قىزىلوردادا وبلىس اكىمى نۇرلىبەك نالىباەۆ، دەنساۋلىق ساقتاۋ ءمينيسترى اقمارال ءالنازاروۆا، سىرتقى ىستەر ءمينيسترىنىڭ ورىنباسارى الىبەك قۋانتىروۆ، پارلامەنت ءماجىلىسىنىڭ دەپۋتاتتارى مۇرات ابەنوۆ، مارحابات جايىمبەتوۆ، مۇرات ەرگەشباەۆ، قۇقىق قورعاۋ ورگاندارىنىڭ ءبىرىنشى باسشىلارى، وبلىستىق ءماسليحات دەپۋتاتتارى، زيالى قاۋىم وكىلدەرى جانە ارداگەرلەردىڭ قاتىسۋىمەن Orhun medical مەديتسينالىق ورتالىعىنىڭ اشىلۋ ءراسىمى ءوتتى.
ايماق باسشىسى ءوز سوزىندە ءوڭىردىڭ دەنساۋلىق ساقتاۋ سالاسىنداعى جەتىستىكتەرگە توقتالدى.
«مەملەكەت باسشىمىز قاسىم-جومارت كەمەلۇلى «ۇلت ساۋلىعى جاقسى بولسا، قوعام ورنىقتى داميدى» دەپ، سالاعا ءاردايىم ايرىقشا كوڭىل ءبولىپ كەلەدى. سىر وڭىرىندە تۇرعىنداردىڭ مەديتسينالىق قىزمەتكە قولجەتىمدىلىگىن ارتتىرۋ، ينفراقۇرىلىمدى ودان ءارى جەتىلدىرۋ شارالارى كەشەندى تۇردە جۇرگىزىلۋدە.
بۇگىن وزدەرىڭىزبەن بىرگە ءوڭىرىمىز ءۇشىن ماڭىزى زور نىسان Orhun Medical مەديتسينالىق ورتالىعىنىڭ اشىلۋىندا باس قوستىق. ورتالىقتىڭ نەگىزگى باعىتى – پوزيتروندى-ەميسسيالىق جانە كومپيۋتەرلىك توموگرافيانى بىرىكتىرەتىن جوعارى تەحنولوگيالىق دياگنوستيكا.
قۇنى 4 ملرد. تەڭگە بولاتىن بۇل جوبا ونكولوگيالىق اۋرۋلاردى ەرتە انىقتاۋعا، دەرتتىڭ تارالۋ دەڭگەيىن باعالاۋعا، ەمدەۋ تيىمدىلىگىن باقىلاۋعا مۇمكىندىك بەرەدى. تۇرعىندارىمىز ەندىگىدە استانا، الماتى قالالارىنا، شەتەلدەرگە بارماي-اق، ساپالى مەديتسينالىق قىزمەتتەردى جەرگىلىكتى جەردە الادى.
ەل يگىلىگىنە تابىستالاتىن مەديتسينالىق ورتالىق دارىگەرلەرى كەلۋشىلەرگە قىزمەت ەتىپ، ناۋقاستىڭ دەرتىنە داۋا، كوڭىلىنە راۋان بەرىپ، حالىقتىڭ ىقىلاسىنا بولەنەدى دەپ سەنەمىز. جاۋاپكەرشىلىگى جوعارى سالادا ۋاقىتپەن ساناسپاي، كۇنى-ءتۇنى جاساعان قىزمەتتەرىڭىز تابىستى، مارتەبەلەرىڭىز بيىك بولعاي!»، – دەدى ن.نالىباەۆ.
اشىلۋ راسىمىندە اقمارال ءالنازاروۆا، الىبەك قۋانتىروۆ ءسوز سويلەپ، سالا ارداگەرى ابدۋللا شۇلەنباەۆ باتا بەردى. ايماقتىڭ دەنساۋلىق ساقتاۋ سالاسىنىڭ دامۋىنا ۇلەس قوسقان ازاماتتار وبلىس اكىمىنىڭ العىس حاتىمەن ماراپاتتالدى.
ايتا كەتەيىك، مەديتسينالىق ورتالىقتىڭ جىلدىق جوبالىق قۋاتى ايتارلىقتاي جوعارى. مۇندا جىلىنا 3 500 پوزيتروندى-ەميسسيالىق جانە كومپيۋتەرلىك توموگرافيا زەرتتەۋى جۇرگىزىلەدى. سونىمەن قاتار، 16 000 ماگنيتتىك-رەزونانستىق توموگرافيا، 20 000 كومپيۋتەرلىك توموگرافيا، 25 000 رەنتگەنولوگيالىق زەرتتەۋ جانە 10 000 مامموگرافيا جاساۋعا مۇمكىندىك بار.
قىزىلوردا قالاسىنداعى ورتالىق – Orhun Medical كومپانياسىنىڭ قازاقستان وڭىرلەرىندە جوعارى تەحنولوگيالىق ونكولوگيالىق كومەكتى دامىتۋعا باعىتتالعان جوباسىنىڭ ەكىنشى كەزەڭى. ۇلىتاۋ، تۇركىستان، اقتوبە تۇرعىندارىنا دا قىزمەت كورسەتەدى. ءبىرىنشى كەزەڭدە اقتاۋ قالاسىندا وسىنداي ورتالىق ىسكە قوسىلعان. زەرتتەۋلەر تەگىن مەديتسينالىق كومەكتىڭ كەپىلدەندىرىلگەن كولەمى اياسىندا جۇرگىزىلەدى.
بۇدان بولەك، مەديتسينالىق ورتالىقتا مرت، كت، رەنتگەنوگرافيا، مامموگرافيا، ۋلترادىبىستىق دياگنوستيكا، بەيىندى مامانداردىڭ كەڭەستەرى، زەرتحانالىق زەرتتەۋلەر جانە ەمشارا بولمەلەرىنىڭ قىزمەتتەرى حالىققا قولجەتىمدى بولادى.
@قىزىلوردا وبلىسى اكىمىنىڭ ءباسپاسوز قىزمەتى
