وسىعان وراي قازاقستان رەسپۋبليكاسىنىڭ پرەزيدەنتى مەن سلوۆەنيا رەسپۋبليكاسىنىڭ پرەزيدەنتى كەلەسى ماسەلەلەردى مالىمدەدى:
1. قازاقستان مەن سلوۆەنيا اراسىنداعى دوستىق، ءوزارا قۇرمەت جانە ءتيىمدى ىنتىماقتاستىققا نەگىزدەلگەن 30 جىلدان استام ۋاقىت بۇرىن ورناعان ديپلوماتيالىق قاتىناستاردى اتاپ ءوتىپ، تاراپتار وسى سەرىكتەستىكتى ودان ءارى نىعايتۋعا جانە ارتاراپتاندىرۋعا دەگەن بەرىك ۇستانىمىن راستادى. بۇل ەكى ەل اراسىنداعى قولدانىستاعى قۇقىقتىق نەگىزدەر اياسىندا جۇزەگە اسىرىلادى.
2. ەكى پرەزيدەنت ەكونوميكا، ساۋدا جانە ينۆەستيتسيا سالالارىنداعى ىنتىماقتاستىقتى كەڭەيتۋگە كەلىسىپ، اسىرەسە ورنىقتى بيزنەس تاجىريبەلەردى ىلگەرىلەتۋ مەن شاعىن جانە ورتا كاسىپورىنداردى قولداۋعا ەرەكشە نازار اۋداردى. ولار بيزنەس اراسىنداعى ءىس-قيمىل مەن نارىقتاردى ءوزارا ناسيحاتتاۋ ارقىلى فارماتسەۆتيكا، اقپاراتتىق-كوممۋنيكاتسيالىق تەحنولوگيالار، ەنەرگيا تيىمدىلىگى، ەكولوگيالىق تەحنولوگيالار، جاساندى ينتەللەكت، ينجەنەريا جانە وزىق وندىرىستىك يننوۆاتسيالار سالالارىندا ىنتىماقتاستىقتى كۇشەيتۋگە مىندەتتەندى.
وسى ورايدا، ولار قازاقستان-سلوۆەنيا بيزنەس-فورۋمىن وتكىزۋدى قۇپتاپ، ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ بەلسەندىلىگىن ارتتىرۋ جانە ىسكەرلىك كەڭەس قۇرۋدىڭ ماڭىزدىلىعىن اتاپ ءوتتى.
3. ەكى پرەزيدەنت قازاقستاننىڭ ترانسكاسپي حالىقارالىق كولىك ءدالىزىن دامىتۋداعى ماڭىزدى ءرولىن اتاپ ءوتىپ، ونى ازيا مەن ەۋروپا اراسىنداعى ەڭ ءتيىمدى جانە تىكەلەي ساۋدا جولى رەتىندە مويىندادى.
4. پرەزيدەنتتەر تۋريزم سالاسىنداعى ىنتىماقتاستىقتى تەرەڭدەتۋدى قولداپ، بۇل باعىتتا ءبىلىم مەن تاجىريبە الماسۋعا، سونىڭ ىشىندە ورنىقتى تۋريزم، جاساندى ينتەللەكت، تسيفرلاندىرۋ جانە ادام رەسۋرستارىن دامىتۋ سالالارىنداعى ۇزدىك تاجىريبەلەردى قولدانۋعا باسا نازار اۋداردى.
5. پرەزيدەنتتەر جوعارى ءبىلىم، عىلىم جانە زەرتتەۋ سالالارىنداعى ەكىجاقتى ىنتىماقتاستىقتى كەڭەيتۋگە جانە بىرلەسكەن اكادەميالىق جانە عىلىمي باستامالاردى جۇزەگە اسىرۋ مۇمكىندىكتەرىن زەردەلەۋگە ۋاعدالاستى.
6. تاراپتار كورمەلەر، كونتسەرتتەر، فەستيۆالدەر مەن فيلم كورسەتىلىمدەرىن ۇيىمداستىرۋ ارقىلى مادەني ىنتىماقتاستىقتى جانداندىرۋعا جانە ەكى حالىق اراسىنداعى مادەني بايلانىستاردى تەرەڭدەتۋگە نيەت ءبىلدىردى.
7. سلوۆەنيا ەۋروپا وداعى مەن قازاقستان اراسىنداعى رەادميسسيا تۋرالى كەلىسىم، سونداي-اق ۆيزالىق جەڭىلدىكتەر تۋرالى كەلىسىم بويىنشا كەلىسسوزدەردى مۇمكىندىگىنشە ەرتەرەك باستاۋدى قولداۋعا دايىندىعىن ءبىلدىردى.
8. قازاقستان مەن سلوۆەنيا پرەزيدەنتتەرى كليماتتىڭ وزگەرۋىنە بىرلەسىپ قارسى تۇرۋ جولدارىن ىزدەۋگە، اسىرەسە سۋ رەسۋرستارىن باسقارۋ، شولەيتتەنۋمەن كۇرەسۋ جانە تابيعي اپاتتاردىڭ الدىن الۋ شارالارىن كۇشەيتۋگە كەلىستى.
