بۇگىن قىزىلوردا وبلىسىنىڭ اكىمى مۇرات ەرگەشباەۆ، قالا اكىمى نۇرجان احاتوۆ، وبلىستىق ارداگەرلەر كەڭەسىنىڭ توراعاسى سەرىك دۇيسەنباەۆ 1 قازان – حالىقارالىق قارتتار كۇنىنە وراي №1 قىزىلوردا ارناۋلى الەۋمەتتىك قىزمەتتەر كورسەتۋ ورتالىعىنا بارىپ، قارتتاردى مەرەكەمەن قۇتتىقتادى.

«قازاق حالقى ءۇشىن ۇلكەندى سىيلاۋ، قارتتىقتى قادىرلەۋ – عاسىردان عاسىرعا جالعاسىپ كەلە جاتقان وزىق ءداستۇر.

بۇل – وسكەلەڭ ۇرپاق ءۇشىن ولشەۋسىز رۋحاني قازىنا. سوندىقتان قازىنالى قاريالارىمىزدى قۇرمەتتەۋ – ءاربىرىمىزدىڭ ازاماتتىق پارىزىمىز. ايماق ارداگەرلەرىن الەۋمەتتىك قولداۋ – مەنىڭ نازارىمداعى باستى ماسەلە. سىزدەرگە كورسەتىلەتىن قامقورلىق ءارى قاراي دا جالعاسا بەرەدى.

ءبىز سىزدەرگە قولايلى جاعداي جاساپ، قىزمەت كورسەتۋگە قاشان دا دايىنبىز. بارشاڭىزعا مىقتى دەنساۋلىق، اماندىق تىلەيمىن!»، – دەدى مۇرات نالقوجاۇلى.

ايماق باسشىسى ورتالىق عيماراتىنىڭ الدىنداعى كيىز ۇيدە ۇيىمداستىرىلعان كورمەمەن تانىستى. كورمەگە قىزمەت الۋشىلاردىڭ ءوز قولىمەن جاساعان ۇلتتىق ناقىشتاعى ءتۇرلى بۇيىمدارى قويىلعان.

بۇگىندە وڭىردە 90 مىڭعا جۋىق قارت تۇرادى. ونىڭ 2 مىڭنان استامى ارناۋلى الەۋمەتتىك قىزمەتپەن قامتىلعان. №1 قىزىلوردا ارناۋلى الەۋمەتتىك قىزمەتتەر كورسەتۋ ورتالىعىنا بيىل 843,8 ملن تەڭگە قارجى ءبولىندى. 

ورتالىق زاماناۋي تالاپتارعا ساي جابدىقتالىپ، قىزمەت الۋشىلاردىڭ دەنساۋلىعىن جاقسارتۋ، وڭالتۋ ءۇشىن قولايلى جاعداي جاسالدى. ماتەريالدىق-تەحنيكالىق بازانى تولىقتىرۋ ءالى دە جالعاسادى.

سونىمەن قاتار تالسۋات ەلدى مەكەنىندەگى 150 ورىنعا ارنالعان وڭالتۋ ورتالىعىندا، قىزىلوردا قالاسىنداعى 50 ورىندىق جارتىلاي ستاتسيوناردا زەينەتكەرلەرگە ارناۋلى الەۋمەتتىك قىزمەت كورسەتىلەدى.

@قىزىلوردا وبلىسى اكىمىنىڭ ءباسپاسوز قىزمەتى