قاراعاندى وبلىسى كومىر، تەمىر-مارگانەتس پەن پوليمەتالل كەندەرىنىڭ جانە باسقا دا پايدالى قازبالاردىڭ مول قورى شوعىرلانعان قازاقستانداعى مينەرالدىق-شيكىزاتتىڭ ءىرى ءوڭىرى بولىپ سانالادى. وبلىستا 604 جەر قويناۋىن پايدالانۋشى جۇمىس ىستەپ كەلەدى. ونىڭ ىشىندە «قازاقمىس» جانە Qarmet بار. تاۋ-كەن ءوندىرۋ مەن وڭدەۋ سالالارىندا 113 مىڭ ادام نەمەسە وبلىستا جۇمىس ىستەيتىن حالىقتىڭ 20% استامى جۇمىلدىرىلعان. وسى جىلدىڭ 10 ايىندا ءوڭىر كاسىپورىندارىنان تۇسەتىن سالىق تۇسىمدەرى 507 ملرد تەڭگەدەن ارتتى. 

قارجى ءمينيسترى ءمادي تاكيەۆ پەن قاراعاندى وبلىسىنىڭ اكىمى ەرماعانبەت بولەكپاەۆ ءۇش ءوڭىردىڭ (قاراعاندى، پاۆلودار جانە اقمولا وبلىستارى) كاسىپكەرلەرىنە جاڭا سالىق كودەكسى سالىق قىزمەتىندەگى اكىمشىلەندىرۋدى جەڭىلدەتۋ ەسەبىنەن بيزنەسكە قولداۋ كورسەتۋگە باعىتتالعانىن ايتتى.

اتاپ ايتقاندا، جاڭا سالىق كودەكسىندە ماڭىزدى فيسكالدى كىرىسى جوق تولەمدەردى الىپ تاستاۋ قاراستىرىلعان.

 «مەملەكەت باسشىسى قازاقستان حالقىنا جولداۋىندا ۇكىمەتكە بيزنەستى جۇرگىزۋگە جاعدايدى جاقسارتۋدى تاپسىرعان بولاتىن. جاڭا سالىق كودەكسىندە بىرىڭعاي جەر سالىعىن جەكە تابىس سالىعىنا اۋىستىرۋ ۇسىنىلىپ وتىر. ايتالىق، 3 تولەمدى بىرىكتىرۋ ۇسىنىلعان: سۋ رەسۋرستارى مەن ورماندى پايدالانۋ، سونداي-اق جانۋارلار الەمىن پايدالانۋ ءۇشىن. تۇتاستاي العاندا، تولەم مولشەرلەمەلەرىنىڭ كولەمى 77-گە قىسقارادى. الىمداردىڭ 6 ءتۇرىن قىسقارتۋ ۇسىنىلىپ وتىر. ولار بويىنشا مولشەرلەمەلەردىڭ 34 ءتۇرى الىنىپ تاستالادى. سونداي-اق مەملەكەتتىك باجداردىڭ 5 ءتۇرى الىنىپ تاستالادى، ولار بويىنشا مولشەرلەمەلەر 51-گە قىسقارتىلادى»، - دەدى ءمادي تاكيەۆ.

سالىق تولەۋشىلەردىڭ بارلىق ساناتى ءۇشىن سۋبەكتيۆتىلىك مولشەرىنە قاراماستان ينۆەستيتسيالارعا «بالاما» ىنتالاندىرۋلار بەرىلەتىن بولادى.

عيماراتتاردى، قۇرىلىستاردى، ماشينالاردى، جابدىقتاردى، باعدارلامالىق قامتاماسىز ەتۋدى ساتىپ الۋ/سالۋ شىعىندارىن ونىڭ فۋنكتسيونالدى ماقساتىنا بايلانىستىرماي بىرجولعى 100% شەگەرۋ تۇرىندە ينۆەستيتسيالىق سالىق پرەفەرەنتسيالارى ۇسىنىلادى. سونىمەن قاتار جەكە ءوندىرىس ونىمدەرىن ءوندىرۋ جانە ساتۋ ءۇشىن تابىس سالىعىنىڭ تومەندەتىلگەن مولشەرلەمەسى ۇسىنىلادى.

قر ۇەم سالىق جانە كەدەن ساياساتى دەپارتامەنتىنىڭ ديرەكتورى ەرلان ساعىناەۆ جاڭا سالىق كودەكسىنىڭ جوباسى سارقىلىپ جاتقان كەن ورىندارىندا ءوندىرىستى ساقتاپ قالۋعا مۇمكىندىك بەرەتىن شارالاردى قاراستىراتىنىن ايتتى.

«تەحنوگەندى مينەرالدى تۇزىلىمدەردىڭ قۇرامىنان پايدالى قازبالاردى ءوندىرۋ ءۇشىن پقوس تومەندەتىلگەن مولشەرلەمەلەرىن بەلگىلەۋ ۇسىنىلادى. ءبىز بۇل شارالار قارجى كورسەتكىشتەرىن جاقسارتۋ جانە ءوندىرۋ كولەمىن ۇلعايتۋ ەسەبىنەن بيۋدجەتكە قوسىمشا تۇسىمدەردى قامتاماسىز ەتەتىنىنە سەنىمدىمىز»، - دەدى قر ۇەم سالىق جانە كەدەن ساياساتى دەپارتامەنتىنىڭ ديرەكتورى.

كەزدەسۋگە قاتىسۋشىلار اشىق ديالوگ پەن تىعىز بايلانىس تاۋ-كەن سالاسىنىڭ ودان ءارى ورنىقتى ءوسىمى مەن بيۋدجەتكە تۇراقتى تۇسىمدەردى جانە جالپى ەل ەكونوميكاسىن نىعايتۋدى قامتاماسىز ەتەتىن ءتيىمدى شەشىمدەردى تابۋعا مۇمكىندىك بەرەتىنىنە سەنىم ءبىلدىردى.

بيزنەس وكىلدەرىمەن كەزدەسۋدەن كەيىن قارجى ءمينيسترى ەلىمىزدىڭ ەڭ ءىرى بولات جانە تاۋ-كەن كومپانياسى Qarmet تسەحتارىنا ايالدادى.