عاني بەيسەمباەۆ اتا-انالار كوميتەتىنىڭ وكىلدەرىنە ارنالعان «بالالاردىڭ ءال-اۋقاتى مەن قاۋىپسىزدىگى: اتا-انا مەن مەكتەپتىڭ بىرلەسكەن جاۋاپكەرشىلىگى» سەمينار-ترەنينگىنە قاتىستى. وعان ەلىمىزدىڭ بارلىق وڭىرىنەن 500-گە جۋىق اتا-انا جينالدى. مينيستر اتا-انالاردى بالالاردىڭ تاربيەسىنە ەرەكشە كوڭىل بولۋگە شاقىردى جانە اتا-انا مەن مەكتەپتىڭ ىنتىماقتاستىعىن ارتتىرۋ، اتا-انالار كوميتەتتەرىنىڭ ءرولىن نىعايتۋدىڭ ماڭىزدىلىعىنا توقتالدى. «بالالاردى وقىتۋ مەن تاربيەلەۋ پروتسەسىندە ورتاق جاۋاپكەرشىلىك بولۋى كەرەك - بۇل ءبىز ۇمتىلۋىمىز كەرەك نەگىزگى قۇندىلىق. ول ەڭ الدىمەن اتا-انانىڭ باستى جاۋاپكەرشىلىگىندە، مەملەكەت پەن مەكتەپ تاراپىنان ولارعا قولداۋ كورسەتىپ، ءاربىر بالانىڭ جان-جاقتى دامۋىنا جاعداي جاساۋدا. تاربيە وتباسىنان باستالاتىنىن ەستە ۇستاعان ءجون. اتا-انا ۇستازعا دەگەن قۇرمەتتىڭ ۇلگىسىن كورسەتۋى كەرەك، ويتكەنى بالا اتا-اناسىنىڭ ايناسى»، – دەدى عاني بەيسەمباەۆ.

ونىڭ ايتۋىنشا، بالالاردىڭ قاۋىپسىزدىگىن قامتاماسىز ەتۋ، قۇقىقتارىن قورعاۋ، ولاردىڭ دامۋىنا قولايلى جاعداي جاساۋ – مەملەكەتتىك ساياساتتىڭ ەڭ ماڭىزدى باسىمدىعى. بۇل باعىتتا اۋقىمدى شارالار اتقارىلۋدا. بەس جىلدا ەلىمىزدە 1 ملن وقۋشى ورنىنا ارنالعان 1 مىڭنان استام مەكتەپ اشىلدى. العاش رەت وتكەن جىلدان باستاپ 1,7 ميلليوننان استام باستاۋىش سىنىپ وقۋشىلارى مەن الەۋمەتتىك وسال وتباسىلاردان شىققان بالالار تەگىن تاماقپەن قامتىلدى.

«مەملەكەت بالالار ءۇشىن قاۋىپسىز جانە ەرگونوميكالىق ءبىلىم ورتاسىن قۇرۋدى جالعاستىرۋدا. بۇل رەتتە مەملەكەت باسشىسىنىڭ باستاماسىمەن قالالار مەن شالعايداعى اۋىلداردى دا قامتيتىن «جايلى مەكتەپ» ۇلتتىق جوباسى ىسكە اسىرىلۋدا. وتكەن جىلدان باستاپ بارلىق ءبىلىم بەرۋ ۇيىمدارىندا «ءبىرتۇتاس تاربيە» باعدارلاماسى ەنگىزىلىپ، ونىڭ اياسىندا بالالاردى تاربيەلەۋدە اتا-انالاردىڭ پسيحولوگيالىق-پەداگوگيكالىق جانە الەۋمەتتىك قۇزىرەتتىلىگىن ارتتىرۋعا، ءپوزيتيۆتى اتا-انا مادەنيەتىن قالىپتاستىرۋعا باعىتتالعان اتا-انالاردى پەداگوگيكالىق قولداۋ ورتالىقتارى اشىلدى»، – دەپ اتاپ ءوتتى مينيستر. بۇل سەمينار-ترەنينگ «ءبىرتۇتاس تاربيە» باعدارلاماسى اياسىندا ۇيىمداستىرىلدى. تاربيە جۇمىسى بويىنشا نەگىزگى ءتورت تاقىرىپقا بولىنگەن ديسكۋسسيالىق الاڭدار ۇيىمداستىرىلدى. سونىمەن قاتار قازاقستاندىق سۋرەتشى اڭساعان مۇستافانىڭ تاقىرىپتىق كورمەسى ءوتىپ، اتا-انالارعا قازىرگى زامان جاعدايىندا بالالارمەن ەموتسيونالدى بايلانىس ورناتۋ تاسىلدەرى، جانجالداردى ەڭسەرۋ جانە وتباسى مەن مەكتەپتە سەنىمدى اتموسفەرا قۇرۋ بويىنشا ادىستەمەلىك قۇرالدار ۇسىنىلدى.