى. وسى جوبانىڭ ۇلكەن ءبىلىم پلاتفورماسىنا اينالىپ انا ءتىلىن ۇيرەنۋگە جانە دەڭگەيىن جاڭا بيىككە كوتەرۋگە ارنايى ويىن پلاتفورمالارى ارقىلى دا قول جەتكىزگىمىز كەلەدى. الداعى جىلدار اندەردىڭ سانىن ارتتىرىپ 1000 ءان جازدىرىپ قوسىمشاداعى ءان ءتىزىمىن تولىقتىرعىمىز كەلەدى. بۇل باعىتتا بۇگىندە قوسىمشا جۇمىستار اتقارىلىپ جاتىر.

جوباعا قاتىسۋشىلار سانى ارتىپ كەلەدى.

كەرەمەت ناتيجە بار دەپ ايتۋعا بولادى. ءدال قازىرگى تاڭدا «Anshi bala karaoke» youtube.com/@balakaraoke_kz يۋتۋب ارناسىندا 17 مىڭعا جۋىق قولدانۋشىلارىمىز بار. بۇل تاماشا كورسەتكىش. سەبەبى، بۇل اۋديتوريا – ءوزىمىزدىڭ سەگمەنت. ياعني، جوبانىڭ قاتىسۋشىلارى مەن ناقتى قولدانۋشىلارى. ارينە، ءموبيلدى قوسىمشامىزدا جازىلۋشىلىر سانى ءالى ازداۋ. جاقىندا عانا اشىلدى. بۇل جۇمىستاردى دا ءارى قاراي جالعاستىراتىن بولامىز. ءبىر قۋانارلىعى، بالا باقشا مەن مەكتەپتەردە يۋتيۋب ارنا ارقىلى ءان ساباقتارىندا ۇستازدار مەن وقۋشىلار ءبىزدىڭ اندەرىمىزدى ءجيى قولدانىپ جۇرگەنىن بايقايمىز. تەلەديدار ارقىلى ۇيلەرىندە اتا - انالارىمەن بىرگە بالالاردىڭ ءان ايتىپ جۇرگەنىن كورىپ ءجۇرمىز. ەندى، «Anshibala» قوسىمشامىز جايلى كوپشىلىك حاباردار بولسىن دەگەن ماقساتتا 15 قازاننان باستاپ رەسپۋبليكالىق ءان بايقاۋىن جاريالادىق. «Anshibala» قوسىمشاسىن جۇكتەپ الىپ سايىسقا قاتىسقان ءار بالاعا سىيلىق تابىستاۋدى جوسپارلاپ وتىرمىز. ۇلتتىق جوبامىزدى قولداۋعا ات سالىسايىق، اعايىن. بالالاردى وسى باستان ۇلتتىق دەڭگەيدە تاربيەلەسەك، بولاشاعىمىز كەمەل بولاتىنى انىق.

رۋحاني كاپيتالىمىز - بالالار مەن اتا - انالار

وسى جوبامىزبەن ەلىمىزدىڭ بەلگىلى ازاماتتارى مەن ونەر قايراتكەرلەرى تانىسىپ، اق باتاسىن بەرىپ جاتقانى ءبىزدى قۋانتادى. شابىت بەرەدى. كۇش سىيلايدى بىزگە. ءتۇرلى دەڭگەيدە كەزدەسۋلەر مەن كەلىسسوزدەر وتكىزىپ جاتىرمىز. ناتيجەسى شۇكىر. اسىرەسە، ءبىزدىڭ ەڭ باستى – رۋحاني كاپيتالىمىز - بالالار مەن اتا - انالاردىڭ ريزاشىلىعى ماڭىزدى. الداعى ۋاقىتتا الەۋمەتتىك جەلىلەردە جانە اقپارات كەڭىستىگىندە قولداۋشىلاردى كورە جاتارسىزدار دەپ ويلايمىن. سوندىقتان، الداعى ۋاقىتتارى جاقسى ناتيجەلەر مەن تابىستى شەشىمدەر شىعاتىنىنا سەنەمىن.

باستى ماقسات: جوبانى - حالىقارالىق ءبىلىم پلاتفورماسىنا اينالدىرۋ

الداعى جوسپار - جوبامىزدىڭ دەڭگەيىن جاڭا ساپاعا كوتەرىپ، قولدانۋشىلار سانىن ارتتىرۋ. سول ارقىلى، حالىقارالىق ءبىلىم پلاتفورماسىنا اينالدىرۋ. اعىلشىن جانە ورىس ءتىلدى قاۋىمعا قازاق ءتىلىن قىسقا ۋاقىتتا جانە جەڭىل جولمەنەن ۇيرەتتەتىن قۇرالدى ۇسىنۋ. مىنە، وسىنداي ۇلى ماقساتتار جولىندا بىرگە بولىپ، تىلەكتەستىك تانىتادى دەگەنگە بەك سەنەمىن. سەبەبى، ءبىزدىڭ جوبا بۇگىنگى اعىمداعى تىرلىك عانا ەمەس، بولاشاعى زور باستاما!

ءان ومىرىندە جارىق جۇلدىزداي ساۋلە شاشىپ، ايرىقشا ءىزى قالدىرامىن، قازاق حالقىنىڭ ۇلتتىق ماقتانىشىنا اينالامىز دەسەك، ونەر قايراتكەرلەرى مەن رۋحاني تۇلعالاردى كوپتەپ شىعارۋىمىز كەرەك. وسىنداي يگى وي ءار قازاقتىڭ كوكەيىندە بولۋى ءتيىس.