قىزىلوردا قالاسىندا ءوتىپ جاتقان «KZO CAMP: ONE COMMUNITY» رەسپۋبليكالىق ۆولونتەرلەر سلەتىنە قاتىسۋشىلار «تازا قازاقستان» جالپىۇلتتىق ەكولوگيالىق باستاماسى اياسىندا پرەزيدەنت ساياباعىندا تال ەگۋ تال ەگۋ شاراسىنا قاتىستى.

«GREEN ARAL: VOLUNTEERS FOR LIFE 2026» حالىقارالىق ۆولونتەرلەر اپتالىعىنىڭ اشىلۋ سالتاناتىنان كەيىن ۇيىمداستىرىلعان ەكولوگيالىق شارا مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان «تازا قازاقستان» جالپىۇلتتىق ەكولوگيالىق باعدارلاماسى اياسىندا ءوتتى. 

باستامانىڭ نەگىزگى ماقساتى – تابيعاتقا جاناشىرلىقپەن قاراۋ مادەنيەتىن قالىپتاستىرىپ، ءاربىر ازاماتتىڭ قورشاعان ورتا الدىنداعى جاۋاپكەرشىلىگىن ارتتىرۋ.

يگى باستاماعا وبلىستىق قوعامدىق دامۋ باسقارماسىنىڭ باسشىسى رۋسلان كايۋپوۆ، قازاقستان رەسپۋبليكاسى مادەنيەت جانە اقپارات مينيسترلىگى ازاماتتىق قوعام ىستەرى كوميتەتى توراعاسىنىڭ ورىنباسارى توعجان زەيدەنوۆا، قازاقستان حالىق كەڭەسىنىڭ مۇشەلەرى ۆەرا كيم مەن جانار بيمۇراتقىزى، سونداي-اق وزبەكستان، قىرعىزستان جانە قازاقستاننىڭ 10 وڭىرىنەن كەلگەن 100 ۆولونتەر قاتىستى.

اكتسيا اياسىندا قاتىسۋشىلار پرەزيدەنت ساياباعىنا تال كوشەتتەرىن وتىرعىزىپ، قالانى كوگالداندىرۋعا جانە ونىڭ جاسىل جەلەگىن مولايتۋعا ۇلەس قوستى. ءىس-شارا تابيعاتتى ايالاۋ مادەنيەتىن قالىپتاستىرۋعا، ۆولونتەرلەردى ورتاق يگى ىسكە جۇمىلدىرۋعا جانە قورشاعان ورتاعا دەگەن جاۋاپكەرشىلىكتى ارتتىرۋعا باعىتتالدى.

ايتا كەتۋ قاجەت، «KZO CAMP: ONE COMMUNITY» رەسپۋبليكالىق ۆولونتەرلەر سلەتى ەلىمىزدىڭ ءار وڭىرىنەن جانە كورشىلەس مەملەكەتتەردەن كەلگەن ەرىكتىلەردىڭ باسىن قوسىپ، تاجىريبە الماسۋىنا، ورتاق جوبالاردى تالقىلاۋىنا جانە جاڭا باستامالاردى جۇزەگە اسىرۋىنا مۇمكىندىك بەرەدى. 

ال، «تازا قازاقستان» باستاماسى اياسىندا ۇيىمداستىرىلعان مۇنداي ەكولوگيالىق شارالار ازاماتتاردى قورشاعان ورتانى قورعاۋعا جۇمىلدىرىپ، ەلدى مەكەندەردىڭ كوركەيۋىنە جانە ەكولوگيالىق جاۋاپكەرشىلىگى جوعارى قوعام قالىپتاستىرۋعا ىقپال ەتەدى.

ەكولوگيالىق اكتسيادان كەيىن سلەتكە قاتىسۋشىلار قىزىلوردا قالاسىنىڭ كورىكتى ورىندارىن ارالادى. 

اتاپ ايتقاندا، ۆولونتەرلەر بوتانيكالىق باقتا بولىپ، وبلىستىق تاريحي-ولكەتانۋ مۋزەيىنىڭ ەكسپوزيتسيالارىمەن تانىستى جانە «قايسار ارەنا» ستاديونىن تاماشالادى. 

تانىمدىق ەكسكۋرسيا قاتىسۋشىلارعا سىر ءوڭىرىنىڭ تابيعي جانە مادەني مۇراسىمەن تانىسىپ، قالانىڭ ساۋلەتتىك كەلبەتى مەن زاماناۋي ينفراقۇرىلىمىن كورۋگە مۇمكىندىك بەردى.