قىزىلوردا وبلىسى: «قاراكەتكەندە» دارىگەرلىك امبۋلاتوريا پايدالانۋعا بەرىلدى

قىزىلوردا وبلىسىنىڭ اكىمى نۇرلىبەك نالىباەۆتىڭ قاتىسۋىمەن جالاعاش اۋدانىنىڭ«قاراكەتكەن» اۋىلىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىمەن سالىنعان دارىگەرلىك امبۋلاتوريا اشىلدى، - دەپ حابارلايدى اكىمدىكتىڭ ءباسپاسوز قىزمەتى

سالتاناتتى راسىمگە وبلىستاعى قۇقىق قورعاۋ ورگاندارىنىڭ باسشىلارى، مەديتسينا سالاسىنىڭ ارداگەرلەرى، قوعام قايراتكەرلەرى مەن اۋىل تۇرعىندارى قاتىستى.


وبلىس باسشىسى جينالعان قاۋىمدى قۇتتىقتاپ، ءوڭىردىڭ الەۋمەتتىك-ەكونوميكالىق دامۋىنداعى، قۇرىلىس دەنساۋلىق ساقتاۋ سالالارىنداعى جاڭاشىلدىقتارعا توقتالدى.

"مەملەكەت باسشىسىنىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا ءوڭىردىڭ الەۋمەتتىك-ەكونوميكالىق دامۋ قورىتىندىلارىن باياندادىم. پرەزيدەنتىمىز قاسىم-جومارت كەمەلۇلى وبلىستا اتقارىلعان جۇمىستارعا وڭ باعاسىن بەردى. الدىمىزدا ءالى جۇزەگە اسىراتىن جوبالارىمىز كوپ. وسى باعىتتا جۇمىسىمىزدى جالعاستىراتىن بولامىز" - دەپ اتاپ ءوتتى، نۇرلىبەك ماشبەكۇلى

ايماقتىڭ دەنساۋلىق ساقتاۋ سالاسىنىڭ بيۋدجەتى 129 ملرد. 448 ملن. تەڭگەگە جەتتى. «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بارلىق اۋداندا 28 مەديتسينالىق نىسان سالىندى. جالاعاش اۋدانىنىڭ ەسەت باتىر، مىرزاباي احۋن اۋىلدارىنداعى ەكى دارىگەرلىك امبۋلاتوريا 2023 جىلى اشىلىپ، قازىر ەل يگىلىگىنە قىزمەت ەتۋدە. 


بۇگىن ەل يگىلىگىنە تابىستالاتىن جاڭا عيماراتتا باستاپقى مەديتسينالىق كومەك كورسەتۋ ساپاسىن جاقسارتا تۇسۋگە جول اشىلسىن! دارىگەرلەرىمىز ەلگە ادال قىزمەت ەتىپ، حالىق العىسىنا بولەنە بەرسىن! ەگەمەن ەلىمىزدىڭ ەڭسەسى بيىك، تاۋەلسىزدىگىمىز باياندى بولعاي!» – دەدى وبلىس باسشىسى.

جيىندا مەديتسينا سالاسىنىڭ ارداگەرى،قىزىلوردا وبلىسىنىڭ قۇرمەتتى ازاماتى، «قۇرمەت» جانە «پاراسات» وردەندەرىنىڭ يەگەرى تۇرعانباي ماحانوۆ باتاسىن بەردى. اۋداننىڭ الەۋمەتتىك-ەكونوميكالىق دامۋى جولىندا قاجىرلى ەڭبەك ەتكەن ارداگەرلەر مەن اۋرۋحانانى سالعان قۇرىلىسشىلارعا ماراپاتتار تاپسىرىلدى. 

ايتا كەتەيىك، وتكەن جىلى قىزىلوردادا جاڭا «قان ورتالىعى» اشىلىپ، بۇگىندە ەل يگىلىگىنە قىزمەت ەتۋدە. جاڭاقورعان اۋدانى «تومەنارىق» اۋىلىندا، ارال اۋدانى «سەكسەۋىل» كەنتىندە اۋىلدىق اۋرۋحانالار قولدانىسقا بەرىلدى. انا مەن بالا ءومىرىن قورعاۋ ماقساتىندا كوپبەيىندى وبلىستىق اۋرۋحانا بازاسىندا جاڭا مرت اپپاراتى ىسكە قوسىلىپ، 70 ورىندىق پەريناتالدىق ءبولىم اشىلدى.


وبلىس ورتالىعىندا ەمحاناسى مەن ونكولوگيالىق بولىمشەسى بار 300 ورىندىق كوپبەيىندى اۋرۋحانانىڭ قۇرىلىسى جۇرۋدە. بۇدان بولەك، ۇلتتىق جوبا اياسىندا 4 كوپبەيىندى اۋداندىق ورتالىق اۋرۋحانا جانىنان قوسىمشا قۇرىلىس سالىنادى.

وتكەن جىلى 8 مەديتسينالىق نىسانعا كۇردەلى جوندەۋ جۇمىستارى جۇرگىزىلدى. بيىل 6 نىساننىڭ جىلۋ جۇيەسى گازعا اۋىستىرىلادى. مەديتسينالىق قۇرال-جابدىقتارمەن قامتىلۋدەڭگەيى 87,1 پايىزعا جەتتى. سوڭعى 2 جىلدا وبلىستىڭ بارلىق ەلدى مەكەنىندەگى دەنساۋلىق ساقتاۋ مەكەمەلەرىنە 245 جاڭا سانيتارلىق اۆتوكولىك تابىستالسا، ونىڭ 11-ءى جالاعاش اۋدانىنا بەرىلدى. وسىلايشا، اۋىلداردى سانيتارلىق اۆتوكولىكپەن قامتۋ ماسەلەسى تولىق شەشىلدى.


مەملەكەت باسشىسىنىڭ باستاماسىمەن قۇرىلعان «قازاقستان حالقىنا» قورى ءوڭىردىڭ دەنساۋلىق ساقتاۋ سالاسىن دامىتۋعا 4 ملرد. تەڭگەدەن استام قارجى باعىتتادى. بۇل قارجىعا ارال، جاڭاقورعان اۋداندارى مەن قىزىلوردا قالاسىندا «قامقورلىق» وڭالتۋ ورتالىقتارى اشىلدى. سكرينينگ جۇرگىزۋگە ارنالعان جىلجىمالى مەديتسينالىق كەشەن الىنىپ، اۋىل تۇرعىندارىن تەكسەرۋدەن وتكىزۋدە.


اقپارات ءۇشىن ايتا كەتسەك، سوڭعى ۋاقىتتارى قىزىلوردا وبلىسىندا مەملەكەتتىڭ قولداۋىمەن اۋقىمدى الەۋمەتتىك-ەكونوميكالىق نىساندار كوپتەپ سالىنۋدا. بۇل قوسىمشا جۇمىس ورىندارىنىڭ اشىلۋىنا جانە ءتۇرلى سالالاردىڭ قايتا جاڭعىرۋىنا ايتارلىقتاي اسەر ەتەتىنى ءسوزسىز. 

 

ءبولىسۋ
وقي وتىرىڭىز