9. ەكى پرەزيدەنت ايەلدەردىڭ قۇقىعىن ىلگەرىلەتۋ جانە الەۋمەتتىك-ەكونوميكالىق سەكتورلار مەن شەشىم قابىلداۋ ۇدەرىستەرىندە گەندەرلىك تەڭدىكتى قامتاماسىز ەتۋگە باعىتتالعان جاھاندىق كۇش-جىگەردى قولدايتىندارىن راستادى. ولار ايەلدەردىڭ بەيبىتشىلىك پەن قاۋىپسىزدىك، كليماتتىڭ وزگەرۋى جانە ازىق-تۇلىك قاۋىپسىزدىگى سياقتى جاھاندىق سىن-قاتەرلەردى شەشۋدەگى ماڭىزدى ءرولىن اتاپ ءوتتى.
10. ەكى پرەزيدەنت كوپجاقتىلىق قاعيداتتارىنا، ونىڭ ىشىندە بۇۇ-نىڭ نەگىزگى رولىنە ادالدىقتارىن تاعى دا راستادى. ولار جاھاندىق بەيبىتشىلىك پەن قاۋىپسىزدىكتى قامتاماسىز ەتۋدەگى بۇۇ قاۋىپسىزدىك كەڭەسىنىڭ ماڭىزدى ءرولىن مويىنداي وتىرىپ، سلوۆەنيانىڭ 2024-2025 جىلدارداعى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى ۇلەسىن جوعارى باعالادى. استانا ليۋبليانانىڭ وسى بەدەلدى ۇيىم اياسىنداعى باستامالارىن قۇپتايدى. تاراپتار حالىقارالىق قۇقىق قاعيداتتارىن، ەگەمەندىك پەن اۋماقتىق تۇتاستىقتى قۇرمەتتەۋگە جانە داۋلاردى بەيبىت جولمەن شەشۋگە دەگەن ۇستانىمدارىن راستادى، ديپلوماتيا مەن ينكليۋزيۆتى ديالوگتىڭ ماڭىزدىلىعىن ەرەكشە اتاپ ءوتتى.
11. قازاقستان ليۋبليانانىڭ 20 مامىردى دۇنيەجۇزىلىك ارالار كۇنى رەتىندە بەلگىلەۋ جونىندەگى باستاماسىن قولداعانىن ەسكەرە وتىرىپ، سلوۆەنيانىڭ «جاس ارالار – بەيبىتشىلىك ءۇشىن» كورمەسىن ۇيىمداستىرۋعا قاتىستى كۇش-جىگەرىن تولىق قۇپتايتىنىن ءبىلدىردى. بۇل باستاما ارالاردىڭ ەكوجۇيەدەگى ماڭىزدى ءرولىن جانە ولاردى قورعاۋ قاجەتتىلىگىن كورسەتەدى، سونداي-اق قورشاعان ورتانى قورعاۋ، ءبىلىم بەرۋ جانە مادەني الماسۋ سالالارىنداعى ەكى ەلدىڭ ورتاق ۇستانىمدارىن ايقىندايدى.
12. سلوۆەنيا قازاقستاننىڭ الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى (ودم) جونىندەگى بۇۇ-نىڭ ايماقتىق ورتالىعىن قۇرۋ باستاماسىن قۇپتايدى.
ءوز كەزەگىندە، قازاقستان پرەزيدەنتى قاسىم-جومارت توقاەۆ سلوۆەنياعا باستامانى قولداپ، بۇۇ قارارىنىڭ تەڭ دەمەۋشىلەرىنىڭ ءبىرى بولعانى ءۇشىن شىنايى ريزاشىلىعىن بىلدىرە وتىرىپ، ەكى ەلدىڭ ورنىقتى دامۋدى، ايماقتىق تۇراقتىلىقتى نىعايتۋ جانە كوپجاقتى ىنتىماقتاستىق ارقىلى جاھاندىق سىن-قاتەرلەردى شەشۋگە دەگەن ورتاق مىندەتتەمەسىن اتاپ ءوتتى.
13. پرەزيدەنتتەر وسى رەسمي ساپار بارىسىندا قول جەتكىزىلگەن ۋاعدالاستىقتار ەكى ەل اراسىنداعى جان-جاقتى ىنتىماقتاستىقتىڭ دامۋىنا تىڭ سەرپىن بەرەتىنىنە سەنىم ءبىلدىردى.
14. سلوۆەنيا رەسپۋبليكاسىنىڭ پرەزيدەنتى قازاقستان رەسپۋبليكاسى پرەزيدەنتىن جاقىن ارادا ليۋبلياناعا ساپارمەن كەلۋگە شاقىردى. بۇل ساپار ەكىجاقتى قاتىناستاردى ودان ءارى نىعايتۋعا جانە ەكى ەل اراسىنداعى ىنتىماقتاستىقتى تەرەڭدەتۋگە مۇمكىندىك بەرەدى.
