30 قازان مەن 1 قاراشا ارالىعىندا ءۇندىستاننىڭ بانگالور قالاسىندا بارلىق جاس ساناتتارى بويىنشا شوتوكان كاراتە-دودان الەم چەمپيوناتى ءوتتى. حالىقارالىق دودادا م.ح.دۋلاتي اتىنداعى تاراز ۋنيۆەرسيتەتىنىڭ ستۋدەنتتەرى گۇلجانات قوبلاندى مەن ءمادينا مۇرات جوعارى ناتيجە كورسەتىپ، التىن مەدال يەلەندى.

الەمنىڭ ۇزدىك سپورتشىلارى باق سىناعان چەمپيوناتتا قازاقستاندىق ستۋدەنتتەر ءوز ساناتتارى بويىنشا ءبىرىنشى ورىن الىپ، الەم چەمپيونى اتاندى. وسىلايشا، ولار ەل قورجىنىنا ەكى التىن مەدال سالىپ، قازاقستاننىڭ حالىقارالىق سپورت ارەناسىنداعى جەتىستىكتەرىن تولىقتىردى.

جەڭىمپازدار – م.ح.دۋلاتي اتىنداعى تاراز ۋنيۆەرسيتەتىنىڭ «ءبىلىم سالاسىنداعى دەنە مادەنيەتتىك-سپورتتىق قىزمەت» (6ۆ01421) ءبىلىم بەرۋ باعدارلاماسىنىڭ 2-كۋرس ستۋدەنتتەرى. ولاردىڭ حالىقارالىق جارىستاعى جەتىستىگى جۇيەلى دايىندىقتىڭ، تاباندى ەڭبەكتىڭ جانە كاسىبي سپورتتىق شەبەرلىكتىڭ ناتيجەسى.

«الەم چەمپيوناتىنا قاتىسۋ ءبىز ءۇشىن ۇلكەن جاۋاپكەرشىلىك بولدى. جارىسقا دايىندىق بارىسىندا تەحنيكالىق جانە فيزيكالىق دايارلىعىمىزدى جەتىلدىرۋگە ەرەكشە نازار اۋداردىق. بۇل ناتيجە – جۇيەلى جاتتىعۋ مەن جاتتىقتىرۋشىلارىمىزدىڭ قولداۋىنىڭ جەمىسى. الداعى ۋاقىتتا دا حالىقارالىق جارىستارعا قاتىسىپ، ەلىمىزدىڭ سپورتتىق جەتىستىكتەرىنە ۇلەس قوسۋدى ماقسات ەتەمىز»، – دەدى الەم چەمپيونى ءمادينا مۇرات.

ستۋدەنتتەردىڭ الەمدىك دەڭگەيدەگى جەتىستىگى جوعارى وقۋ ورىندارىندا ءبىلىم بەرۋ مەن سپورتتىق دايارلىقتى ۇشتاستىرۋدىڭ ماڭىزىن كورسەتەدى. سونىمەن قاتار بۇل جەڭىس جاس سپورتشىلاردىڭ الەۋەتىن دامىتۋعا، ستۋدەنتتەر اراسىندا بۇقارالىق سپورتتى كەڭىنەن ناسيحاتتاۋعا جانە جاستاردى سالاۋاتتى ءومىر سالتىنا ىنتالاندىرۋعا ۇلەس قوسادى.

ءباسپاسوز قىزمەتى