ءماجىلىس دەپۋتاتتارى مەن ۇكىمەتتىڭ بىرلەسكەن جۇمىسىنىڭ ناتيجەسىندە، ونىڭ ىشىندە ققس رەفورماسىنا قاتىستى بىرقاتار شەشىمدەرگە قول جەتكىزىلدى.

- باستاپقىدا ۇكىمەت ۇسىنعان 20% ققس مولشەرلەمەسى 16%-عا دەيىن تومەندەتىلدى. ققس بويىنشا مىندەتتى تىركەۋ شەگى 15 ملن 40 ملن تەڭگەگە دەيىن ۇلعايتىلدى. ءدارى-دارمەكتەر مەن مەديتسينالىق قىزمەتتەرگە تومەندەتىلگەن ققس مولشەرلەمەلەرى ەنگىزىلەدى: 2026 جىلدان باستاپ – 5%، 2027 جىلدان باستاپ – 10%. ءمامس، تمككك، سيرەك جانە الەۋمەتتىك ماڭىزى بار اۋرۋلاردى ەمدەۋ اياسىنداعى تاۋارلار مەن قىزمەتتەر ققس-تان بوساتىلادى. الەۋمەتتىك ماڭىزى بار ازىق-تۇلىك تاۋارلارى مەن وتاندىق باسىلىمداعى كىتاپتار، سونداي-اق باسپا تۇرىندەگى كىتاپتاردى باسىپ شىعارۋ قىزمەتتەرى دە ققس-تان بوساتىلادى. اۋىل شارۋاشىلىعى تاۋار وندىرۋشىلەرىن قولداۋ ماقساتىندا ەسەپكە جاتقىزىلاتىن ققس ۇلەسى 70%-دان 80%-عا دەيىن ۇلعايتىلدى، - دەدى بەرىك بەيسەنعاليەۆ.

بۇدان بولەك، جەڭىلدەتىلگەن دەكلاراتسيانى تۇرلەندىرۋ شەڭبەرىندە رۇقسات ەتىلگەن قىزمەت تۇرلەرىنىڭ ورنىنا تىيىم سالىنعان قىزمەت تۇرلەرىنىڭ تىزبەسى ەنگىزىلەدى، ايماقتىق ەرەكشەلىكتەردى ەسكەرە وتىرىپ، ماسليحاتتارمەن ±50%-عا تۇزەتۋ مۇمكىندىگى بار 4% بىرىڭعاي مولشەرلەمە بەلگىلەندى. ويىن بيزنەسى مەن بانكتەر ءۇشىن كتس مولشەرلەمەسى 25%-عا دەيىن ارتتىرىلدى، الەۋمەتتىك سالا ۇيىمدارى ءۇشىن كتس مولشەرلەمەسى تومەندەتىلدى، پروگرەسسيۆتى جتس شكالاسى ەنگىزىلەدى. الكوگول مەن تەمەكىگە سالىناتىن اكتسيزدەر كەزەڭ-كەزەڭىمەن ۇلعايتىلادى، ەنەرگەتيكالىق سۋسىندارعا اكتسيز ەنگىزىلەدى. اۋىل شارۋاشىلىعى ماقساتىنداعى جەرلەردى ءتيىمسىز پايدالانعان جاعدايدا تولەم مولشەرلەمەسى 100 ەسەگە دەيىن ارتتىرىلادى.

جالپى، ماجىلىسمەننىڭ ايتۋىنشا، رەفورما سالىق جۇيەسىن وڭتايلاندىرۋعا باعىتتالعان بىرقاتار نەگىزگى وزگەرىستەردى قامتيدى: سالىق ەسەپتىلىگىن 30%-عا قىسقارتۋ، سالىق تۇرلەرىن 20%-عا ازايتۋ، سالىق جەڭىلدىكتەرىن وڭتايلاندىرۋ، ديففەرەنتسيالدى مولشەرلەمەلەر ەنگىزۋ، ينۆەستيتسيالىق بەلسەندىلىكتى ىنتالاندىرۋ، ءسان-سالتانات زاتتارىنا سالماقتى ارتتىرۋ جانە باسقا دا وزەكتى ماسەلەلەردى شەشۋ.

سالىق كودەكسىن قاراۋ قورىتىندىسى بويىنشا ءماجىلىس توراعاسى ەرلان قوشانوۆ قۇجاتتىڭ كەڭىنەن ءارى اشىق تالقىلانعانىن، بىرنەشە رەت پارلامەنتتىك فراكتسيالاردا، قوعامدىق پالاتا وتىرىستارىندا قارالعانىن اتاپ ءوتتى. ناتيجەسىندە، زامان تالابىنا ساي كەلەتىن، تەڭگەرىمدى سالىق زاڭناماسىن قابىلداۋعا مۇمكىندىك تۋدى.

ۇلتتىق ەكونوميكا مينيسترلىگى