وعان پارلامەنت سەناتى مەن ءماجىلىسىنىڭ دەپۋتاتتارى ناۋرىزباي بايقاداموۆ، رۋسلان رۇستەموۆ، مۇرات ەرگەشباەۆ، وبلىستىق قۇقىق قورعاۋ ورگاندارىنىڭ ءبىرىنشى باسشىلارى، زيالى قاۋىم وكىلدەرى، سالا ارداگەرلەرى قاتىستى.
ايماق باسشىسى نۇرلىبەك نالىباەۆ جينالعان قاۋىمدى كاسىبي مەرەكەمەن قۇتتىقتاپ، قۇرىلىس سالاسىندا اتقارىلعان جۇمىستاردى اتاپ ءوتتى.
«پرەزيدەنتىمىز «ءبىز جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتايمىز! ادال ءارى تاباندى ەڭبەگىمەن تابىسقا جەتكەن ادامدار قاشاندا قۇرمەتتى، سىيلى بولۋى كەرەك»، - دەگەن بولاتىن. بۇل - ەكونوميكالىق تۇراقتىلىق پەن الەۋمەتتىك پروگرەستىڭ باستى فاكتورى رەتىندە جۇمىسشى كاسىپتەرىنىڭ ءرولىن كۇشەيتۋدەگى ستراتەگيالىق قادام.
"جۇمىسشى ماماندىقتارى جىلىنا" وراي جاقىندا عانا مەملەكەت باسشىمىزدىڭ جارلىعىمەن ءوڭىرىمىزدىڭ بىرقاتار مەتاللۋرگتەرى، تەمىرجولشىلارى مەن قۇرىلىسشىلارى مەملەكەتتىك ناگرادالارعا يە بولدى. بۇل ەڭبەك ادامدارىنا كورسەتىلگەن زور قۇرمەت پەن لايىقتى جوعارى باعا.
«الاشتىڭ اناسى» اتانعان قاسيەتتى سىر ءوڭىرى پرەزيدەنتىمىزدىڭ، ۇكىمەتتىڭ ەرەكشە قولداۋىمەن قارقىندى دامۋدا. وبلىسىمىزدىڭ بيۋدجەتى 823 ملرد. تەڭگەدەن اسىپ، 2022 جىلدان بەرى 226 پايىزعا ءوستى. بۇل قاراجات ايماعىمىزداعى ەڭ وزەكتى دەگەن ماسەلەلەردى شەشۋگە، تۇرعىنداردىڭ ءومىر ءسۇرۋ ساپاسىن جاقسارتۋعا، اۋقىمدى ينفراقۇرىلىمدىق جوبالاردى ىسكە اسىرۋعا باعىتتالۋدا.
بيىل 96 جوبانىڭ قۇرىلىسىنا بيۋدجەتتەن 166 ملرد. 800 ملن. تەڭگە قارجى ءبولىنىپ، 2022 جىلمەن سالىستىرعاندا 8 ەسەگە ارتتى. ناتيجەسىندە قۇرىلىس جۇمىستارىنىڭ كورسەتكىشى بويىنشا رەسپۋبليكادا ۇزدىكتەر قاتارىندا كەلەمىز.
قۇرىلىس سالاسىندا قىزمەت ەتۋ – بۇل جاي عانا ماماندىق ەمەس، ەلگە قىزمەت ەتۋ. قۇرىلىسى قارىمدى ەلدىڭ ەكونوميكاسى دا قۋاتتى.
تۋعان جەرىمىز، سىر ءوڭىرىنىڭ الەۋمەتتىك-ەكونوميكالىق جاعدايىنىڭ جاقسارۋىنا، ساۋلەتتىك كەلبەتىنىڭ جاڭارۋىنا، زاماناۋي عيماراتتاردىڭ بوي كوتەرۋىنە قوسقان ەلەۋلى ەڭبەكتەرىڭىز ءۇشىن سىزدەرگە بارشا سىر جۇرتشىلىعىنىڭ، جەكە ءوزىمنىڭ اتىمنان شىنايى العىسىمدى بىلدىرەمىن.»، -دەدى ن.نالىباەۆ.
مەرەكەلىك شارادا قۇرىلىس سالاسىنىڭ ۇزدىكتەرى «دوستىق»، «قۇرمەت»، «ەرەن ەڭبەگى ءۇشىن»، «ەڭبەك داڭقى» وردەن-مەدالدارىمەن ماراپاتتالدى.
سونىمەن قاتار قر ونەركاسىپ جانە قۇرىلىس ءمينيسترىنىڭ «قۇرمەتتى قۇرىلىسشى» توسبەلگىسىنە، «قۇرمەت گراموتاسىنا» جانە قىزىلوردا وبلىسىنىڭ «قۇرمەت گراموتاسىنا» يە بولدى.
مەرەكەلىك ءىس-شارادا ءانشى قايرات باەكەنوۆ، ءانشى-كومپوزيتور جاراسحان تولەۋباي ءان شىرقادى.
@قىزىلوردا وبلىسى اكىمىنىڭ ءباسپاسوز قىزمەتى
