Qaraǧandy oblysy kömır, temır-marganes pen polimetall kenderınıŋ jäne basqa da paidaly qazbalardyŋ mol qory şoǧyrlanǧan Qazaqstandaǧy mineraldyq-şikızattyŋ ırı öŋırı bolyp sanalady. Oblysta 604 jer qoinauyn paidalanuşy jūmys ıstep keledı. Onyŋ ışınde «Qazaqmys» jäne Qarmet bar. Tau-ken öndıru men öŋdeu salalarynda 113 myŋ adam nemese oblysta jūmys ısteitın halyqtyŋ 20% astamy jūmyldyrylǧan. Osy jyldyŋ 10 aiynda öŋır käsıporyndarynan tüsetın salyq tüsımderı 507 mlrd teŋgeden artty.
Qarjy ministrı Mädi Takiev pen Qaraǧandy oblysynyŋ äkımı Ermaǧanbet Bölekpaev üş öŋırdıŋ (Qaraǧandy, Pavlodar jäne Aqmola oblystary) käsıpkerlerıne jaŋa Salyq kodeksı salyq qyzmetındegı äkımşılendırudı jeŋıldetu esebınen bizneske qoldau körsetuge baǧyttalǧanyn aitty.
Atap aitqanda, jaŋa Salyq kodeksınde maŋyzdy fiskaldy kırısı joq tölemderdı alyp tastau qarastyrylǧan.
«Memleket basşysy Qazaqstan halqyna Joldauynda Ükımetke biznestı jürgızuge jaǧdaidy jaqsartudy tapsyrǧan bolatyn. Jaŋa Salyq kodeksınde bıryŋǧai jer salyǧyn jeke tabys salyǧyna auystyru ūsynylyp otyr. Aitalyq, 3 tölemdı bırıktıru ūsynylǧan: su resurstary men ormandy paidalanu, sondai-aq januarlar älemın paidalanu üşın. Tūtastai alǧanda, tölem mölşerlemelerınıŋ kölemı 77-ge qysqarady. Alymdardyŋ 6 türın qysqartu ūsynylyp otyr. Olar boiynşa mölşerlemelerdıŋ 34 türı alynyp tastalady. Sondai-aq memlekettık bajdardyŋ 5 türı alynyp tastalady, olar boiynşa mölşerlemeler 51-ge qysqartylady», - dedı Mädi Takiev.
Salyq töleuşılerdıŋ barlyq sanaty üşın subektivtılık mölşerıne qaramastan investisiialarǧa «balama» yntalandyrular berıletın bolady.
Ǧimarattardy, qūrylystardy, maşinalardy, jabdyqtardy, baǧdarlamalyq qamtamasyz etudı satyp alu/salu şyǧyndaryn onyŋ funksionaldy maqsatyna bailanystyrmai bırjolǧy 100% şegeru türınde investisiialyq salyq preferensiialary ūsynylady. Sonymen qatar jeke öndırıs önımderın öndıru jäne satu üşın tabys salyǧynyŋ tömendetılgen mölşerlemesı ūsynylady.
QR ŪEM Salyq jäne keden saiasaty departamentınıŋ direktory Erlan Saǧynaev jaŋa Salyq kodeksınıŋ jobasy sarqylyp jatqan ken oryndarynda öndırıstı saqtap qaluǧa mümkındık beretın şaralardy qarastyratynyn aitty.
«Tehnogendı mineraldy tüzılımderdıŋ qūramynan paidaly qazbalardy öndıru üşın PQÖS tömendetılgen mölşerlemelerın belgıleu ūsynylady. Bız būl şaralar qarjy körsetkışterın jaqsartu jäne öndıru kölemın ūlǧaitu esebınen biudjetke qosymşa tüsımderdı qamtamasyz etetınıne senımdımız», - dedı QR ŪEM Salyq jäne keden saiasaty departamentınıŋ direktory.
Kezdesuge qatysuşylar aşyq dialog pen tyǧyz bailanys tau-ken salasynyŋ odan ärı ornyqty ösımı men biudjetke tūraqty tüsımderdı jäne jalpy el ekonomikasyn nyǧaitudy qamtamasyz etetın tiımdı şeşımderdı tabuǧa mümkındık beretınıne senım bıldırdı.
Biznes ökılderımen kezdesuden keiın Qarjy ministrı elımızdıŋ eŋ ırı bolat jäne tau-ken kompaniiasy Qarmet sehtaryna aialdady.
