پرەزيدەنتكە بۇل وقۋ ورداسى «اقتوبە وبلىسىنىڭ شاعىن جيناقتى اۋىل مەكتەپتەرىنىڭ الەۋەتىن تسيفرلىق تەحنولوگيالاردى قولدانا وتىرىپ دامىتۋ» پيلوتتىق جوباسىنا ەنگىزىلگەنى جونىندە اقپارات بەرىلدى. قاناتقاقتى جوبا شاعىن جيناقتى مەكتەپتەردە تسيفرلىق تەحنولوگيالاردى قولدانۋ ارقىلى ءبىلىم بەرۋدىڭ ساپاسى مەن وقىتۋدىڭ تيىمدىلىگىن ارتتىرۋعا باعىتتالعان. جوبا اياسىندا مۇعالىمدەر قاشىقتان تاجىريبە الماسادى. مەملەكەت باسشىسى اتالعان ءبىلىم وشاعىنداعى جانە باسقا دا اۋىل مەكتەپتەرىندەگى وقۋشىلاردىڭ اشىق ساباعىنا ونلاين-رەجيمدە قاتىستى. بۇدان كەيىن قاسىم-جومارت توقاەۆ شالعاي ەلدى-مەكەندەردە تۇراتىن بالالاردىڭ ءبىلىم الۋىنا قولايلى جاعداي جاساۋ ءۇشىن مەكتەپكە اۆتوبۋس سىيعا تارتتى. سونداي-اق، قاسىم-جومارت توقاەۆ حرومتاۋ جوعارى تاۋ-كەن تەحنيكالىق كوللەدجىنە دە باردى. پرەزيدەنتكە بۇل ءبىلىم وشاعى ەلىمىزدىڭ باتىس وڭىرىندەگى تاۋ-كەن سالاسىنا ماماندار دايارلايتىن جالعىز كاسىپتىك وقۋ ورنى ەكەنى باياندالدى. اقپارات ءۇشىن ايتا كەتسەك، 1979 جىلى نەگىزى قالانعان كوللەدجدە 1157 ستۋدەنت كەنشى، ۇڭعىلاۋشى، كەن بايىتۋشى، سلەسار، تاۋ-كەن ەلەكتر مەحانيگى، ەلەكتر مونتەرى جانە باسقا دا ماماندىقتار بويىنشا ءبىلىم الىپ جاتىر. وقۋ ورنىنىڭ ديرەكتورى باعداشجان مولداشەۆا مەملەكەت باسشىسىنا ءبىلىم بەرۋ ۇدەرىسىندە قولدانىلاتىن وزىق تەحنولوگيالار جونىندە مالىمەت بەردى. اتاپ ايتقاندا، كوللەدجدە تەوريالىق ءبىلىمدى تاجىريبەمەن ۇشتاستىراتىن دۋالدى وقىتۋ جۇيەسى ەنگىزىلگەن. ستۋدەنتتەر كوللەدج اۋماعىنداعى وقۋ-شاحتا پوليگونىندا وندىرىستىك تاجىريبەدەن ءوتىپ، تەحنيكامەن جۇمىس ىستەۋدىڭ كۇردەلى ءادىس-تاسىلدەرىن مەڭگەرەدى. سونداي-اق جاتتىقتىرۋشى-سيمۋلياتورلار ارقىلى شاحتاداعى جاعدايعا بارىنشا ۇقساس ورتادا جۇمىس داعدىلارىن ۇيرەنەدى.
قاسىم-جومارت توقاەۆ كوللەدج جۇمىسىمەن تانىسقاننان سوڭ ستۋدەنتتەرمەن جانە تۇلەكتەرمەن كەزدەستى.
اڭگىمەلەسۋ بارىسىندا مەملەكەت باسشىسى دۋالدى وقىتۋ جۇيەسىنىڭ اسا قاجەت ەكەنىن جەتكىزىپ، اتالعان كوللەدجدەگى تەوريا مەن ءوندىرىستى ۇشتاستىرۋ ارقىلى جۇرگىزىلىپ كەلە جاتقان ءبىلىم بەرۋ ىسىنە جوعارى باعا بەردى.
