كەڭەس بارىسىندا مەملەكەتتىك ءبىلىم بەرۋ ستاندارتتارىن جەتىلدىرۋ ماسەلەلەرىنە ەرەكشە نازار اۋدارىلدى. بارلىق ءبىلىم دەڭگەيىندە – باستاۋىشتان باستاپ جوعارى بىلىمگە دەيىن جاساندى ينتەللەكتكە قاتىستى تاقىرىپتاردى وقۋ باعدارلامالارىنا ەنگىزۋ قاجەتتىلىگى تالقىلاندى.
ەرمەك كوشەرباەۆ ءبىلىم بەرۋ جۇيەسىنە زاماناۋي تەحنولوگيالاردى ەنگىزۋ – سالانى جاڭعىرتۋ مەن وقىتۋ ساپاسىن ارتتىرۋ جولىنداعى ماڭىزدى قادام ەكەنىن اتاپ ءوتتى.
«جاساندى ينتەللەكتىنى قولدانۋ وقۋشىلار مەن وقىتۋشىلار ءۇشىن جاڭا مۇمكىندىكتەر اشادى. ءبىزدىڭ باستى مىندەتىمىز – وسى تەحنولوگيالاردى وقۋ ۇدەرىسىنە ءتيىمدى ءارى قاۋىپسىز تۇردە ەنگىزۋگە جاعداي جاساۋ. بۇل ءۇشىن ساپالى تسيفرلىق ينفراقۇرىلىم مەن سەنىمدى دەرەكتەردى قورعاۋ جۇيەسى قاجەت. ءبىز وزىمىزدەن ءبىر ساتى جوعارى تۇراتىن ءبىلىمدى، تەحنيكالىق جاعىنان ساۋاتتى جانە بولاشاقتىڭ سىن-قاتەرلەرىنە دايىن ۇرپاق تاربيەلەۋىمىز كەرەك»، — دەپ اتاپ ءوتتى ۆيتسە-پرەمەر.
ول، سونداي-اق جاڭا تەحنولوگيالاردى ۇيرەنۋ ەشقاشان كەش ەمەس ەكەنىن ايتتى. جاساندى ينتەللەكت كەز كەلگەن جاستاعى ادام ءۇشىن قولجەتىمدى قۇرالعا اينالىپ، ولاردىڭ كاسىبي دامۋى مەن بىلىكتىلىگىن ارتتىرۋعا كومەكتەسە الادى.
كەڭەس بارىسىندا تسيفرلىق ترانسفورماتسيا جاعدايىندا كادرلار دايارلاۋ ماسەلەسىنە ەرەكشە نازار اۋدارىلدى. 2024 جىلى قازاقستاندا ۇلتتىق جاساندى ينتەللەكت پلاتفورماسى (ۇجيپ) ىسكە قوسىلىپ، وعان 8 مىڭنان استام قاتىسۋشى تىركەلدى. وسى پلاتفورما اياسىندا مەملەكەتتىك ورگانداردىڭ، باعىنىستى ۇيىمداردىڭ جانە ءتورت جوعارى وقۋ ورنىنىڭ قىزمەتكەرلەرىنە ونلاين وقىتۋ ۇيىمداستىرىلىپ، وعان 915 ادام قاتىستى.
قر عىلىم جانە جوعارى ءبىلىم ۆيتسە-ءمينيسترى دينارا ششەگلوۆا جاساندى ينتەللەكتتى ءبىلىم بەرۋ سالاسىنا ەنگىزۋ عىلىمي قىزمەت پەن بىلىكتى ماماندار دايارلاۋدا جاڭا مۇمكىندىكتەر اشاتىنىن اتاپ ءوتتى.
«جاساندى ينتەللەكت ءبىلىم بەرۋ ورتاسىنىڭ اجىراماس بولىگىنە اينالىپ كەلەدى. ول تەك وقىتۋ پروتسەسىن جەكەلەندىرىپ قانا قويماي، عىلىمداعى زەرتتەۋ تاسىلدەرىن دامىتۋعا دا ىقپال ەتەدى. ستۋدەنتتەر دايىن شەشىمدەردى عانا پايدالانىپ قويماي، بۇل تەحنولوگيالاردىڭ جۇمىس ىستەۋ قاعيدالارىن ءتۇسىنىپ، ولاردى ءتۇرلى سالالاردا بەيىمدەپ، قولدانا ءبىلۋى ماڭىزدى»، — دەدى دينارا ششەگلوۆا.
كەڭەس قورىتىندىسى بويىنشا قر پرەمەر-ءمينيسترىنىڭ ورىنباسارى ەرمەك كوشەرباەۆ ءتيىستى مەملەكەتتىك ورگاندارعا ءبىلىم بەرۋ جۇيەسىنە جاساندى ينتەللەكت تەحنولوگيالارىن ينتەگراتسيالاۋ بويىنشا بەلسەندى جۇمىستى جالعاستىرۋدى، بۇل ۇدەرىستە جەتەكشى ساراپشىلاردى تارتۋدى جانە حالىقارالىق تاجىريبەنى زەرتتەۋدى تاپسىردى.
ءبىلىم بەرۋ جۇيەسىن تسيفرلاندىرۋ جانە جاساندى ينتەللەكتى ەنگىزۋ – مەملەكەتتىك ساياساتتىڭ باسىم باعىتتارىنىڭ ءبىرى. بۇل باستامالاردى ىسكە اسىرۋ زاماناۋي ءبىلىم بەرۋ ورتاسىن دامىتۋعا، جوعارى بىلىكتى ماماندار دايارلاۋعا جانە قازاقستاننىڭ تسيفرلىق تەحنولوگيالار مەن يننوۆاتسيالار سالاسىنداعى پوزيتسياسىن نىعايتۋعا باعىتتالعان كەشەندى باعدارلامالار مەن ستراتەگيالىق مىندەتتەر اياسىندا جۇزەگە اسىرىلادى.
