تەرمينال مەملەكەت باسشىسىنىڭ تاپسىرماسىمەن وتكەن جىلدىڭ قاراشاسىندا قازاقستان پرەمەر-ءمينيسترى ولجاس بەكتەنوۆتىڭ قاتىسۋىمەن اشىلعان بولاتىن. نىساننىڭ قۇرىلىسىنا 16,6 ملرد تەڭگە جەكە ينۆەستيتسيا سالىندى. جەرگىلىكتى بيۋدجەتتەن ينجەنەرلىك-كوممۋنيكاتسيالىق ينفراقۇرىلىمعا 4,3 ملرد تەڭگەدەن استام قارجى ءبولىندى.
ءارى قاراي رومان سكليار دەلەگاتسيا مۇشەلەرىمەن قىزىلوردا قالاسىندا جۇزەگە اسىرىلىپ جاتقان «جولاۋشىلار ۆاگوندارىن جوڭدەۋ، تەحنيكالىق قىزمەت كورسەتۋ كەشەنى جانە ۆاگون قۇراستىرۋ زاۋىتى» جوباسى تانىستىرىلدى. جوباعا 15,4 ملرد تەڭگە ينۆەستيتسيا تارتىلىپ، ونى ىسكە اسىرۋ ەكى كەزەڭ بويىنشا جۇزەگە اسادى.
كەشەننىڭ جوسپارلانعان قۋاتى جولاۋشىلار ۆاگوندارىن جوندەۋ مەن قىزمەت كورسەتۋدى جاقسارتۋعا، سونداي-اق جاڭا ۇلگىلەر شىعارۋعا مۇمكىندىك بەرەدى. بۇل قازاقستاندا، ونىڭ ىشىندە وڭىردە تەمىرجول كولىگىنىڭ دامۋىنا وڭ اسەر ەتەدى.
ۇكىمەت دەلەگاتسياسى ودان ءارى قاراي كىرپىش زاۋىتىنىڭ قۇرىلىسىن جانە شىنى زاۋىتىنىڭ جۇمىسىمەن تانىستى. كىرپىش زاۋىتىنا قىزىلوردا قالاسىنداعى «ءوندىرىس» يندۋستريالىق ايماعىنان 7 گەكتار جەر تەلىمى بەرىلدى، جىلىنا 90 ملن دانا كىرپىش شىعارىلادى دەگەن جوسپار بار.
شىنى زاۋىتىندا جىلىنا 197,1 مىڭ توننا شىنى ءوندىرىلىپ، رەسەي وزبەكستان، قىرعىزستان جانە تاجىكستانعا ەكسپورتتالادى. بۇگىندە زاۋىتتا 366 مامان جۇمىس ىستەيدى. وتكەن جىلى شىنى زاۋىتى ىشىنەن ەنەرگيا ۇنەمدەيتىن شىنى ءوندىرىسىنىڭ جاڭا جەلىسى ىسكە قوسىلدى. قىتايلىق ينۆەستور الداعى ۋاقىتتا 2 كەزەڭگە جوسپارلانعان جاڭا ينۆەستيتسيالىق جوبانى ىسكە اسىرماق.
رومان سكليار سونىمەن قاتار قىزىلورداداعى جاڭا جەو قۇرىلىسىنىڭ بارىسىمەن تانىستى. جوبانىڭ قۇنى – 215 ملرد تەڭگە، قۋاتى – 240 مۆت. بۇگىنگى تاڭدا ينۆەستور – «اقسا ەنەرگي» تۇرىك كومپانياسى نىساننىڭ قۇرىلىسىنا 135 ملرد تەڭگەدەن استام قارجى سالدى. جاڭا جەو ىسكە قوسىلعان كەزدە ءوڭىردى ەلەكتر ەنەرگياسىمەن تولىق قامتاماسىز ەتەدى.
