حالىقارالىق جارمەڭكەگە 30 ەلدەن 300-دەن استام سالالىق وكىل قاتىسۋدا. قازاقستاندىق ستەندتى Visit Astana جانە الماتى وبلىسىنىڭ تۋريزم باسقارماسى ۇيىمداستىردى. قازاقستاننىڭ تۋريستىك الەۋەتىن 16 وكىل تانىستىرۋدا. ولاردىڭ قاتارىندا 7 تۋروپەراتور، 3 قوناقۇي جانە Air Astana اۋە كومپانياسى بار. وزبەكستان قازاقستانعا ىسكەرلىك جانە مەديتسينالىق باعىتىنداعى تۋريستەردى تارتۋعا ارنالعان ماقساتتى نارىق رەتىندە ماڭىزدى ءرول اتقارادى. بۇعان ەلىمىزدەگى لوگيستيكانىڭ ىڭعايلىلىعى، گەوگرافيالىق جانە مادەني جاقىندىق اسەر ەتەدى.
2024 جىلى قازاقستان، وزبەكستان جانە قىرعىزستان ءوڭىردىڭ مادەني جانە تاريحي مۇراسىن ىلگەرىلەتۋ بويىنشا بىرلەسكەن جۇمىستاردى كۇشەيتۋدە. نەگىزگى باستامالار قاتارىندا جاڭا تۋريستىك مارشرۋتتار قۇرۋ، مادەني مۇرانى دارىپتەۋ، ساياحاتشىلارعا قىزمەت كورسەتۋ ساپاسىن جاقسارتۋعا باعىتتالعان ينفراقۇرىلىمدى دامىتۋ بار.
اتاپ وتكەن ءجون، وزبەكستان – قازاقستاننىڭ ۇلى جىبەك جولى بويىنداعى تۋرلاردى دامىتۋ بويىنشا نەگىزگى سەرىكتەسى. جاقىندا ەكى ەل اراسىندا جاڭا تۋريستىك پويىز ىسكە قوسىلدى. بۇل مارشرۋت جىبەك جولىنىڭ نەگىزگى نۇكتەلەرىن قامتيدى جانە ءتۋريزمدى دامىتۋ ءۇشىن بىرىڭعاي ستراتەگيا قۇرۋعا ىقپال ەتەدى. 2024 جىلدان باستاپ قازاقستان مەن وزبەكستان اراسىنداعى رەيستەر سانى 2023 جىلمەن سالىستىرعاندا ايتارلىقتاي ارتتى. قازىرگى ۋاقىتتا ەكى ەل اراسىندا اپتاسىنا 37 رەيس ورىندالۋدا.
