قۇرمەتتى دوستار! مادەنيەت جانە اقپارات ءمينيسترى ايدا عالىمقىزى ۇلتتىق كينونى قولداۋ ورتالىعى جانىنداعى ساراپتاما كەڭەسىنىڭ جاڭا قۇرامىمەن كەزدەستى.
باسقوسۋدا الدا جاريالاناتىن كينوجوبالار كونكۋرسىنىڭ ەرەجەسى تالقىلاندى. ساراپتاما كەڭەسىنىڭ مۇشەلەرى وتكەن ايدا جاريالانعان باسىم تاقىرىپتار تۋرالى پىكىرىن ورتاعا سالدى. «كەلىسىپ پىشكەن تون كەلتە بولماس» دەيدى ەمەس پە، جيىنعا قاتىسۋشىلاردىڭ ۇستانىمى ورتاق مۇددە شەڭبەرىندە توعىسقانى قۋانتتى.
باستى مىندەتىمىز – كورەرمەن قاۋىمعا ساپالى تۋىندى ۇسىنۋ. بۇل باعىتتا تالاپ-ەرەجەنى جەتىلدىرۋ نازاردان تىس قالعان ەمەس. ەستە بولسا، وتكەن جىلى كينوگەرلەردىڭ ۇسىنىسى نەگىزىندە ۇلتتىق كينونى قولداۋ ورتالىعىنىڭ كينوجوبالاردى ىرىكتەۋ كونكۋرسىنا وزگەرىستەر ەنگىزگەن بولاتىنبىز. ءبىرىنشى كەزەكتە تەك ستسەناري مەن ستسەناري جوسپارلارى تالدانسا، كەيىنگى كەزەڭدە قۇجاتتار قارالىپ، انىقتالعان قاتەنى تۇزەۋگە 3 كۇن ۋاقىت بەرىلدى. قورىتىندى كەزەڭ – پيتچينگ بارىسىندا اشىقتىق پەن ادىلدىك تۋىن كوتەرۋ باستى ۇستانىمعا اينالدى. جۇيەلى جۇمىستىڭ ناتيجەسى دە كوپ كۇتتىرمەدى. بيىل وتكەن جىلى ىرىكتەلگەن 17 جوبانىڭ ءوندىرىسى باستالماق.
الدا جاڭا كونكۋرس جاقىن. ايدا عالىمقىزى ايتقانداي، بيىل دا تالاپتاردىڭ تاسادا قالماۋىنا، ستسەناريدىڭ باسىم تاقىرىپتارعا سايكەس كەلۋىنە، سيۋجەت قۇرىلىمى مەن دراماتۋرگيا پرينتسيپتەرىنە باسا نازار اۋدارىلادى. وسى ماقساتتا ساراپتاما كەڭەسىنىڭ مۇشەلەرى كونكۋرستىڭ اشىق ءارى ءادىل وتۋىنە اتسالىسادى دەگەن سەنىمدەمىز!
اشىق دەرەككوزدەردەن
