بۇگىن وبلىس اكىمى نۇرلىبەك نالىباەۆتىڭ قاتىسۋىمەن قىزىلورداداعى قايتا سالىنعان پرەزيدەنت پاركىنىڭ سالتاناتتى اشىلۋ ءراسىمى ءوتتى. راسىمگە قۇقىق قورعاۋ ورگاندارىنىڭ ءبىرىنشى باسشىلارى، ءماسليحات دەپۋتاتتارى، زيالى قاۋىم وكىلدەرى، بارلىق اۋداننان كەلگەن دەلەگاتتار ارنايى قاتىستى.

ايماق باسشىسى قالا تۇرعىندارىن ساياباقتىڭ اشىلۋىمەن قۇتتىقتاپ، وڭىردە «تازا قازاقستان» جالپىۇلتتىق جوباسى اياسىندا اتقارىلعان جۇمىستاردى اتاپ ءوتتى. «پرەزيدەنتىمىز قاسىم-جومارت كەمەلۇلى: «تۋعان جەرىمىزدى ەشكىم سىرتتان كەلىپ تازالاپ، كوركەيتىپ بەرمەيدى. وتانىمىزدى تازا ۇستاۋ – ءار ازاماتتىڭ قاستەرلى پارىزى»، – دەگەن بولاتىن.

«تازا قازاقستان» جالپىۇلتتىق جوباسى تۇرعىندار اراسىندا تازالىق مادەنيەتىن كەڭىنەن ناسيحاتتاۋعا، تۋعان جەرىمىزدى كوركەيتۋگە تىڭ سەرپىن بەردى. جوبا اياسىندا سانيتارلىق تازالىق، اباتتاندىرۋ، تۇرعىنداردىڭ ءومىر سۇرۋىنە قولايلى جاعداي جاساۋدا كەشەندى جۇمىستار اتقارىلۋدا. بيۋدجەت قاراجاتىنان بولەك، كاسىپكەرلەردىڭ دەمەۋشىلىگىمەن ورتالىق الاڭدار، دەمالىس ورىندارى، ويىن، سپورت الاڭدارى قايتا جاڭعىرتىلىپ، تۇرعىن ۇيلەر مەن الەۋمەتتىك نىساندار زاماناۋي ۇلگىدە جوندەۋدەن وتكىزىلىپ كەلەدى.

وڭىرىمىزدە بىركەلكى ديزاين كود بەكىتىلىپ، وبلىس ورتالىعىنان باستاپ بارلىق ەلدى مەكەندەر بىرەگەي ارحيتەكتۋرالىق تالاپتارعا سايكەستەندىرىلدى. قىزىلوردا قالاسىندا 2 ملرد. 905 ملن.تەڭگەگە 83 ەسكى كوپقاباتتى تۇرعىن ءۇيدىڭ قاسبەتتەرى زاماناۋي پانەلدەرمەن قاپتالدى. بيىل دا بۇل جۇمىس جالعاسىن تاۋىپ، 900 ملن. تەڭگەگە قوسىمشا 21 تۇرعىن ءۇي جاڭعىرتىلۋدا. وتكەن جىلى 1 ملرد. 300 ملن. تەڭگەگە 20 كوپقاباتتى تۇرعىن ءۇيدىڭ اۋلالارىنا بالالار ويىن، سپورت الاڭدارى سالىنىپ اباتتاندىرىلدى.

وبلىس ورتالىعىندا جاڭا نىساندار بوي كوتەرىپ، جاسىل جەلەك پەن ساياباقتار سانى كوبەيىپ، وزىق ساۋلەت ۇلگىسى قالىپتاسۋدا. وسكەلەڭ ۇرپاق ءۇشىن تازا، جايلى ءارى قاۋىپسىز ورتا قۇرۋ الداعى ۋاقىتتا دا جالعاسادى. «تازا قازاقستان» جالپىۇلتتىق جوباسى اياسىنداعى اكتسيالارعا، تابيعات قورعاۋ شارالارىنا جاستار مەن قوعام بەلسەندىلەرى قاتىسىپ، ۇلەس قوسۋدا.

ساياباقتى ساپالى ەتىپ قايتا سالعان «الەم قۇرىلىس» كومپانياسىنىڭ ۇجىمىنا سىر جۇرتشىلىعىنىڭ، ءوزىمنىڭ اتىمنان شىنايى العىسىمدى بىلدىرەمىن! ەگەمەن ەلىمىزدى كوركەيتۋ جولىنداعى ىستەرىمىز تابىستى بولسىن!» – دەدى ايماق باسشىسى.

ايتا كەتۋ كەرەك، جاڭا ساياباق اۋماعىنا زاماناۋي سۋبۇرقاقتار، امفيتەاتر، سپورت، ويىن، بي، شاحمات، باسكەتبول، فۋتبول الاڭدارى، بيىكتىگى 50 مەترلىك اينالمالى شولۋ دوڭگەلەگى، ۆەلوسيپەد جانە جۇگىرۋ جولاقتارى، سانيتارلىق پۋنكتتەر ورناتىلعان. جالپى 31 گەكتارعا 2 مىڭنان استام اعاش، 50 مىڭنان استام ساندىك بۇتا جانە 17 ءتۇرلى كوپجىلدىق گۇل ەگىلدى.

ساياباق اۋماعىن ءتيىمدى پايدالانۋ ماقساتىندا بىرقاتار ءىرى جوبا قولعا الىنعان. اتاپ ايتقاندا، 6 گەكتار جەرگە 300 ورىندىق زاماناۋي بالالار لاگەرى، 2,4 گەكتارعا بوتانيكالىق ءبىلىم بەرۋ ورتالىعى، 8,2 گەكتارعا توعىز قاباتتى 15 تۇرعىن ءۇي سالىنۋدا. بۇدان بولەك، 200 توسەكتىك جاڭا پەريناتالدىق ورتالىق قۇرىلىسى قارقىن الدى. جاقىن كۇندەرى 5,5 گەكتار اۋماقتا جاڭا دراما تەاتر مەن زاماناۋي پرەزيدەنتتىك كىتاپحانا قۇرىلىسى باستالادى.

راسىمدە پرەزيدەنت پاركىندەگى جۇمىستاردى ساپالى اتقارعان مەردىگەر مەكەمە وكىلدەرى مەن ەكولوگيالىق اكتسيالارعا بەلسەندى اتسالىسقان ەرىكتىلەر وبلىس اكىمىنىڭ العىس حاتىمەن ماراپاتتالدى. قوعام قايراتكەرى جارىلقاسىن ءشارىپوۆ ىزگى لەبىزىن ءبىلدىردى.

@قىزىلوردا وبلىسى اكىمىنىڭ ءباسپاسوز قىزمەتى