بۇگىن قىزىلوردا وبلىسىنىڭ اكىمى نۇرلىبەك نالىباەۆ «انا مەن بالا» وبلىستىق پەريناتالدىق ورتالىعىنداعى جاس انالار مەن مەديتسينا قىزمەتكەرلەرىن حالىقارالىق ايەلدەر كۇنىمەن قۇتتىقتادى.

«حالقىمىزدا «اتا ۇلدى، انا ۇلتتى تاربيەلەيدى» دەگەن دانالىق ءسوز بار. انانىڭ اق سۇتىمەن دارىعان مەيىرىم مەن مەيمان كوڭىل –ۇلت رۋحىنىڭ وزەگى، ەلدىكتىڭ تىرەگى. اياۋلى جاننىڭ جۇرەگىنەن باستاۋ العان ىزگىلىك قوعامدى ىزگىلەندىرىپ، ادامزاتتى بيىك مۇراتتارعا جەتەلەيدى.

انا – تىرشىلىكتىڭ شۋاعى، ءومىردىڭ تۇتقاسى. ونىڭ ءبىر اۋىز جىلى ءسوزى – جانعا داۋا، جانارى – بالاعا باعدار، الاقانى تيگەن جەرگە بەرەكە قونادى، باتاسى دارىعان ۇرپاقتىڭ باعى جانادى.

ادامزات بالاسى ءۇشىن انادان قۇدىرەتتى، انادان ارداقتى، انادان اياۋلى جان جوق. سوندىقتان دا انانى ارداقتاۋ– ادامدىقتىڭ اسىل ولشەمى، انانى قۇرمەتتەۋ – پەرزەنتتىك پارىز. الەمدەگى ەڭ جوعارى ماداق تا، قۇرمەت تە ارۋ-انالارعا ارنالادى. ەرىنە ادال جار، بالاسىنا ارداقتى انا بولۋىمەن ۇرپاققا ونەگە، وتباسىنا ۇيىتقى بولعان انالارىمىزعا قۇرمەتىمىز قاشاندا شەكسىز!

سىزدەر – مەيىرىم مەن ماحابباتتىڭ، سابىر مەن ءتوزىمنىڭ سيمۆولىسىزدار. دۇنيەگە ءسابي اكەلۋ – ۇلكەن ەرلىك، ۇلى جاۋاپكەرشىلىك. ءسابيدىڭ شات كۇلكىسى مەن الاڭسىز بالالىعى – ەڭ الدىمەن انانىڭ اق جۇرەگى مەن ادال ەڭبەگىنىڭ جەمىسى. سىزدەردىڭ ارقايسىلارىڭىزعا زور دەنساۋلىق، وتباسىلارىڭىزعا اماندىق، سابيلەرىڭىزگە جارقىن بولاشاق تىلەيمىن»،– دەدى نۇرلىبەك ماشبەكۇلى.

باسقوسۋدا مەرەكە قارساڭىندا ءسابيلى بولعان انالار مەن مەديتسينا قىزمەتكەرلەرى وبلىس اكىمىنىڭ العىس حاتىمەن ماراپاتتالدى.

بۇگىندە وبلىس ورتالىعىندا 36 ملرد 400 ملن تەڭگەگە ءبىر اۋىسىمدا 100 كەلۋشىگە ارنالعان ەمحاناسى جانە ونكولوگيالىق بولىمشەسى بار 300 ورىندىق كوپبەيىندى اۋرۋحانانىڭ قۇرىلىسى قارقىندى جۇرگىزىلۋدە. نىساندى جىل سوڭىنا دەيىن پايدالانۋعا بەرۋ جوسپارلانعان.

سونىمەن قاتار 45 ملرد 800 ملن تەڭگەگە 200 توسەك-ورىنعا ارنالعان جاڭا پەريناتالدىق ورتالىقتىڭ، 14 ملرد 700 ملن تەڭگەگە 500 كەلۋشىگە ارنالعان ەمحانانىڭ جانە 9 ملرد 800 ملن تەڭگەگە تيتوۆ كەنتىندە اۋىسىمىنا 400 كەلۋشىگە ارنالعان №5 قالالىق ەمحانانىڭ قۇرىلىستارى باستالدى.

قىزىلوردا وبلىسى اكىمىنىڭ ءباسپاسوز قىزمەتى