بۇگىن قىزىلوردا وبلىسىنىڭ اكىمى نۇرلىبەك نالىباەۆ، «قازاۆتوجول» ۇك اق باسقارما توراعاسى دارحان يماناشەۆ، وبلىستىق ءماسليحات دەپۋتاتتارى، زيالى قاۋىم وكىلدەرى، ەل اعالارىنىڭ قاتىسۋىمەن «باتىس ەۋروپا – باتىس قىتاي» حالىقارالىق ءاۆتودالىزىنىڭ قىزىلوردا – اقتوبە باعىتىن ءتورت جولاقتى ەتىپ كەڭەيتۋ جوباسىنىڭ ءبىرىنشى كەزەڭىنىڭ باستالۋ ءراسىمى ءوتتى.

ايماق باسشىسى جينالعان جۇرتشىلىقتى رەسپۋبليكالىق ماڭىزى بار اۆتوموبيل جولى قۇرىلىسىنىڭ باستالۋىمەن قۇتتىقتاپ، جول-كولىك ينفراقۇرىلىمىن دامىتۋدا اتقارىلعان جۇمىستارعا توقتالدى.

«بيىل – ەلىمىز، ءوڭىرىمىز ءۇشىن تاريحي ماڭىزدى جىل. مەملەكەت باسشىمىز قاسىم-جومارت كەمەلۇلى قالامىزدا وتكەن ۇلتتىق قۇرىلتايدىڭ قورىتىندى بەسىنشى وتىرىسىندا «سوڭعى جىلدارى قىزىلوردا وبلىسى زامان تالابىنا ساي ءوسىپ-وركەندەپ جاتىر» دەپ، Cىر وڭىرىندە اتقارىلعان جۇمىستارعا وڭ باعاسىن بەردى. وبلىسىمىزدىڭ الەۋمەتتىك-ەكونوميكالىق دامۋىنا، تۇرعىندارىمىزدىڭ ءال-اۋقاتىن ارتتىرۋعا باعىتتالعان بىرقاتار جاڭا ءىرى جوبانىڭ جۇزەگە اسىرىلاتىنىن، ونىڭ ىشىندە «بەينەۋ – سەكسەۋىل» باعىتىنداعى جول قۇرىلىسى بيىل قولعا الىناتىنىن، «باتىس ەۋروپا – باتىس قىتاي» حالىقارالىق ءاۆتودالىزىنىڭ قىزىلوردا – اقتوبە باعىتىن ءتورت جولاقتى ەتىپ كەڭەيتۋ جوباسى باستالاتىنىن ايتتى.

پرەزيدەنتىمىز «جەر كولەمى جونىنەن الەمدە توعىزىنشى ورىن الاتىن ەلىمىزدىڭ، جالپى، كولىك-ترانزيت سالاسىندا زور مۇمكىندىكتەرى بار. بۇل – ايرىقشا نازار اۋدارۋدى تالاپ ەتەتىن ستراتەگيالىق باعىت»،– دەگەن بولاتىن.

وسى ماقساتتا وڭىرىمىزدە بەلسەندى جۇمىستار اتقارىلۋدا. مەملەكەت باسشىمىزدىڭ، ۇكىمەتتىڭ ەرەكشە قولداۋىمەن

2022-2025 جىلدارى ايماعىمىزداعى 1 600 شاقىرىم اۆتوموبيل جولى مەن كوشەلەردى، 30 كوپىر وتكەلىن سالۋعا، كۇردەلى جوندەۋدەن وتكىزۋگە 150 ملرد. تەڭگەگە جۋىق قارجى ءبولىندى.

ناتيجەسىندە جاقسى جاعدايداعى جولداردىڭ ۇلەسى 95 پايىزعا جەتتى. بيىل دا جول ينفراقۇرىلىمىن دامىتۋعا باعىتتالعان 56 جوباعا بيۋدجەتتەن 37 ملرد. 845 ملن. تەڭگە قارالعان. بۇل قارجىعا 136 شاقىرىم جول مەن كوپىر وتكەلدەرى جوندەۋدەن وتەدى.

بۇگىن وزدەرىڭىزبەن بىرگە ايماعىمىز ءۇشىن ماڭىزى زور جوبالاردىڭ ءبىرى قىزىلوردا – اقتوبە باعىتىنداعى جولدى ءتورت جولاقتىعا كەڭەيتۋدىڭ ءبىرىنشى كەزەڭىن باستايمىز.

قۇرىلىسى باستالعالى تۇرعان اۆتوجول ءوڭىردىڭ وركەندەۋىنە، حالىق يگىلىگىنە قىزمەت ەتەتىن ماڭىزدى كولىك دالىزىنە اينالسىن! جۇرگىزۋشىلەر مەن جولاۋشىلارعا ءاردايىم اق جول، ءسات ساپار تىلەيمىز»، – دەدى نۇرلىبەك ماشبەكۇلى.

راسىمدە دارحان سەرىكۇلى، قىزىلوردا وبلىسىنىڭ قۇرمەتتى ازاماتى، قازاقستاننىڭ ەڭبەك ەرى ابزال جۇماشۇلى ىزگى تىلەگىن جەتكىزدى.

ايتا كەتەيىك، مەملەكەت باسشىسى 2023 جىلعى 10 قازاندا سىر وڭىرىنە جۇمىس ساپارىمەن كەلگەندە قىزىلوردا قالاسىنان اقتوبەگە دەيىنگى اۆتوموبيل جولىن ءتورت جولاقتىعا اۋىستىرۋدىڭ جوبالاۋ جۇمىستارىن جەدەل باستاۋدى تاپسىرعان بولاتىن.

وسى جۇمىستى قىسقا مەرزىمدە اياقتاۋ ءۇشىن دەمەۋشىلەر ەسەبىنەن 350 ملن. تەڭگەگە تەحنيكا-ەكونوميكالىق نەگىزدەمە ازىرلەندى، 487 شاقىرىم جولعا مەملەكەتتىك ساراپتامانىڭ وڭ قورىتىندىسى الىندى.

جالپى جوبا 2 كەزەڭنەن تۇرادى. ءبىرىنشى كەزەڭى – 26 شاقىرىمدىق قىزىلوردا قالاسىنىڭ اينالما جولىن سالۋ. ەكىنشى كەزەڭى – قىزىلوردا قالاسىنان باستالىپ سىرداريا، جالاعاش، قارماقشى اۋداندارىنىڭ سىرتىمەن اينالىپ ءوتىپ، «باتىس ەۋروپا – باتىس قىتاي» حالىقارالىق كولىك دالىزىنە قوسىلاتىن 462 شاقىرىم جول.

ءاۆتودالىز بويىنا جاڭادان 11 كوپىر، 13 جول وتكەلى، 62 ءۇي جانۋارلارىنا ارنالعان وتكەل مەن 399 سۋ وتكىزگىش قۇبىر سالىنادى. جولاۋشىلار مەن جۇرگىزۋشىلەرگە ارنالعان زاماناۋي سەرۆيستىك قىزمەت كورسەتەتىن پۋنكتتەر بوي كوتەرىپ، شاعىن جانە ورتا بيزنەستىڭ دامۋىنا مۇمكىندىك تۋادى. 

اۆتوجولدىڭ ءىى ساناتتان ءى ساناتقا اۋىسۋى كولىك قاتىناسىن ەداۋىر جەڭىلدەتىپ، جۇك تاسىمالىنىڭ تيىمدىلىگىن ارتتىرادى.

@قىزىلوردا وبلىسى اكىمىنىڭ ءباسپاسوز قىزمەتى