بۇگىن «دوستىق ۇيىندە» 5 قىركۇيەك – قازاقستان حالقى تىلدەرى كۇنىنە وراي قىزىلوردا وبلىسىندا مەملەكەتتىك ءتىلدىڭ مارتەبەسىن ارتتىرۋ، ءتىل مادەنيەتىن قالىپتاستىرۋ جانە قازاق ءتىلىنىڭ زاماناۋي كەڭىستىكتەگى قولدانىسىن كەڭەيتۋ ماسەلەلەرىنە ارنالعان «ءتىل. بىرلىك. بولاشاق.» اتتى وبلىستىق فورۋم ءوتتى

فورۋمنىڭ نەگىزگى ماقساتى – مەملەكەتتىك ءتىلدىڭ قوعامدىق ومىردەگى قولدانىس اياسىن كەڭەيتۋ، ءتىل مادەنيەتىن جەتىلدىرۋ، وڭىردەگى تىلدىك ورتانى دامىتۋ، سونداي-اق تسيفرلىق تەحنولوگيالار مەن جاساندى ينتەللەكت قارقىندى دامىپ وتىرعان كەزەڭدە قازاق ءتىلىنىڭ جاڭا مۇمكىندىكتەرىن تالقىلاۋ.

فورۋم جۇمىسىنا وبلىس اكىمىنىڭ ورىنباسارى مەيرامبەك شەرماعانبەت، وبلىستىق قوعامدىق دامۋ باسقارماسىنىڭ باسشىسى رۋسلان كايۋپوۆ، زيالى قاۋىم وكىلدەرى، ءتىل جاناشىرلارى مەن ءتىل ماماندارى، مەملەكەتتىك ورگانداردىڭ ءتىل سالاسىنا جاۋاپتى قىزمەتكەرلەرى، ءبىلىم بەرۋ ۇيىمدارىنىڭ باسشىلارى، «حالىقارالىق «قازاق ءتىلى» قوعامى» قوعامدىق بىرلەستىگىنىڭ وكىلدەرى، ەتنومادەني بىرلەستىكتەر، جاستار جانە بۇقارالىق اقپارات قۇرالدارىنىڭ وكىلدەرى قاتىستى.

فورۋمدى اشقان وبلىس اكىمىنىڭ ورىنباسارى مەملەكەتتىك ءتىلدىڭ قوعام ومىرىندەگى ورنىنا توقتالىپ، ءتىل ماسەلەسى تەك ءتىل سالاسىنىڭ ماماندارىنا عانا قاتىستى ەمەس، بارشا قوعامعا ورتاق جاۋاپكەرشىلىك ەكەنىن اتاپ ءوتتى.

- «مەملەكەتتىك ءتىل – حالقىمىزدىڭ رۋحاني تۇتاستىعىن ايقىندايتىن باستى قۇندىلىقتاردىڭ ءبىرى. ونىڭ قولدانىس اياسىن كەڭەيتۋ تەك بەلگىلى ءبىر سالاعا جۇكتەلەتىن مىندەت ەمەس. بۇل – مەملەكەتتىك ورگانداردان باستاپ، ءبىلىم بەرۋ، مادەنيەت، اقپارات، بيزنەس جانە قوعامدىق ورتاعا دەيىنگى بارلىق باعىتتى قامتيتىن ورتاق جۇمىس. ءتىلدىڭ دامۋى – ەڭ الدىمەن ونىڭ قولدانىسىنا بايلانىستى. قازاق تىلىندە ساپالى كونتەنتتىڭ كوبەيۋى، مەملەكەتتىك تىلدەگى قىزمەتتەردىڭ قولجەتىمدى بولۋى، جاستاردىڭ قازاق ءتىلىن زاماناۋي تەحنولوگيالارمەن قاتار مەڭگەرۋى – ءتىلدىڭ ومىرشەڭدىگىن قامتاماسىز ەتەتىن نەگىزگى باعىتتار. اسىرەسە جاساندى ينتەللەكت پەن تسيفرلىق تەحنولوگيالار داۋىرىندە قازاق ءتىلىنىڭ مۇمكىندىگىن كەڭەيتۋگە ەرەكشە نازار اۋدارۋ قاجەت.»، – دەدى مەيرامبەك زينابدينۇلى.

