بۇل كۇن - بىرلىك پەن سىيلاستىقتىڭ، جاڭارۋ مەن تاتۋلىقتىڭ سيمۆولى. كورىسۋ كۇنى – 14 ناۋرىزدا اتاپ وتىلەتىن ەرەكشە مەرەكە. بۇل كۇنى ادامدار ءبىر-بىرىمەن قۇشاقتاسىپ، قول الىسىپ، اماندىق-ساۋلىق تىلەيدى. بۇل ءداستۇر تەك سالەمدەسۋ ەمەس، ول – ۇلكەنگە قۇرمەت كورسەتىپ، كىشىگە ىزەت ءبىلدىرۋ، وتكەنگە سالاۋات ايتىپ، جاڭا كۇنگە قادام باسۋ دەگەن ماعىنانى بىلدىرەدى. تاڭعى ساپ تۇزەۋدەن كەيىن پوليتسيا قىزمەتكەرلەرى ءبىر-بىرىمەن ءداستۇر بويىنشا قۇشاقتاسىپ، اقجارما تىلەكتەرىن ايتىپ، سالەمدەستى. ولار ءبىر-بىرىنە قىزمەتتە تابىس، وتباسىلارىنا اماندىق، ەلگە تىنىشتىق تىلەدى. – پوليتسيا – قوعامنىڭ ءبىر بولىگى، سوندىقتان ۇلتتىق داستۇرلەردى ساقتاۋ جانە جاس بۋىنعا جەتكىزۋ ءبىز ءۇشىن ماڭىزدى. كورىسۋ كۇنى بىزگە بىرلىك پەن سىيلاستىقتىڭ ءمانىن تاعى دا ەسكە سالادى – دەپ اتاپ ءوتتى الماتى وبلىسى پد باستىعى مەيرام ابىكەەۆ. پوليتسيا قىزمەتكەرلەرى اراسىندا كورىسۋ كۇنىن اتاپ ءوتۋ داستۇرگە اينالىپ كەلەدى. سەبەبى بۇل مەيرامنىڭ نەگىزگى قۇندىلىقتارى – مەيىرىمدىلىك، قۇرمەت پەن شىنايىلىق قۇقىق قورعاۋ سالاسىندا قىزمەت ەتەتىن ءاربىر جان ءۇشىن اسا ماڭىزدى.