قالا اۋماعىن اباتتاندىرۋ مەن سانيتارلىق تازالىقتى قامتاماسىز ەتۋ ماقساتىندا وتكىزىلگەن تازالىق شاراسىنا تۇركىستان قالاسى اكىمدىگىنە قاراستى دەربەس بولىمدەر مەن 6 سەكتوردىڭ قىزمەتكەرلەرى، سونداي-اق وبلىستىق باسقارمالار مەن دەپارتامەنتتەردىڭ وكىلدەرى بەلسەنە اتسالىستى.

جالپى سانى 800-گە جۋىق تۇرعىن سەنبىلىككە قاتىسىپ، قالا تازالىعىنا ءوز ۇلەستەرىن قوستى. سونىمەن قاتار تازالىق جۇمىستارىنا 15 ارنايى تەحنيكا جۇمىلدىرىلدى. سەنبىلىك بارىسىندا ەكولوگيالىق تۇرعىدان ماڭىزدى سانالاتىن 18 ۋچاسكە قامتىلىپ، ونىڭ ىشىندە ۆودوكانال ماڭى، ب.مايلين كوشەسى، قالالىق بالالار اۋرۋحاناسىنىڭ اۋماعى، 160-كۆارتال جانە بەكزات سەكتورى سياقتى اۋماقتاردا سانيتارلىق تازارتۋ جانە كوگالداندىرۋ جۇمىستارى جۇرگىزىلدى.

الدىن الا بەلگىلەنگەن ايماقتاردا ءشوپ شابۋ، جاياۋ جۇرگىنشىلەر جولدارىن سىپىرۋ، تۇرمىستىق جانە تابيعي قوقىس قالدىقتارىن جيناۋ سياقتى جۇمىستار اتقارىلىپ، ناتيجەسىندە 15 تونناعا جۋىق قوقىس شىعارىلىپ، ارنايى پوليگوندارعا جەتكىزىلدى.

سونىمەن قاتار ا.جانگەلدين، ب.مايلين، س.جاندوسوۆ كوشەلەرىندە دە سانيتارلىق تازالاۋ ءىس-شارالارى ۇيىمداستىرىلىپ، اباتتاندىرۋ جۇمىستارى جۇرگىزىلدى.

تۇركىستان قالاسى اكىمدىگى مەن ءتيىستى مەكەمەلەر تاراپىنان قورشاعان ورتانى قورعاۋ، ءوڭىردىڭ ەكولوگيالىق احۋالىن جاقسارتۋ جانە قالا اۋماعىندا سانيتارلىق تالاپتاردى ساقتاۋ باعىتىنداعى جۇمىستار الداعى ۋاقىتتا دا جۇيەلى تۇردە جالعاسىن تاباتىن بولادى.