فورۋم بارىسىندا مەملەكەتتىك ءتىلدىڭ مەديا كەڭىستىكتەگى ورنى، ونىڭ جاستار تاربيەسىندەگى ءرولى، تسيفرلىق تەحنولوگيالار مەن جاساندى ينتەللەكت داۋىرىندەگى قازاق ءتىلىنىڭ دامۋ مۇمكىندىكتەرى كەڭىنەن تالقىلاندى.

حالىقارالىق «قازاق ءتىلى» قوعامى» قوعامدىق بىرلەستىگىنىڭ قىزىلوردا وبلىستىق فيليالىنىڭ توراعاسى ابايبەك ءجۇنىسوۆ مەملەكەتتىك ءتىلدىڭ قولدانىس اياسىن كەڭەيتۋ باعىتىنداعى قوعامدىق باستامالار مەن اتقارىلىپ جاتقان جۇمىستار تۋرالى وي-پىكىرىن ورتاعا سالدى.

سونىمەن قاتار، وبلىستىق «سىر بويى» گازەتىنىڭ باس رەداكتورى قۋات شارابيدينوۆ مەملەكەتتىك ءتىلدىڭ بۇقارالىق اقپارات قۇرالدارىنداعى قولدانىسى مەن مەديا كەڭىستىكتەگى ءتىل مادەنيەتىنە توقتالسا، م.مامەتوۆا اتىنداعى قىزىلوردا پەداگوگيكالىق جوعارى كوللەدجىنىڭ ديرەكتورى جاقسىگۇل توعانوۆا جاستارعا ءتىل ۇيرەتۋ، ءبىلىم بەرۋ ۇدەرىسىندە مەملەكەتتىك ءتىلدىڭ بەدەلى تۋرالى ايتتى 

سونداي-اق، قورقىت اتا اتىنداعى قىزىلوردا ۋنيۆەرسيتەتىنىڭ جاساندى ينتەللەكت ينستيتۋتىنىڭ ديرەكتورى نۇرلان قۇلمىرزاەۆ جاساندى ينتەللەكت تەحنولوگيالارىن دامىتۋ جاعدايىنداعى قازاق ءتىلىنىڭ مۇمكىندىكتەرى جونىندە بايانداما جاسادى. 

فورۋم سوڭىندا مەملەكەتتىك ءتىلدىڭ دامۋىنا، ونىڭ قوعامدىق ورتاداعى قولدانىسىن كەڭەيتۋگە جانە ءتىل مادەنيەتىن قالىپتاستىرۋعا ۇلەس قوسىپ جۇرگەن بىرقاتار ازاماتتارعا قازاقستان رەسپۋبليكاسى عىلىم جانە جوعارى ءبىلىم ءمينيسترىنىڭ «قۇرمەت» گراموتاسى مەن «العىس حاتى»، سونداي-اق وبلىس اكىمىنىڭ «العىس حاتى» تابىستالدى.

سونىمەن قاتار قازاق ءتىلىن دامىتۋ باعىتىنداعى ەڭبەگى مەن جەتىستىكتەرى ءۇشىن ءتۇرلى سالاداعى ۇزدىك ۇيىمدارعا ارنايى نوميناتسيالار تابىستالدى. اتاپ ايتقاندا، «كورىكتى جارناما – كوركەم اتاۋ»، «ۇزدىك قازاقتىلدى تاسىمالداۋ قىزمەتىن كورسەتۋ مەكەمەسى»، «ۇزدىك قازاقتىلدى مەديتسينالىق قىزمەت كورسەتۋ مەكەمەسى»، «ۇزدىك قازاقتىلدى بايلانىس قىزمەتىن كورسەتۋشى مەكەمە»، «ۇزدىك قازاقتىلدى كوممۋنالدىق قىزمەت كورسەتۋ ۇيىمى» نوميناتسيالارى بويىنشا جەڭىمپازدار انىقتالدى.

نوميناتسيا جەڭىمپازدارىنا ارنايى ديپلومدار مەن قارجىلاي سىيلىقتار تابىستالدى.