"5 ماۋسىم – دۇنيەجۇزىلىك قورشاعان ورتانى قورعاۋ" كۇنىنە وراي قىزىلوردا وبلىسىندا «تازا قازاقستان» باعدارلاماسى اياسىندا «ءمولدىر بۇلاق» ەكولوگيالىق اكتسياسى ۇيىمداستىرىلدى. 

تابيعاتتى ايالاۋ مەن سۋ كوزدەرىنىڭ تازالىعىن ساقتاۋ ماقساتىندا وتكەن شارا وڭىردەگى ەكولوگيالىق مادەنيەتتى قالىپتاستىرۋعا جانە تۇرعىنداردىڭ قورشاعان ورتاعا دەگەن جاۋاپكەرشىلىگىن ارتتىرۋعا باعىتتالدى.

اكتسياعا وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى، وبلىستىق قوعامدىق دامۋ باسقارماسى، وبلىستىق ەكولوگيا دەپارتامەنتى، «قازسۋشار» رمك قىزىلوردا فيليالى، ارال-سىرداريا باسسەيندىك ينسپەكتسياسى قىزمەتكەرلەرى جانە قورقىت اتا اتىنداعى قىزىلوردا ۋنيۆەرسيتەتىنىڭ ستۋدەنتتەرى قاتىستى. ەكولوگيالىق شاراعا 500-دەن استام ادام جۇمىلدىرىلىپ، تازالىق جۇمىستارىن جۇرگىزۋگە ءوز ۇلەستەرىن قوستى.

اكتسيا بارىسىندا تابيعي سۋ كوزدەرى مەن جاعالاۋ اۋماقتارىندا سانيتارلىق تازالىق جۇمىستارى جۇرگىزىلىپ، ناتيجەسىندە 5,5 توننادان استام تۇرمىستىق قالدىق شىعارىلدى. 

جالپى، «تازا قازاقستان» باعدارلاماسى اياسىندا وڭىردە سانيتارلىق تازالىقتى ساقتاۋ، اباتتاندىرۋ جۇمىستارىن كۇشەيتۋ جانە قورشاعان ورتانى قورعاۋ باعىتىنداعى جۇمىستار جۇيەلى تۇردە جالعاسۋدا.