قازاقستان رەسپۋبليكاسى پارلامەنتىنىڭ سەناتى تمد مەملەكەتتەرى اراسىنداعى قىزمەتتەردىڭ ەركىن ساۋداسى، ينۆەستيتسيالار قۇرۋ، ولاردىڭ قىزمەتى مەن جۇزەگە اسىرىلۋى تۋرالى كەلىسىمدى راتيفيكاتسيالادى.وسى كەلىسىمگە قاتىستى دەپۋتاتتاردىڭ سۇراقتارىنا قر ساۋدا جانە ينتەگراتسيا ۆيتسە-ءمينيسترى جانەل سابىرقىزى جاۋاپ بەردى.

قۇجاتقا 2023 جىلى 8 ماۋسىمدا سوچيدە تاۋەلسىز مەملەكەتتەر دوستاستىعى ۇكىمەت باسشىلارى كەڭەسىنىڭ وتىرىسىندا قول قويىلعان. ونى دايىنداۋ جونىندەگى باستاما 2011 جىلى تمد ۇكىمەت باسشىلارى كەڭەسىنىڭ شەشىمىمەن ەركىن ساۋدا ايماعى تۋرالى شارتتى ىسكە اسىرۋ شەڭبەرىندە قالعا الىندى. كەلىسسوزدەر پروتسەسى ون جىلدان استام ۋاقىتقا سوزىلدى. 2012 جىلدان باستاپ قۇجاتتىڭ ءماتىنى مەن ۇلتتىق قىزمەت نارىقتارىنا قول جەتكىزۋ بويىنشا ەلدەردىڭ ناقتى مىندەتتەمەلەرىنىڭ ءتىزىمى تالقىلاندى.

كەلىسىم تمد مەملەكەتتەرى اراسىنداعى ساۋدا-ەكونوميكالىق ىنتىماقتاستىقتى نىعايتۋعا، قازاقستاندىق ءونىم بەرۋشىلەرگە سەرىكتەس ەلدەردىڭ نارىعىنا قولجەتىمدىلىكتى قامتاماسىز ەتۋگە، قازاقستاندىق كاپيتالمەن كاسىپورىندار قۇرۋ ءۇشىن جاعداي جاساۋعا، سونداي-اق ءوزارا ينۆەستيتسيالاردى تارتۋعا جانە قورعاۋعا باعىتتالعان. قابىلدانعان قۇجاتقا سايكەس، دۇنيەجۇزىلىك ساۋدا ۇيىمىنا (دسۇ) قاتىسۋشى مەملەكەتتەر تمد ەلدەرىنە ولاردىڭ حالىقارالىق مىندەتتەمەلەرى شەڭبەرىنەن كەم ەمەس قولايلى جاعدايلار بەرۋگە مىندەتتەلەدى. ءوز كەزەگىندە، دسۇ-عا كىرمەيتىن مەملەكەتتەر كەلىسىمگە قول قويىلعان كەزدە ولاردىڭ زاڭناماسىنا سايكەس شارتتاردى ۇسىناتىن بولادى.

كەلىسىمگە ارمەنيا رەسپۋبليكاسى، بەلارۋس رەسپۋبليكاسى، قازاقستان رەسپۋبليكاسى، قىرعىز رەسپۋبليكاسى، رەسەي فەدەراتسياسى، تاجىكستان رەسپۋبليكاسى جانە وزبەكستان رەسپۋبليكاسى قاتىستى. قازاقستاننىڭ تمد مەملەكەتتەرىمەن قىزمەتتەرىنىڭ ءوزارا ساۋداسى 2024 جىلى 4,3 ملرد اقش دوللارىن قۇرادى. بۇل رەتتە قازاقستاندىق قىزمەتتەر ەكسپورتى 2,2 ملرد دوللارعا جەتتى، ال تمد ەلدەرىنەن يمپورت — 2,1 ملرد. وتكەن جىلى تمد مەملەكەتتەرىنەن قازاقستان ەكونوميكاسىنا ينۆەستيتسيالار كولەمى 4 ملرد دوللاردى قۇرادى، ال تمد ەلدەرىنە قازاقستاندىق ينۆەستيتسيالار — 0,6 ملرد دوللار بولدى.

راتيفيكاتسيالانعان كەلىسىم دسۇ جانە ەاەو مۇشەسى بولىپ تابىلمايتىن وزبەكستانمەن ىنتىماقتاستىقتى كەڭەيتۋ بويىنشا جەكە ماڭىزعا يە بولادى. قۇجاتقا قول قويۋ قازاقستاندىق قىزمەت كورسەتۋشىلەرگە وزبەك نارىعىنا پرەفەرەنتسيالىق قولجەتىمدىلىككە كەپىلدىك بەرەدى، سونداي-اق بيزنەستى جۇرگىزۋدىڭ بىرىڭعاي اشىق شارتتارىن جاسايدى. سونىمەن بىرگە رەسەيمەن، ارمەنيامەن، بەلارۋسپەن جانە قىرعىزستانمەن قىزمەتتەر ساۋداسى ەاەو — نىڭ بىرىڭعاي كەڭىستىگى شەڭبەرىندە، ال تاجىكستانمەن-دسۇ جەلىسى بويىنشا مىندەتتەمەلەر شەڭبەرىندە رەتتەلۋدە.

كەلىسىمدى راتيفيكاتسيالاۋ وتاندىق بيزنەس ءۇشىن جاڭا مۇمكىندىك اشادى، قىزمەتتەر مەن ينۆەستيتسيالار سالاسىن دامىتۋ ءۇشىن تۇراقتى قۇقىقتىق نەگىز جاسايدى، سونداي-اق قازاقستاننىڭ تمد كەڭىستىگىندەگى ينتەگراتسيالىق بايلانىستارىن كۇشەيتەدى.