دەمالىس كۇندەرى قىزىلوردا وبلىسىنىڭ پوليتسيا قىزمەتكەرلەرى قوعامدىق قاۋىپسىزدىكتى قامتاماسىز ەتۋ، قۇقىق بۇزۋشىلىقتاردىڭ الدىن الۋ جانە جول قوزعالىسى قاۋىپسىزدىگىن ساقتاۋ ماقساتىندا كۇشەيتىلگەن رەجيمدە قىزمەت اتقاردى.

وسىعان بايلانىستى وبلىس اۋماعىنداعى كوشەلەردە، قوعامدىق ورىنداردا، كافە مەن مەيرامحانا اۋماقتارىندا پوليتسيانىڭ كەشەندى كۇشتەرى مەن پاترۋلدىك جاساقتارىنىڭ سانى ارتتىرىلىپ، ازاماتتار كوپ شوعىرلاناتىن ورىنداردا قوعامدىق ءتارتىپتى باقىلاۋ كۇشەيتىلدى.

جۇرگىزىلگەن پروفيلاكتيكالىق ءىس-شارالار بارىسىندا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 132-بابىنىڭ 2-بولىگى جانە 442-بابى بويىنشا زاڭ بۇزۋشىلىقتارعا جول بەرگەن 107 كامەلەتكە تولماعان انىقتالدى. ولاردىڭ زاڭدى وكىلدەرىنە اكىمشىلىك حاتتامالار راسىمدەلدى.

سونىمەن قاتار، اقبتك-ءنىڭ 127-بابى بويىنشا بالالاردى تاربيەلەۋ جانە ولاردىڭ قۇقىقتارى مەن قاۋىپسىزدىگىن قامتاماسىز ەتۋ جونىندەگى مىندەتتەرىن تيىسىنشە ورىنداماعان 10 اتا-اناعا (زاڭدى وكىلگە) قاتىستى اكىمشىلىك حاتتاما تولتىرىلدى.

جول قوزعالىسى قاۋىپسىزدىگىن قامتاماسىز ەتۋ باعىتىندا جۇرگىزىلگەن رەيدتىك جۇمىستار كەزىندە بىرقاتار ورەسكەل قۇقىق بۇزۋشىلىقتاردىڭ جولى كەسىلدى. اتاپ ايتقاندا، ماس كۇيىندە كولىك قۇرالىن باسقارۋعا بايلانىستى – 1, قارسى باعىتقا شىعۋ فاكتىسى بويىنشا – 1, اقبتك-ءنىڭ 612-بابىنىڭ 2-بولىگى بويىنشا – 17, 612-بابىنىڭ 3-بولىگى بويىنشا 1 اكىمشىلىك قۇقىق بۇزۋشىلىق انىقتالدى.

قىزىلوردا وبلىسىنىڭ پوليتسيا دەپارتامەنتى ازاماتتاردى زاڭ تالاپتارىن قاتاڭ ساقتاۋعا، كامەلەتكە تولماعانداردىڭ قاۋىپسىزدىگىنە جاۋاپكەرشىلىكپەن قاراۋعا جانە جول قوزعالىسى ەرەجەلەرىن بۇلجىتپاي ورىنداۋعا شاقىرادى.