پرەزيدەنت تاۋ-كەن سالاسى ەل ەكونوميكاسىنىڭ ماڭىزدى بولىگى ەكەنىنە توقتالدى. قاسىم-جومارت توقاەۆتىڭ ايتۋىنشا، «جۇمىسشى ماماندىقتارى جىلى» بولىپ جاريالانعان 2025 جىلى وتاندىق ونەركاسىپتى قولداۋعا باسا نازار اۋدارىلادى.
ءوڭىردىڭ ءبىلىم سالاسى بويىنشا نەگىزگى كورسەتكىشتەردەن رەسپۋبليكا بويىنشا الدا تۇرعانىن ايتا كەتۋ كەرەك. جاقىندا ۇكىمەت وتىرىسىندا پرەمەر-مينيستر ولجاس بەكتەنوۆ، مەكتەپتەردىڭ 76 %-ى دا اۋىلدىق ەلدى مەكەندەردە ورنالاسقانىن اتاپ وتكەن بولاتىن. بىلىكتىلىگى جوعارى ماماندار از، ماتەماتيكا، فيزيكا، شەت تىلدەرى پاندەرىنەن ماماندار جەتىسپەيدى. سالدارىنان – اۋىل مەن قالا مەكتەپتەرىنىڭ اراسىنداعى ءبىلىم بەرۋ، وقىتۋ ساپاسىندا ەداۋىر الشاقتىقتىڭ بارى بايقالادى دەگەن ەدى. وسى ماسەلەلەردى جۇيەلى شەشۋ ءۇشىن و. بەكتەنوۆ وقۋ-اعارتۋ مينيسترلىگىنە اكىمدىكتەرمەن بىرگە، كەلەسى جىلدىڭ سوڭىنا دەيىن اقتوبە وبلىسىنىڭ تاجىريبەسى اياسىندا كەمىندە 200 تىرەك مەكتەپ جەلىسىن قۇرۋدى مىندەتتەگەن ەدى.
انىقتاما ءۇشىن ايتا كەتسەك، اقتوبە وبلىسىندا «قازاقستان حالقىنا» قوعامدىق قورى تىرەك جانە شاعىن جيناقتى مەكتەپتەردى جاراقتاندىرۋعا قارجىلاي كومەك كورسەتسە، ء“بىلىم سالاسىنداعى تۇراقتى دامۋ قورى” تۇتاس جوبانىڭ ۇيلەستىرۋىنە جاۋاپتى بولدى. ال نازارباەۆ زياتكەرلىك مەكتەپتەرى جوباعا ادىستەمەلىك جاعىنان دەمەۋ كورسەتتى. مۇعالىمدەردىڭ بىلىكتىلىگىن ارتتىرۋ جانە زاماناۋي رەسۋرستارمەن جاراقتاندىرۋ ەسەبىنەن تىرەك مەكتەپتەردىڭ تاجىريبەلى مۇعالىمدەرى شاعىن جيناقتى مەكتەپتەردىڭ وقۋشىلارىنا ساباق بەرەدى.
تۇيىندەي ايتساق، مەملەكەت باسشىسىنىڭ قازاقستان حالقىنا جولداۋىندا ۇكىمەتكە جۇكتەگەن مىندەتتەرىنىڭ دە ماڭىزدى بولىگى – وسى ءبىلىم سالاسىن جاڭعىرتۋ بولاتىن. وسى ماقساتتاعى اقتوبە وبلىسى باسشىلىعىنىڭ ءبىلىم بەرۋ سالاسىن مودەرنيزاتسيالاۋداعى ستراتەگيالىق شەشىمدەرى ءوز ناتيجەسىن بەرە باستادى. بۇل – جاس ۇرپاققا ءبىلىم بەرىپ عانا قويماي، قوعامدى اعارتۋشىلىققا، ادامي قۇندىلىقتى دارىپتەۋگە جەتەلەيتىن نەگىزگى قۇندىلىق بولاتىنى ءسوزسىز.
