Mäjılıs deputattary men Ükımettıŋ bırlesken jūmysynyŋ nätijesınde, onyŋ ışınde QQS reformasyna qatysty bırqatar şeşımderge qol jetkızıldı.
- Bastapqyda Ükımet ūsynǧan 20% QQS mölşerlemesı 16%-ǧa deiın tömendetıldı. QQS boiynşa mındettı tırkeu şegı 15 mln 40 mln teŋgege deiın ūlǧaityldy. Därı-därmekter men medisinalyq qyzmetterge tömendetılgen QQS mölşerlemelerı engızıledı: 2026 jyldan bastap – 5%, 2027 jyldan bastap – 10%. MÄMS, TMKKK, sirek jäne äleumettık maŋyzy bar aurulardy emdeu aiasyndaǧy tauarlar men qyzmetter QQS-tan bosatylady. Äleumettık maŋyzy bar azyq-tülık tauarlary men otandyq basylymdaǧy kıtaptar, sondai-aq baspa türındegı kıtaptardy basyp şyǧaru qyzmetterı de QQS-tan bosatylady. Auyl şaruaşylyǧy tauar öndıruşılerın qoldau maqsatynda esepke jatqyzylatyn QQS ülesı 70%-dan 80%-ǧa deiın ūlǧaityldy, - dedı Berık Beisenǧaliev.
Būdan bölek, jeŋıldetılgen deklarasiiany türlendıru şeŋberınde rūqsat etılgen qyzmet türlerınıŋ ornyna tyiym salynǧan qyzmet türlerınıŋ tızbesı engızıledı, aimaqtyq erekşelıkterdı eskere otyryp, mäslihattarmen ±50%-ǧa tüzetu mümkındıgı bar 4% bıryŋǧai mölşerleme belgılendı. Oiyn biznesı men bankter üşın KTS mölşerlemesı 25%-ǧa deiın arttyryldy, äleumettık sala ūiymdary üşın KTS mölşerlemesı tömendetıldı, progressivtı JTS şkalasy engızıledı. Alkogol men temekıge salynatyn aksizder kezeŋ-kezeŋımen ūlǧaitylady, energetikalyq susyndarǧa aksiz engızıledı. Auyl şaruaşylyǧy maqsatyndaǧy jerlerdı tiımsız paidalanǧan jaǧdaida tölem mölşerlemesı 100 esege deiın arttyrylady.
Jalpy, mäjılısmennıŋ aituynşa, reforma salyq jüiesın oŋtailandyruǧa baǧyttalǧan bırqatar negızgı özgerısterdı qamtidy: salyq eseptılıgın 30%-ǧa qysqartu, salyq türlerın 20%-ǧa azaitu, salyq jeŋıldıkterın oŋtailandyru, differensialdy mölşerlemeler engızu, investisiialyq belsendılıktı yntalandyru, sän-saltanat zattaryna salmaqty arttyru jäne basqa da özektı mäselelerdı şeşu.
Salyq kodeksın qarau qorytyndysy boiynşa Mäjılıs Töraǧasy Erlan Qoşanov qūjattyŋ keŋınen ärı aşyq talqylanǧanyn, bırneşe ret parlamenttık fraksiialarda, Qoǧamdyq palata otyrystarynda qaralǧanyn atap öttı. Nätijesınde, zaman talabyna sai keletın, teŋgerımdı salyq zaŋnamasyn qabyldauǧa mümkındık tudy.
Ūlttyq ekonomika ministrlıgı
