بۇگىن قىزىلوردا قالاسىنداعى «ەۆرازيا» سپورت كەشەنىندە مەملەكەت باسشىسىنىڭ «زاڭ مەن ءتارتىپ» قاعيداتى اياسىندا «ادالدىق وزىڭنەن باستالادى» تاقىرىبىندا شاعىن فۋتبولدان وبلىستىق تۋرنير ءوتتى.
سپورتتىق شارانىڭ نەگىزگى ماقساتى – قوعامدا زاڭدىلىق پەن قۇقىقتىق ءتارتىپتى نىعايتۋ، ازاماتتاردىڭ قۇقىقتىق مادەنيەتىن ارتتىرۋ، ادالدىق پەن جاۋاپكەرشىلىك قۇندىلىقتارىن كەڭىنەن ناسيحاتتاۋ جانە بۇقارالىق سپورتتى دامىتۋ.
ءتۋرنيردىڭ اشىلۋ راسىمىنە وبلىستىق قوعامدىق دامۋ باسقارماسى باسشىسىنىڭ ورىنباسارى داۋرەن تلەۋمبەتوۆ قاتىسىپ، جارىسقا قاتىسۋشىلارعا ساتتىلىك تىلەدى.
ءوز سوزىندە باسقارما باسشىسىنىڭ ورىنباسارى «زاڭ مەن ءتارتىپ» قاعيداتىنىڭ قوعامدىق تۇراقتىلىق پەن قاۋىپسىزدىكتى قامتاماسىز ەتۋدەگى ماڭىزىنا توقتالىپ، زاڭ تالاپتارىن ساقتاۋ ءار ازاماتتىڭ كۇندەلىكتى ومىرىندەگى باستى ۇستانىمداردىڭ ءبىرى بولۋى قاجەتتىگىن اتاپ ءوتتى.
– «زاڭ مەن ءتارتىپ – قوعامدىق تۇراقتىلىق پەن قاۋىپسىزدىكتىڭ بەرىك نەگىزى. بۇل قاعيداتتى ورنىقتىرۋ مەملەكەتتىك ورگانداردىڭ عانا ەمەس، قوعامنىڭ ءاربىر مۇشەسىنىڭ ورتاق مىندەتى. زاڭ تالاپتارىن ساقتاۋ، بەلگىلەنگەن ءتارتىپتى ورىنداۋ، وزگەنىڭ قۇقىقتارى مەن زاڭدى مۇددەلەرىن قۇرمەتتەۋ – ازاماتتىق جاۋاپكەرشىلىكتىڭ نەگىزگى كورسەتكىشتەرى. قوعامدىق ءتارتىپ ادامنىڭ وزىنەن باستالادى. ءار ازامات ءوز مىندەتىن ادال ورىنداپ، زاڭ تالاپتارىن ساقتاپ، قوعامدىق ورتاداعى جاۋاپكەرشىلىگىن سەزىنگەن جاعدايدا عانا ورتاق ءتارتىپ قالىپتاسادى. بۇگىنگى سپورتتىق دودا دا وسى قۇندىلىقتاردى دارىپتەۋگە مۇمكىندىك بەرەدى. جارىس بارىسىندا ءار كوماندا سپورتتىق ادەپ پەن ءوزارا قۇرمەت قاعيداتتارىن ساقتاي وتىرىپ، جوعارى دەڭگەيدە ونەر كورسەتەدى دەپ سەنەمىن»، – دەدى داۋرەن وڭعاربايۇلى.
سونداي-اق، اشىلۋ راسىمىنە اۋىر اتلەتيكادان قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، الەم چەمپيوناتىنىڭ ەكى دۇركىن كۇمىس جۇلدەگەرى الماس وتەشوۆ تە قاتىسىپ، ءتۋرنيردىڭ اشىلۋىمەن قۇتتىقتادى. تانىمال سپورتشى جارىسقا قاتىسۋشىلارعا ساتتىلىك تىلەپ، سپورتتىڭ ادامدى تارتىپكە، تاباندىلىققا جانە جاۋاپكەرشىلىككە تاربيەلەيتىنىن اتاپ ءوتتى.
وبلىستىق تۋرنيرگە بۇقارالىق اقپارات قۇرالدارىنىڭ وكىلدەرى، ۇكىمەتتىك ەمەس ۇيىمدار، مەملەكەتتىك مەكەمەلەردىڭ قىزمەتكەرلەرى جانە «جاستار رۋحى» جاستار قاناتى قىزىلوردا وبلىستىق فيليالىنىڭ وكىلدەرىنەن قۇرالعان 8 كوماندا قاتىستى.
جارىستىڭ قورىتىندى ماراپاتتاۋ راسىمىندە جەڭىمپازدار مەن جۇلدەگەرلەرگە ديپلومدار مەن ارنايى ماراپاتتار تابىستالدى. ماراپاتتاردى وبلىستىق قوعامدىق دامۋ باسقارماسى باسشىسىنىڭ ورىنباسارى داۋرەن تلەۋمبەتوۆ جانە قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ قىزىلوردا وبلىسى بويىنشا دەپارتامەنتى باسشىسىنىڭ ورىنباسارى نۇرجان سۇلەيمەنوۆ تابىستادى.
ءتۋرنيردىڭ قورىتىندىسى بويىنشا جۇلدەلى ورىندار سارالانىپ، «بارىس» كومانداسى I ورىندى يەلەندى. II ورىن «نۇر» كومانداسىنا بۇيىرسا، «جاستار رۋحى» جاستار قاناتى قىزىلوردا وبلىستىق فيليالىنىڭ كومانداسى III ورىننان كورىندى.
