قىزىلوردا وبلىسى پوليتسيا دەپارتامەنتى قازالى اۋدانى پوليتسيا ءبولىمىنىڭ قىزمەتكەرلەرى №249 ە. بوزعۇلوۆ اتىنداعى مەكتەپ-ليتسەيى جانىنان قۇرىلعان "جاس ساقشى" سىنىبىنىڭ وقۋشىلارىمەن ارنايى كەزدەسۋ وتكىزدى. "جاس ساقشى" سىنىبىنىڭ باستى ماقساتى – جاس ۇرپاقتىڭ بويىنا ءتارتىپ پەن جاۋاپكەرشىلىك قاسيەتتەرىن ءسىڭىرىپ، قۇقىقتىق ساۋاتتىلىعىن ارتتىرۋمەن قاتار وتانعا دەگەن سۇيىسپەنشىلىگىن قالىپتاستىرۋ. تاعىلىمدى شارا بارىسىندا ءتارتىپ ساقشىلارى جاسوسپىرىمدەرمەن ەركىن پىكىر الماسىپ، قۇقىق قورعاۋ سالاسىنىڭ قىر-سىرىمەن ءبولىستى. وقۋشىلارعا قوعامدىق ءتارتىپتى ساقتاۋ، زاڭ تالاپتارىن قۇرمەتتەۋ، قۇقىق بۇزۋشىلىقتىڭ الدىن الۋ جانە قاۋىپسىزدىك ەرەجەلەرىن قاتاڭ ۇستانۋدىڭ ماڭىزى جان-جاقتى ايتىلدى. سونىمەن قاتار ءىس-شارا اياسىندا وقۋشىلارعا "ادال ازامات – زەردەلى ۇلت قالىپتاسۋىنىڭ نەگىزى" تاقىرىبىندا ساباق وتكىزىلىپ، ادالدىق، جاۋاپكەرشىلىك، ءتارتىپ پەن ازاماتتىق ۇستانىمنىڭ ماڭىزى كەڭىنەن ءسوز بولدى. جاسوسپىرىمدەرگە ەل بولاشاعىنىڭ بەرىك ىرگەتاسى – ءبىلىمدى، سانالى ءارى ادال ۇرپاق ەكەنى ايتىلىپ، ءار ازاماتتىڭ قوعام الدىنداعى جاۋاپكەرشىلىگى ءتۇسىندىرىلدى. وقۋشىلار پوليتسيا قىزمەتكەرلەرىنە وزدەرىن قىزىقتىرعان سۇراقتارىن قويىپ، ماماندىقتىڭ ەرەكشەلىكتەرى تۋرالى كەڭىنەن ماعلۇمات الدى. وسىنداي تاعىلىمدى كەزدەسۋلەر وسكەلەڭ ۇرپاقتىڭ قۇقىقتىق مادەنيەتىن قالىپتاستىرىپ قانا قويماي، ولاردىڭ بولاشاق ماماندىعىنا دەگەن قىزىعۋشىلىعىن ارتتىرۋعا دا ىقپال ەتەدى.

اقپارات كوزى Polisia.kz سايتىندا: https://polisia.kz/qyzylordada-politsejler-zhas-saqshy-synybynyng-oqushylarymen-taghylymdy-kezdesu-otkizdi/