قما شىمكەنت قالاسى بويىنشا دەپارتامەنتى ءبىلىم بەرۋ سالاسىنا بولىنگەن بيۋدجەت قاراجاتىن جىمقىرۋ فاكتىسى بويىنشا تەرگەپ-تەكسەرۋدى اياقتادى.

تەرگەۋ امالدارىنا ساي، 2018–2023 جىلدار ارالىعىندا «وڭتۇستىك قازاقستان جوعارى مەديتسينالىق كوللەدجى» جشس مەن «وڭتۇستىك قازاقستان گۋمانيتارلىق-قارجى كوللەدجى» جشس قۇرىلتايشىسى جالعان وقىتۋ سحەماسىن ۇيىمداستىرعان.

قىلمىستىق سحەماعا كوللەدج باسشىلارى، بۋحگالتەرلەر جانە وزگە دە بايلانىسى بار تۇلعالار قاتىسقان.

ازاماتتار وقۋ ورىندارىنا فورمالدى تۇردە قابىلدانعانىمەن، ءىس جۇزىندە ءبىلىم الماعان. بۇل مەملەكەتتىك ءبىلىم بەرۋ تاپسىرىسى جانە كادرلاردى قايتا دايارلاۋ باعدارلامالارى اياسىندا بيۋدجەتتەن قارجى الۋعا مۇمكىندىك بەرگەن.

سحەما جالعان وقۋعا قابىلداۋ جانە جۇمىسقا ورنالاستىرۋ تۋرالى بۇيرىقتاردى راسىمدەۋ، قۇجاتتاردى راستاۋ ءۇشىن ەلەكتروندىق تسيفرلىق قولتاڭبالاردى پايدالانۋ، سونداي-اق ورىندالعان جۇمىستار تۋرالى جالعان اكتىلەر جاساۋ ارقىلى جۇزەگە اسىرىلعان.

سونىمەن قاتار، مەديتسينالىق كوللەدجدىڭ اقىلى بولىمىندە وقىعان ستۋدەنتتەردىڭ ءبىر بولىگى مەملەكەت ەسەبىنەن ءبىلىم الۋشىلار رەتىندە راسىمدەلگەنى انىقتالدى.

بۇدان بولەك، «وڭتۇستىك قازاقستان گۋمانيتارلىق-قارجى كوللەدجى» ءىس جۇزىندە جۇمىس ىستەمەگەن جانە تەك بيۋدجەت قاراجاتىن الۋ ءۇشىن فورمالدى قۇرىلىم رەتىندە پايدالانىلعان.

مەملەكەتكە كەلتىرىلگەن جالپى زالال 1,3 ملرد تەڭگەدەن استى.

ءبىر قىزىعى، سحەمانى ۇيىمداستىرۋشى بۇعان دەيىن جاساعان جىمقىرۋ فاكتىسى ءۇشىن سوڭعى ءۇش جىل بويى باس بوستاندىعىنان ايىرۋ ورىندارىندا بولا تۇرا، زاڭسىز ارەكەتتەردى سول جەردەن باسقارعان.

تەرگەۋ بارىسىندا كۇدىكتىلەر 65 ملن تەڭگە كولەمىندەگى زالالدى ەرىكتى تۇردە وتەگەن.

سوت سانكتسياسىمەن 3 پاتەرگە، ونىڭ ىشىندە دۋباي قالاسىنداعى پاتەرگە، 3 تۇرعىن ۇيگە جانە 3 اۆتوكولىككە تىيىم سالىندى.

ەكى كۇدىكتىگە قاتىستى قاماۋدا ۇستاۋ تۇرىندەگى بۇلتارتپاۋ شاراسى، تاعى ءۇش تۇلعاعا قاتىستى ەشقايدا كەتپەۋ جانە ءتيىستى مىنەز-قۇلىق تۋرالى قولحات تۇرىندەگى بۇلتارتپاۋ شاراسى قولدانىلدى.

قىلمىستىق ءىس سوتقا جولداندى.

قازاقستان رەسپۋبليكاسى قپك-ءنىڭ 201-بابىنا سايكەس وزگە اقپارات جاريالاۋعا جاتپايدى.

قر قما ءباسپاسوز قىزمەتى