بۇگىن قىزىلوردادا وبلىس اكىمى نۇرلىبەك نالىباەۆتىڭ قاتىسۋىمەن وبلىس اكىمدىگى جانە قازاقستاننىڭ ازاماتتىق اليانسىمەن بىرلەسىپ ۇيىمداستىرۋىمەن «اۋىلدىق ايماقتاردى دامىتۋداعى ازاماتتىق قوعامنىڭ ءرولى» اتتى ازاماتتىق فورۋم ءوتتى.

وعان پارلامەنت سەناتىنىڭ دەپۋتاتى ناۋرىزباي بايقاداموۆ، ءماجىلىس دەپۋتاتى مۇرات ابەنوۆ، قازاقستاننىڭ ازاماتتىق اليانسى پرەزيدەنتى بانۋ نۇرعازيەۆا، مادەنيەت جانە اقپارات مينيسترلىگىنىڭ ازاماتتىق قوعام ىستەرى كوميتەتى توراعاسىنىڭ ورىنباسارى جانارگۇل ءالجانوۆا، «قازاقستان حالقىنا» قوعامدىق قورىنىڭ باسقارما توراعاسى ءلاززات شىڭعىسباەۆا، ورتالىق ازياداعى ەۋرازيا قورىنىڭ ديرەكتورى ريناد تەمىربەكوۆ، ەلىمىزدىڭ بىرقاتار وڭىرىنەن قوناقتار مەن جاۋاپتى سالا باسشىلارى قاتىستى.

​ايماق باسشىسى ازاماتتىق سەكتور حالىق پەن بيلىكتىڭ اراسىندا التىن كوپىرگە اينالعان ورتاق الاڭ ەكەنىن ايتتى.

​«بۇگىندە ەلىمىزدىڭ دامۋىن ايقىندايتىن كورسەتكىشتەردىڭ ءبىرى – ازاماتتىق سەكتور. مەملەكەتتىڭ تابىستىلىعى ۇكىمەتتىك ەمەس ۇيىمداردىڭ جەمىستى ءارى ءتيىمدى قىزمەتىنە تىكەلەي بايلانىستى.

پرەزيدەنتىمىز قاسىم-جومارت كەمەلۇلى حالىققا ارناعان جولداۋىندا: «ازاماتتىق قوعامعا قولداۋ كورسەتىپ، ونىڭ الەۋەتىن نىعايتا ءتۇسۋ كەرەك. سونداي-اق، اسا ماڭىزدى جالپى مەملەكەتتىك مىندەتتەردى شەشۋ ءۇشىن تالقىلاۋ جۇمىستارىنا ازاماتتىق قوعامنىڭ مۇمكىندىكتەرىن كەڭىنەن قولدانۋ قاجەت»،– دەپ اتاپ وتكەن بولاتىن.

تاۋەلسىزدىكتىڭ العاشقى جىلدارىندا ايماعىمىزدا 15 قوعامدىق ۇيىم بولسا، بۇگىندە ولاردىڭ قاتارى مىڭعا جۋىقتادى. ونىڭ 300-ءى ءوڭىرىمىزدىڭ قوعامدىق-ساياسي، مادەني-رۋحاني ومىرىنە بەلسەندى ارالاسۋدا. بۇل قوعامدا ازاماتتىق جاۋاپكەرشىلىك پەن بەلسەندىلىكتىڭ ارتقانىن ايقىن كورسەتەدى.

بارلىق اۋداندا ۇكىمەتتىك ەمەس ۇيىمدارمەن ءوزارا ءىس-قيمىل جانە ىنتىماقتاستىق جونىندەگى كەڭەستەر، جۇزەگە اسىرىلاتىن جوبالاردىڭ تيىمدىلىگى مەن وزەكتىلىگىن باعالايتىن ساراپشىلىق توپتار جۇمىس ىستەيدى. اكىمدىكتەر جانىنداعى كەڭەستەر مەن كوميسسيالاردىڭ جۇمىسىنا 190 ۇكىمەتتىك ەمەس ۇيىم وكىلى بەلسەندى قاتىسادى.

جىل سايىن مەملەكەتتىك تاپسىرىس ارقىلى ازاماتتىق قوعام ينستيتۋتتارىنا قارجىلاي قولداۋ كورسەتىلىپ كەلەدى. 2023-2025 جىلدارى مەملەكەتتىك الەۋمەتتىك تاپسىرىس اياسىندا بيۋدجەتتەن 3 ملرد. 684 ملن. تەڭگە قاراجات ءبولىنىپ، 427 الەۋمەتتىك جوبا ىسكە اسىرىلۋدا، 3 مىڭ ادام جۇمىسپەن قامتىلعان. الەۋمەتتىك جوبالاردىڭ 200-گە جۋىعى اۋىل تۇرعىندارىنىڭ قاتىسۋىمەن ۇيىمداستىرىلدى. باسىم بولىگى حالىقتىڭ الەۋمەتتىك وسال توپتارىنا كومەك كورسەتۋگە، قوعامدىق كەلىسىمدى، ۇلتتىق بىرلىكتى نىعايتۋعا، حالىقتى جۇمىسپەن قامتۋعا جاردەمدەسۋگە باعىتتالعان.

قوعامدىق قاۋىمداستىقتىڭ كوشباسشىلارى رەتىندە ءبارىڭىزدى ادىلەتتى، تازا، قاۋىپسىز قازاقستاندى قۇرۋ جولىندا حالىقتىڭ بىرلىگىن ارتتىرۋعا، ەگەمەن ەلىمىزدىڭ جارقىن بولاشاعىنا بىرلەسە قىزمەت ەتۋگە شاقىرامىن!»، – دەدى ن.نالىباەۆ.

باسقوسۋدا ن.بايقاداموۆ، م.ابەنوۆ، ر.تەمىربەكوۆ، ل.شىڭعىسباەۆا، ج.ءالجانوۆا، ب.نۇرعازيەۆا ءسوز سويلەپ، ازاماتتىق قوعام ينستيتۋتتارىنىڭ ماڭىزدىلىعىنا توقتالدى.

​سونداي-اق، ءوڭىردىڭ ءوسىپ-وركەندەۋىنە ۇلەس قوسقان ازاماتتارعا وبلىستىڭ قۇرمەت گراموتاسى، وبلىس اكىمىنىڭ، قازاقستاننىڭ ازاماتتىق اليانسى ءتورايىمىنىڭ العىس حاتى تابىستالدى.

فورۋمعا دەيىن سىرداريا اۋدانىنىڭ ناعي ءىلياسوۆ، بەسارىق اۋىلدارىندا سەكتسيالىق وتىرىستار وتكىزىلدى. وندا اۋىلدىڭ الەۋمەتتىك ماسەلەلەرىن شەشۋ، تۇرعىنداردىڭ ءومىر ءسۇرۋ ساپاسىن جاقسارتۋ، قوعامدىق باقىلاۋ جۇرگىزۋگە ۇكىمەتتىك ەمەس ۇيىمداردى تارتۋ ماسەلەلەرى قوزعالدى. ۇەۇ تۋرالى جاڭا زاڭ جوباسى تالقىلانىپ، ءتيىستى ۇسىنىمدار قابىلداندى.