الماتى وبلىسىندا پاترۋلدىك پوليتسيا قىزمەتكەرى باتىلدىق پەن سابىرلىق تانىتىپ، جانارماي بەكەتىندە جارىلىستىڭ الدىن الدى. وقيعا 10 مامىر كۇنى ۇزىناعاش اۋىلىندا بولدى. قىزمەتتىك اۋماعىن باقىلاۋ كەزىندە پاترۋلدىك پوليتسيا ينسپەكتورى ميراس تاستاندى جانارماي قۇيۋ بەكەتىندە تۇرعان گازەل كولىگىنىڭ وتقا ورانعانىن بايقادى. جاعدايدىڭ اۋىر ەكەنىن جانە جارىلىس قاۋىپىن تۇسىنگەن پوليتسەي سول جەردەگى ەكى ازاماتپەن بىرگە وتتى سوندىرۋگە دەرەۋ كىرىسكەن. ولاردىڭ جەدەل ءارى ۇيلەسىمدى ارەكەتىنىڭ ارقاسىندا ءورت دەر كەزىندە توقتاتىلدى. ايتا كەتۋ كەرەك، ەگەر ەشكىم ارەكەت ەتپەگەندە، جالىن جانارماي ساقتالعان رەزەرۆۋارلارعا جەتىپ، اۋىر زارداپتارعا سوقتىرۋى مۇمكىن ەدى.
