پرەزيدەنت وسى جولى دا پەداگوگ الەۋەتى، ۇستاز مارتەبەسىنىڭ ارقاشان نازاردا بولاتىنىن جەتكىزدى. جولداۋداعى "ۇستازدار – ۇلتتىڭ زياتكەرلىك قۋاتى. ولار ءبىلىمدى ۇرپاق تاربيەلەۋ ارقىلى ەلىمىزدىڭ وركەندەۋىنە جول اشادى. ۇزدىك وقۋ باعدارلاماسى، زاماناۋي مەكتەپتەر، وزىق باسقارۋ جۇيەسى بولسا دا، ۇستاز بىلىكتى بولماسا، ونىڭ ءبارى بەكەر ەكەنى انىق. سوندىقتان پەداگوگيكالىق جوعارى وقۋ ورىندارىنا تالاپتى، قابىلەتتى جاستاردى قابىلداۋعا باسا ءمان بەرۋ كەرەك", - دەگەن جولدارى وزىمە ەرەكشە قۋات بەرەدى. نەگە دەسەڭىز؟ كەز كەلگەن ەلدىڭ بولاشاعىنىڭ جارقىن بولۋى ۇستازدار قاۋىمىنىڭ ادامي قۇندىلىقتاردى جوعارى قويىپ، ءوزى ىسىنە ادالدىق تانىتۋىمەن بايلانىستى. وسى جاعىنان ءبىزدىڭ ەلىمىزدىڭ ءالى جارقىن بەلەستەرى مەن كەمەل كەلەشەگى الدا. شۇكىر، زامانۋي مەكتەپتەر، وزىق باسقارۋ جۇيەسى، ءتىپتى، قابىلەتتى جاستار ارامىزدا جەتىپ-ارتىلادى. قازىر ترەندكە اينالعان «جايلى مەكتەپ» باعدارلاماسىنىڭ دا ەل يگىلىگىن كورە باستادى. 

قازىر ءبىلىم سالاسىنداعى كۇن تارتىبىندە تۇرعان ماسەلەلەردىڭ ءبىرى – ساپالى ءبىلىم بەرۋ ەكەنى بەلگىلى. بۇل ارينە مەملەكەتتىڭ قولداۋىنسىز ىسكە اسۋى مۇمكىن ەمەس شارۋا. مىسالى، ءوزىم قىزمەت ەتەتىن – «توميريس» مەديتسينالىق كوللەدجىنىڭ دە ءبىلىم مەن تاربيەگە قاتىستى ءوز ۇستانىمى، ناقتى ستراتەگياسى بار. سونىڭ ارقاسىندا، ءبىزدىڭ ۇجىمنىڭ ابىرويى بيىك، ۇستانىمى مىقتى بولىپ وتىر. ۇستاز بەن ستۋدەنت اراسىندا تىعىز بايلانىس بار. اتا-انامەن مىقتى قاتىناس ورناعان. وسى تۇستا ايتا كەتەتىن ءجايت، قازىرگى ءبىلىم جۇيەسىندە الداعى ۋاقىتتا قانداي ماماندىقتارعا سۇرانىس ارتۋى مۇمكىن دەگەن سۇراقتى كۇن تارتىبىنە شىعارۋ كەرەك. رەتى كەلسە، الدىن الا مونيتورينگ جاساعان ابزال. ەگەر وسىنداي زەرتتەۋلەر بولسا، قوعامعا ارتىق مامان دايىنداۋ تاۋەكەلدەرىن جويا الامىز. مامان دايىنداۋدىڭ ناقتى الەمدىك وركەنيەتتى مودەلدەرى بار. سولاردى ءبىزدىڭ ءبىلىم سالاسىنا دا ەنگىزۋ كەرەك دەپ ويلايمىن. مىسالى، 2000 جىلداردىڭ باسىندا ەكونوميكالىق جانە زاڭگەرلىك باعىتتار ەرەكشە سۇرانىستا بولدى. كوللەدج بەن جوعارى وقۋ ورىندارىنا ءتۇسۋ ءۇشىن جوعارىداعى ماماندىقتار ءۇشىن ءبىر ورىنعا 50-100 تالاپكەردەن كەلىپ وتىردى. بۇل قازىرگى كەي مامانداردىڭ جۇمىسسىز قالىپ، قوعامدا ءوز ورنىن تابا الماۋىنا جول اشىپ وتىر. وكىنىشكە وراي وسىلاي. ال، سوڭعى ۋاقىتتارى مەديتسينالىق ماماندار دايارلايتىن وقۋ ورىندارىنا سۇرانىس ارتىپ وتىرعانى جاسىرىن ەمەس. وسى تۇرعىدا، بىزدەرگە دە زور جاۋاپكەرشىلىك پەن مول مىندەت جۇكتەلەدى. ءبىزدىڭ ءدال وسى ساتتەگى مىندەتىمىز – ساپالى ءبىلىم بەرىپ، مازمۇندى تاربيە جۇمىستارىن جۇرگىزۋ بولىپ وتىر. كوللەدجىمىزدە وسى باعىتتاعى جۇمىستار جۇيەلى اتقارىلىپ كەلەدى. 

تۇيىندەي ايتساق، مەملەكەت باسشىسىنىڭ وسى جولعى جولداۋى پەداگوگ قاۋىمنىڭ كوكەيىندە جۇرگەن نەگىزگى سۇراقتارعا جاۋاپ بەرگەنى انىق. ەندىگى ماقسات، قولدا بار مۇمكىندىكتى پايدالانا وتىرىپ، بيىك شىڭداردى باعىندىرۋ. ۇستازدار ءۇشىن – بيىك شىڭ – بۇل ساپالى ءبىلىم مەن سانالى تاربيە ەكەنى داۋسىز. 

گۋلميرا بايماحانقىزى، "توميريس" مەديتسينالىق كوللەدجىنىڭ وقىتۋشىسى