ءىىم ۇلتتىق ۇلاننىڭ "باتىس" وڭىرلىك قولباسشىلىعىنا قاراستى 3502 اسكەري ءبولىمىنىڭ جەدەل قامتاماسىز ەتۋ روتاسىنىڭ 1-ۆزۆودىنىڭ اعا مامانى ەفرەيتور نۇرعازى تاشىنبەكوۆكە "جاۋىنگەرلىك ەرلىگى ءۇشىن" مەملەكەتتىك ناگراداسىن - مەدالىن تاپسىرۋ ماڭىزدى ساتتەردىڭ ءبىرى بولدى. ول قىزمەتتىك جاۋىنگەرلىك تاپسىرمالاردى ورىنداۋ كەزىندە باتىلدىق، تاباندىلىق جانە كاسىبيلىك تانىتقانى ءۇشىن وسى ماراپاتقا يە بولدى. ماراپاتتى ءوز قولىنان تاپسىرا وتىرىپ، پرەزيدەنت مۇنداي اسكەري قىزمەتشىلەردىڭ وتانعا دەگەن ادالدىعى مەن باتىلدىعى جاۋىنگەرلىك رۋحتى نىعايتاتىنىن جانە ۇلگى بولاتىنىن اتاپ ءوتتى. سونداي-اق مەملەكەت باسشىسى قازاقستان ارمياسى ۇلتتىق قاۋىپسىزدىك پەن تۇراقتىلىقتىڭ كەپىلى بولىپ قالا بەرەتىنىنە سەنىم ءبىلدىردى.

- پرەزيدەنتتىڭ قولىنان مەدال الۋ — ۇلكەن قۇرمەت پەن جاۋاپكەرشىلىك. مەن بۇل ماراپاتتى تەك وزىمە ەمەس، سونىمەن قاتار قۇقىقتىق ءتارتىپ اسكەرلەرىنە بەرىلگەن باعا رەتىندە قابىلدايمىن. ءبىز بىرگە قىزمەت اتقارامىز، تاپسىرمالارعا بىرگە شىعامىز جانە ارقايسىمىز ءوز ەلىمىزدىڭ قاۋىپسىزدىگى ءۇشىن سوڭىنا دەيىن قىزمەت ەتۋگە دايىنبىز، -  دەدى نۇرعازى تاشىنبەكوۆ.

پرەزيدەنت بارلىق اسكەري قىزمەتشىگە ادال قىزمەتى ءۇشىن العىس ايتىپ، زور دەنساۋلىق، اماندىق جانە العا قويىلعان مىندەتتەردى ورىنداۋدا تابىس تىلەدى.

اقپارات كوزى Polisia.kz