سونىمەن قاتار ۇكىمەتتىك دەلەگاتسيا ايماقتاعى جول ينفراقۇرىلىمىن دامىتۋ ماسەلەسى نازاردا بولدى. رومان سكليار «تاۋەلسىزدىككە – 25 جىل» داڭعىلىن قايتا جاڭعىرتۋ بارىسىن كوردى. وتكەن جىلدان بەرى بەيبارىس سۇلتان كوشەسىنەن ابىلقايىر حان كوشەسىنە دەيىنگى سىرداريا وزەنىنىڭ قورعانىس بوگەتى نىعايتىلىپ، اتالعان داڭعىلدىڭ 6,7 شاقىرىمى قايتا جاڭعىرتىلدى.
«جايلى مەكتەپ» ۇلتتىق جوباسى اياسىندا قىزىلوردا وبلىسىندا 6,9 مىڭ ورىندىق 10 مەكتەپ سالۋ جوسپارلانعان. بۇگىنگى تاڭدا ونىڭ ىشىندە 5 مەكتەپ پايدالانۋعا بەرىلدى. بيىل قالعان 5 وقۋ ورنىنىڭ قۇرىلىسىن اياقتاۋ جوسپارلانۋدا.
سونىمەن قاتار وبلىستىق بيۋدجەتتەن حالىقارالىق ستاندارتتارعا سايكەس كەلەتىن 11 مىڭ ورىندىق ستاديون سالۋعا 20,9 ملرد تەڭگە ءبولىندى. بۇگىنگى تاڭدا شىعىس جانە باتىس تريبۋنالارىنىڭ مەتالل كونسترۋكتسيالارىن مونتاجداۋ تولىعىمەن اياقتالدى، قابىرعالار، ىشكى بولىمدەر جانە سىرتقى ۆيتراجدار توسەلۋدە.
رومان سكليار جاڭا اۆتوۆوكزالدىڭ جۇمىسىمەن دە تانىستى. ول وتكەن جىلى پايدالانۋعا بەرىلدى. عيمارات جولاۋشىلارعا قاجەتتى جابدىقتارمەن جابدىقتالعان جانە 200 ادامعا ارنالعان. جوبانىڭ قۇنى – 975 ملن تەڭگە.
ايتا كەتۋ كەرەك، وڭىردە شاعىن ونەركاسىپتىك ايماقتاردى قۇرۋ بويىنشا دا بەلسەندى جۇمىستار جۇرگىزىلۋدە. بۇل ءوز كەزەگىندە حالىقتى جۇمىسپەن قامتۋ، شاعىن جانە ورتا بيزنەس سۋبەكتىلەرى ءۇشىن ينفراقۇرىلىم ماسەلەلەرىن شەشۋگە ىقپال ەتەدى.
سوڭعى ءۇش جىلدا وڭىردە قۇرىلىس جۇمىستارىنىڭ كولەمى ۇلعايدى. وتكەن جىلدىڭ قورىتىندىسى بويىنشا ءوسىم 153,8%-دى قۇرادى. ىسكە قوسىلعان تۇرعىن ءۇي كولەمى ءوستى، ول رەكوردتىق كورسەتكىشكە – 866,8 مىڭ م2 جەتتى. ەگەر 2022–2023 جىلدارى 4 مىڭعا جۋىق پاتەر پايدالانۋعا بەرىلسە، وتكەن جىلى كىلتتەردى 2,5 مىڭنان استام وتباسى تاپسىردى. سونىمەن قاتار، حالىقتىڭ الەۋمەتتىك وسال توپتارى ءۇشىن تۇرعىن ءۇي ساتىپ الۋ بويىنشا قىزىلوردا وبلىسى رەسپۋبليكادا 1948 پاتەر كورسەتكىشىمەن 2-ءشى ورىندى يەلەندى.
قر پرەمەر-ءمينيسترىنىڭ ءبىرىنشى ورىنباسارى رومان سكليار وبلىستا اتقارىلعان جۇمىستاردى اتاپ ءوتىپ، قىزىلوردا ءوڭىرى رەسپۋبليكانىڭ وڭتۇستىگىندە ەكونوميكالىق ءوسىمنىڭ درايۆەرى بولۋعا ءتيىس ەكەنىن اتاپ ءوتتى.
ۇكىمەتتىڭ ءباسپاسوز قىزمەتى
