وعان اباي وبلىسىنىڭ اكىمى بەرىك ءۋالي، پارلامەنت سەناتى مەن ءماجىلىسىنىڭ دەپۋتاتتارى، مەملەكەت جانە قوعام قايراتكەرلەرى، قازاقستاننىڭ ەڭبەك ەرلەرى، عالىمدار، ونەر مايتالماندارى، رەسپۋبليكانىڭ بارلىق وڭىرىنەن كەلگەن وبلىستىق ءماسليحات توراعالارى ارنايى قاتىستى.

ايماق باسشىسى اۋىل شارۋاشىلىعىندا اتقارىلعان جۇمىستارعا، اگروسالانىڭ الداعى باعىت-باعدارىنا توقتالىپ، قامبانى تولتىرىپ، بەرەكە مەن بىرلىكتىڭ ۇلگىسىن كورسەتكەن ديقانداردى قۇتتىقتادى.

«پرەزيدەنتىمىز قاسىم-جومارت كەمەلۇلى 2025 جىلدى «جۇمىسشى ماماندىقتارى جىلى» دەپ جاريالاپ، «ءبىز جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتايمىز! ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى، سىيلى بولۋى كەرەك» دەگەن بولاتىن.

«ادال ادام – ادال ەڭبەك – ادال تابىس» قاعيداتىن ۇرپاق ساناسىنا ءسىڭىرۋ، ناسيحاتتاۋ، قاراپايىم ەڭبەك ادامدارىن دارىپتەۋ – ءبىزدىڭ باستى ماقساتىمىزدىڭ ءبىرى! سىر ەلىنىڭ داڭقىن اسقاقتاتقان دالا اكادەميگى ىبىراي جاقاەۆ باستاعان 102 سوتسياليستىك ەڭبەك ەرىنىڭ جانە تاۋەلسىزدىك جىلدارىنداعى قازاقستاننىڭ ەڭبەك ەرلەرىنىڭ جەتىستىكتەرى اڭىزعا اينالدى. سانالى عۇمىرىندا تۋعان جەرىمىز ءۇشىن ايانباي ەڭبەك ەتكەن ارداقتى ارداگەر اعالارىمىز بۇگىن ورتامىزدا. وبلىسىمىزدىڭ دامۋىنا قوسقان وراسان زور ۇلەستەرىڭىز ءۇشىن سىزدەرگە بارشا سىر جۇرتشىلىعىنىڭ اتىنان شىنايى العىسىمدى بىلدىرەمىن. ەل ءۇشىن جاساعان ەرەن ەڭبەكتەرىڭىزدىڭ جەمىسىن، بەينەتتەرىڭىزدىڭ زەينەتىن كورىڭىزدەر!»، – دەدى نۇرلىبەك ماشبەكۇلى.

اباي وبلىسىنىڭ اكىمى بەرىك ءۋالي سىر ەلىنىڭ ەڭبەكقور جۇرتىنا ريزاشىلىعىن ءبىلدىرىپ، ەكى ءوڭىر اراسىنداعى بايلانىستىڭ ودان ءارى نىعايا تۇسەتىنىنە سەنىم ءبىلدىردى.

«قازاق حالقى تاعدىرىنىڭ تايعاق كەشۋلى كەزەڭدەرىندە جاعاسىنا كەلىپ تىنىس تاپقان، سۋىنا بەتىن جۋىپ، ءۇمىتىن ەرتەڭگە جالعاعان قاسيەتتى سىرداريانىڭ بويىندا، ەجەلگى اقمەشىت، بۇگىنگى قىزىلوردا تورىندە وزدەرىڭىزبەن جۇزدەسىپ وتىرعانىما بەك قۋانىشتىمىن!

