Құрметті достар! Мәдениет және ақпарат министрі Аида Ғалымқызы Ұлттық киноны қолдау орталығы жанындағы Сараптама кеңесінің жаңа құрамымен кездесті. 

Басқосуда алда жарияланатын киножобалар конкурсының ережесі талқыланды. Сараптама кеңесінің мүшелері өткен айда жарияланған басым тақырыптар туралы пікірін ортаға салды. «Келісіп пішкен тон келте болмас» дейді емес пе, жиынға қатысушылардың ұстанымы ортақ мүдде шеңберінде тоғысқаны қуантты.

Басты міндетіміз – көрермен қауымға сапалы туынды ұсыну. Бұл бағытта талап-ережені жетілдіру назардан тыс қалған емес. Есте болса, өткен жылы киногерлердің ұсынысы негізінде Ұлттық киноны қолдау орталығының киножобаларды іріктеу конкурсына өзгерістер енгізген болатынбыз. Бірінші кезекте тек сценарий мен сценарий жоспарлары талданса, кейінгі кезеңде құжаттар қаралып, анықталған қатені түзеуге 3 күн уақыт берілді. Қорытынды кезең – питчинг барысында ашықтық пен әділдік туын көтеру басты ұстанымға айналды. Жүйелі жұмыстың нәтижесі де көп күттірмеді. Биыл өткен жылы іріктелген 17 жобаның өндірісі басталмақ.

Алда жаңа конкурс жақын. Аида Ғалымқызы айтқандай, биыл да талаптардың тасада қалмауына, сценарийдің басым тақырыптарға сәйкес келуіне, сюжет құрылымы мен драматургия принциптеріне баса назар аударылады. Осы мақсатта Сараптама кеңесінің мүшелері конкурстың ашық әрі әділ өтуіне атсалысады деген сенімдеміз!

Ашық дереккөздерден