قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ Roca Group ديرەكتورلار كەڭەسىنىڭ توراعاسى سانتياگو دە گومار روكامەن كەزدەسىپ، قىزىلوردا وبلىسىندا سانتەحنيكالىق زاۋىت سالۋ جوباسىن جۇزەگە اسىرۋ، ينۆەستيتسيالىق ىنتىماقتاستىقتى ودان ءارى نىعايتۋ پەرسپەكتيۆالارىن تالقىلادى. كەزدەسۋگە وبلىس اكىمى نۇرلىبەك نالىباەۆ تا قاتىستى. 

ۇكىمەت باسشىسى ونەركاسىپتىك ءوندىرىستى لوكاليزاتسيالاۋ ەكونوميكانى قۇرىلىمدىق نىعايتۋداعى باسىم مىندەت ەكەنىن اتاپ ءوتتى. وسىعان بايلانىستى قازاقستان قولايلى ينۆەستيتسيالىق احۋال قالىپتاستىرۋ بويىنشا بەلسەندى جۇمىس جۇرگىزۋدە. 

"قازاقستان پرەزيدەنتى قاسىم-جومارت توقاەۆتىڭ ەكونوميكالىق تۇراقتىلىقتى قامتاماسىز ەتۋدەگى باسىم باعىتى اياسىندا وتاندىق ءوندىرىستى قولداۋعا جانە سىرتقى جەتكىزىلىمدەرگە تاۋەلدىلىكتى ازايتۋعا باعىتتالعان يمپورتتى الماستىرۋ ساياساتى بەلسەندى دامىپ كەلەدى. قازاقستان مەن يسپانيا - ستراتەگيالىق سەرىكتەستەر. سوندىقتان ءبىز كومپانيانى سەنىمدى سەرىكتەس رەتىندە كورەمىز جانە يندۋستريالىق دامۋ ءۇشىن جوعارى تەحنولوگيالىق ءوندىرىس تارتۋدى قۇپتايمىز. ۇكىمەت جوبانىڭ ءساتتى جۇزەگە اسۋى ءۇشىن قاجەتتى كومەك كورسەتەدى", - دەپ اتاپ ءوتتى ولجاس بەكتەنوۆ.

جىلىنا 500 مىڭ بۇيىمعا دەيىن سانيتارلىق-تەحنيكالىق ونىمدەر شىعاراتىن جوعارى تەحنولوگيالىق زاۋىت قىزىلوردا قالاسىنداعى «ءوندىرىس» يندۋستريالىق ايماعىندا ورنالاسادى. وسى ماقسات ءۇشىن جەر تەلىمى بەلگىلەندى. كاسىپورىن ونىمدەرى ىشكى نارىققا جانە ورتالىق ازيا ەلدەرىنە ەكسپورتقا شىعارۋعا باعىتتالعان. جوبا قۇنى 70 ميلليون ەۋرو، 300 جاڭا جۇمىس ورنى اشىلادى. وندىرىسكە قاجەتتى نەگىزگى بەس كومپونەنتتىڭ ۇشەۋى قىزىلوردا وبلىسىنىڭ وزىنەن قامتاماسىز ەتىلەدى. 

Roca Group ديرەكتورلار كەڭەسىنىڭ توراعاسى سانتياگو دە گومار روكا كومپانيا قازاقستاندى وڭىردەگى بيزنەستى دامىتۋدىڭ ستراتەگيالىق الاڭى رەتىندە قاراستىراتىنىن اتاپ ءوتتى. بۇگىندە Roca Group سالاداعى الەمدىك كوشباسشىلاردىڭ ءبىرى سانالادى. كومپانيانىڭ 78 زاۋىتى، 20 مىڭنان استام قىزمەتكەرى بار.

"قازاقستان – ورتالىق ازياداعى جۇمىس اۋقىمىن كەڭەيتۋ ءۇشىن قيسىندى تاڭداۋ. ءبىز ەلدى بۇكىل ايماق ءۇشىن ءتيىمدى جۇمىس ىستەي الاتىن ونەركاسىپتىك جانە لوگيستيكالىق حاب رەتىندە قاراستىرامىز. مۇندا ءوندىرىستى دامىتۋعا قولايلى جاعداي جاسالعان جانە قىزىلوردا وبلىسىنداعى جوبا جەرگىلىكتى ەكونوميكانىڭ دامۋىنا ۇلەس قوسىپ، حالىقارالىق ستراتەگيامىزدىڭ ماڭىزدى بولىگىنە اينالاتىنىنا سەنىمدىمىز", - دەدى سانتياگو دە گومار روكا.

كەزدەسۋدە قر ونەركاسىپ جانە قۇرىلىس مينيسترلىگى، قىزىلوردا وبلىسىنىڭ اكىمدىگى جانە Roca Group ينۆەستيتسيالىق جوبانى جۇزەگە اسىرۋ قاعيداتتارى تۋرالى نەگىزدەمەلىك كەلىسىمگە قول قويدى. بۇل قۇجات – تاراپتاردىڭ سانيتارلىق-تەحنيكالىق بۇيىمدار وندىرەتىن زاۋىت جوباسىن بىرلەسىپ جۇزەگە اسىرۋعا نيەتتى ەكەنىنىڭ رەسمي دالەلى. 

Roca Group كومپانياسىمەن ىنتىماقتاستىق بىلتىرعى جەلتوقسان ايىندا قىزىلوردا وبلىسىنىڭ اكىمى نۇرلىبەك نالىباەۆتىڭ يسپانياعا جۇمىس ساپارى بارىسىندا باستالعان بولاتىن. سودان بەرى ينۆەستورمەن بىرلەسىپ، بىرقاتار ناتيجەلى جۇمىس جۇرگىزىلدى.

"مەملەكەت باسشىمىزدىڭ ينۆەستيتسيا تارتۋ جونىندەگى تاپسىرماسىن ورىنداۋ اياسىندا ءبىز شەتەلدىك ينۆەستورلارمەن جۇيەلى جۇمىس جۇرگىزىپ كەلەمىز. Roca Group – سانيتارلىق-تەحنيكالىق بۇيىمدار ءوندىرۋ سالاسىنداعى الەمدىك كوشباسشىلاردىڭ ءبىرى. بۇگىن قىزىلوردا وبلىسى ءۇشىن ماڭىزدى قادام جاسالدى، ءبىز كومپانيامەن ءوندىرىستى ىسكە قوسۋ جونىندەگى نەگىزدەمەلىك كەلىسىمگە قول قويدىق. اتالعان زاۋىت ورتالىق ازياداعى ءىرى جوبالاردىڭ ءبىرى بولماق. ول ىشكى نارىقتى وتاندىق قۇرىلىس ماتەريالدارىمەن قامتاماسىز ەتۋگە مۇمكىندىك بەرەدى. ءبىزدىڭ باستى ماقساتىمىز – ينۆەستورعا قولايلى جاعداي جاساپ، جوبانى ساپالى ءارى ۋاقىتىلى ىسكە اسىرۋ",  - دەدى ن.نالىباەۆ.

بۇل باستاما ءوڭىردىڭ ينۆەستيتسيالىق تارتىمدىلىعىن ارتتىرۋمەن قاتار، جاڭا وندىرىستەر قۇرۋ ارقىلى تۇرعىنداردى تۇراقتى جۇمىسپەن قامتۋعا دا مۇمكىندىك بەرەدى.