ءبىز بۇگىن ايماقتارىڭىزعا ۇلكەن دەلەگاتسيامەن ونەر جۇلدىزدارىن، زيالى قاۋىم وكىلدەرىن جانە جاقىندا عانا رەسپۋبليكالىق بايقاۋدا باس جۇلدە العان تەاترىمىزدىڭ ارنايى قويىلىمىمەن كەلىپ وتىرمىز. بۇل وڭىرارالىق رۋحاني-مادەني بايلانىستاردى نىعايتىپ، ءبىزدى باۋىرلاستىرا تۇسەدى دەپ سەنەمىز»، – دەدى بەرىك ءۋاليۇلى.

مەرەكەلىك شارادا قىزىلوردا وبلىسىنىڭ الەۋمەتتىك-ەكونوميكالىق دامۋىنا ەلەۋلى ۇلەس قوسقان ازاماتتار ماراپاتتالدى. «جان اراي» جاۋاپكەرشىلىگى شەكتەۋلى سەرىكتەستىگىنىڭ ديرەكتورى باقداۋلەت ماحاشوۆقا «قىزىلوردا وبلىسىنىڭ قۇرمەتتى ازاماتى» اتاعى بەرىلدى. ول باسقاراتىن سەرىكتەستىك تاۋلىگىنە 80 توننا قۇراما جەم ءوندىرۋ، كۇرىش وڭدەۋ زاۋىتتارىن ىسكە قوسقان، ونىمدەرىن ەكسپورتقا شىعارادى. وتكەن جىلى 4 مىڭ توننالىق كوكونىس ساقتاۋ قويماسىن اشىپ، 100-دەن استام ادامدى تۇراقتى جۇمىسپەن قامتىدى.

ەڭبەك ادامدارى مەن سالا ۇزدىكتەرىنە «قىزىلوردا وبلىسىنىڭ دامۋىنا قوسقان ۇلەسى ءۇشىن»، اۋىل شارۋاشىلىعى مينيسترلىگىنىڭ «ەڭبەك ارداگەرى» مەدالدارى، «اۋىل شارۋاشىلىعى سالاسىنىڭ ۇزدىگى» توسبەلگىسى، قىزىلوردا وبلىسىنىڭ قۇرمەت گراموتاسى مەن وبلىس اكىمىنىڭ العىس حاتتارى بەرىلدى.

سالتاناتتى شارادا اۋىل شارۋاشىلىعى سالاسىندا ۇزدىك جەتىستىكتەرگە جەتكەن وزات اۋداندار انىقتالىپ، «بالىق شارۋاشىلىعى سالاسى بويىنشا وزات اۋدان» نوميناتسياسىمەن ارال اۋدانى، «سۋ ۇنەمدەۋ تەحنولوگياسىن قولدانۋ بويىنشا وزات اۋدان» نوميناتسياسىمەن جاڭاقورعان اۋدانى، «اۋىل شارۋاشىلىعى سالاسىنا ينۆەستيتسيا تارتۋ بويىنشا وزات اۋدان» نوميناتسياسىمەن جالاعاش اۋدانى، «مال شارۋاشىلىعى سالاسى بويىنشا وزات اۋدان» نوميناتسياسىمەن قارماقشى اۋدانى، «اۋىل شارۋاشىلىعى ونىمدەرىن وڭدەۋ سالاسى بويىنشا وزات اۋدان» نوميناتسياسىمەن قازالى اۋدانى، «ەگىن شارۋاشىلىعى سالاسى بويىنشا وزات اۋدان» نوميناتسياسىمەن سىرداريا اۋدانى ماراپاتتالادى.

ال «اگروونەركاسىپ كەشەنىن دامىتۋدا بيىلعى جىلى ەڭ جوعارعى كورسەتكىشتەرگە قول جەتكىزگەن ۇزدىك اۋدان» نوميناتسياسىن شيەلى اۋدانى جەڭىپ الدى.

جىلداعى ءداستۇر بويىنشا جوعارى كورسەتكىشتەرگە قول جەتكىزگەن «ابزال جانە ك» تس، «ماعجان جانە ك»، «اباي-داۋلەت» جشس ەڭبەك وزاتتارىنا اۆتوكولىك كىلتتەرى سىيعا بەرىلدى.

@قىزىلوردا وبلىسى اكىمىنىڭ ءباسپاسوز قىزمەتى