بۇگىن «ونەر ورتالىعىندا» قىزىلوردا وبلىسىنىڭ اكىمى مۇرات ەرگەشباەۆتىڭ قاتىسۋىمەن مادەنيەت جانە ونەر قىزمەتكەرلەرى كۇنىنە ارنالعان سالتاناتتى شارا ءوتتى. جيىنعا سالا ارداگەرلەرى، ونەر مايتالماندارى جانە زيالى قاۋىم وكىلدەرى قاتىستى.
حالقىمىزدىڭ رۋحاني مۇراسىن ساقتاپ، ەرتەڭگە ساباقتاستىرۋ – مەملەكەتتىك ساياساتتىڭ باسىم باعىتتارىنىڭ ءبىرى. ەلدىگىمىزدىڭ رۋحانيات بايراعىن كوتەرگەن مادەنيەت جانە ونەر قىزمەتكەرلەرى قورقىت اتا مۇراسىن، جىراۋلار جادىگەرىن، تالانتتار تاريحىن جالعاپ، حالىق قوشەمەتىنە بولەنىپ كەلەدى.
مەملەكەت باسشىسىنىڭ، ۇكىمەتتىڭ قولداۋىمەن وڭىردە 200-دەن استام الەۋمەتتىك نىسان سالىندى. ونىڭ 22-ءسى – مادەنيەت نىسانى. اتاپ ايتقاندا، بارلىق اۋداندا «رۋحانيات ورتالىقتارى» بوي كوتەرسە، قىزىلوردادا «ونەر ورتالىعى»، «اناعا تاعزىم» جانە «وتباسى ورتالىعى» ەل يگىلىگىنە قىزمەت ەتۋدە. تاريحي-ولكەتانۋ مۋزەيىنىڭ، «دوستىق ءۇيىنىڭ» جاڭا عيماراتتارى اشىلدى. بالالاردىڭ شىعارماشىلىق جانە زياتكەرلىك قابىلەتىن دامىتۋ ماقساتىندا «وقۋشىلار سارايى» مەن «سىر جۇلدىزدارى» اكادەمياسى ىسكە قوسىلدى.
بۇگىندە قىزىلوردادا مەملەكەت باسشىسىنىڭ ۇلتتىق قۇرىلتايدا بەرگەن تاپسىرماسىنا سايكەس جاڭا دراما تەاتر مەن پرەزيدەنتتىك كىتاپحانا قۇرىلىسى ءجۇرىپ جاتىر.
سالاعا بيىلدىڭ وزىندە 6 ملرد تەڭگەدەن استام قارجى ءبولىندى.
مۇرات نالقوجاۇلى ءوز سوزىندە مادەنيەت پەن رۋحانياتتىڭ قوعام ومىرىندەگى ايرىقشا ماڭىزىن اتاپ ءوتتى.
«مەملەكەت باسشىسى قاسىم-جومارت كەمەلۇلى: «مادەنيەت – ۇلتتىڭ تولقۇجاتى. جاھان جۇرتى ەلىمىزدى، ەڭ الدىمەن، ونەرىمىز ارقىلى تانىپ بىلەدى»، – دەگەن بولاتىن.
ەلدىڭ رۋحاني تىرەگىن نىقتاپ، ۇلتتىڭ ۇلى مۇراسىن ساقتاۋدا ايانباي ەڭبەك ەتىپ جۇرگەن بارشا مادەنيەت قىزمەتكەرلەرىنە سىر جۇرتشىلىعى اتىنان شىنايى ريزاشىلىعىمدى بىلدىرەمىن.
ونەر مەن رۋحانياتتىڭ ءورىسى كەڭەيىپ، مادەنيەتىمىزدىڭ مارتەبەسى ءاردايىم بيىك بولسىن! ەلىمىزدىڭ رۋحاني دامۋىنا قوسىپ جۇرگەن ەڭبەكتەرىڭىز جەمىستى بولىپ، شىعارماشىلىق تابىستارىڭىز ارتا بەرسىن.
سىزدەرگە زور دەنساۋلىق، شالقار شابىت، وتباسىلارىڭىزعا اماندىق پەن باق-بەرەكە تىلەيمىن. قازاقتىڭ قاسيەتتى ونەرى مەن مادەنيەتى ۇرپاق ساناسىندا ماڭگى جاڭعىرا بەرسىن!»، – دەدى ايماق باسشىسى.
مەرەكەلىك شارادا سالاداعى اسا ۇزدىك جەتىستىكتەرى جانە ەلگە سىڭىرگەن ايرىقشا ەڭبەگى ءۇشىن بىرقاتار ازامات «قۇرمەت» وردەنىمەن، مادەنيەت جانە اقپارات مينيسترلىگىنىڭ «ەڭبەك ارداگەرى»، «مادەنيەت سالاسىنىڭ ۇزدىگى» توسبەلگىلەرىمەن، قۇرمەت گراموتاسى جانە العىس حاتپەن ماراپاتتالدى.
سونىمەن قاتار سالا ماماندارىنا قر پرەمەر-ءمينيسترىنىڭ ءبىرىنشى ورىنباسارى نۇرلىبەك نالىباەۆتىڭ العىس حاتى بەرىلىپ، ولاردىڭ ەل مادەنيەتىنىڭ وركەندەۋى جولىنداعى ەڭبەگى جوعارى باعالاندى.
سىر ەلىنىڭ رۋحاني-مادەني دامۋىنا قوسقان ۇلەسى ءۇشىن بىرقاتار ازاماتقا وبلىستىڭ قۇرمەت گراموتاسى جانە وبلىس اكىمىنىڭ العىس حاتى تابىستالدى. ادەبيەت پەن ونەر سالاسىندا ەرەكشە قولتاڭباسىمەن تانىلعان شىعارماشىلىق وكىلدەرىنە جىل سايىن بەرىلەتىن وبلىس اكىمىنىڭ ءداستۇرلى «تۇران» سىيلىعىنا بيىل 19 ادام يە بولدى.
كاسىبي مەرەكەدە ساحنادا تۇرماعامبەت اتىنداعى حالىق اسپاپتار وركەسترى، «توميريس» بي، «قورقىت سازى» قوبىزشىلار، قورقىت اتا اتىنداعى قىزىلوردا ۋنيۆەرسيتەتىنىڭ قىزدار ۆوكالدى انسامبلدەرى، قازانعاپ اتىنداعى مۋزىكالىق جوعارى كوللەدجىنىڭ بايانيستەرى، قاراكوز اقداۋلەتوۆا اتىنداعى بالالار ستۋدياسى جانە «سىر ساندۋعاشتارى» بالالار ۆوكالدى توبى، كامەرالىق حور ۇجىمى، كلاسسيكالىق اندەر شەرۋىمەن ەۋروپانىڭ تالعامپاز كورەرمەنىنىڭ ىستىق ىقىلاسىنا بولەنگەن انشىلەر ونەر كورسەتتى.
ءىس-شارا بارىسىندا قاتىسۋشىلار ارنايى ۇيىمداستىرىلعان كورمەنى ارالاپ كوردى. كورمەگە ءوڭىردىڭ رۋحاني-مادەني بولمىسىن تانىتاتىن قۇندى ەكسپوناتتار، قولونەر شەبەرلەرىنىڭ تۋىندىلارى، تاريحي جادىگەرلەر جانە جەرگىلىكتى ونەرپازداردىڭ شىعارماشىلىق جۇمىستارى قويىلىپ، كوپشىلىك نازارىنا ۇسىنىلدى.
قىزىلوردا وبلىسى اكىمىنىڭ ءباسپاسوز قىزمەتى
