ءال-فارابي اتىنداعى قازاق ۇلتتىق ۋنيۆەرسيتەتىندە ءداستۇرلى «Digital Farabi – 2025» حالىقارالىق فورۋمى ءوتتى. بيىلعى فورۋم «قازاقستان ەكونوميكاسىنىڭ دامۋىنداعى جاساندى ينتەللەكت جانە جوعارى ءونىمدى تەحنولوگيالار» تاقىرىبىنا ارنالدى.

اۋقىمدى ءىس-شارادا قر عىلىم جانە جوعارى ءبىلىم ءمينيسترى ساياسات نۇربەك، قازۇۋ-دىڭ باسقارما توراعاسى – رەكتور جانسەيىت تۇيمەباەۆ، NVIDIA كورپوراتسياسىنىڭ كورپوراتيۆتىك بيزنەستى دامىتۋ جونىندەگى اعا مەنەدجەرى انتون دجوراەۆ، ASUS كومپانياسىنىڭ ترەنينگ مەنەدجەرى المات ءابىلحان، ءىت سالاسىنداعى بىلىكتى ماماندار، ءىرى كومپانيالاردىڭ جانە حولدينگتەردىڭ وكىلدەرى، ينۆەستورلار، جاس زەرتتەۋشىلەر، وقىتۋشىلار مەن عالىمدار باس قوستى.

باستى مىندەت – جاساندى ينتەللەكت سالاسىنداعى عىلىمي زەرتتەۋلەردى وندىرىسكە ەنگىزۋ جانە يننوۆاتسيالىق جوبالاردى كوممەرتسيالاندىرۋ بويىنشا يدەيالار مەن وزىق تاجىريبە الماسۋ.

ءوز سوزىندە قر عىلىم جانە جوعارى ءبىلىم ءمينيسترى ساياسات نۇربەك:

"بۇگىندە الەمدىك ارەنادا جاساندى ينتەللەكت سالاسى قارقىندى دامىپ كەلە جاتىر. وسى رەتتە مەملەكەت باسشىسى قاسىم-جومارت توقاەۆ اتالعان سالانى دامىتۋ بويىنشا الدىمىزعا ۇلكەن مىندەت قويىپ، تاپسىرما جۇكتەدى. ءبىز بۇل الەمدە بولىپ جاتقان وزگەرىستەردەن جانە جاڭاشىلدىقتان قالىپ قويماۋىمىز قاجەت. عىلىمعا، بىلىمگە جانە تەحنولوگيادا پايدالانىپ، ونىڭ دۇرىس جانە قاجەتتى قاسيەتتەرىن الۋىمىز مىندەت", – دەپ اتاپ ءوتتى.

قازۇۋ رەكتورى جانسەيىت تۇيمەباەۆ جاساندى ينتەللەكت سالاسى بويىنشا ۋنيۆەرسيتەتتە اتقارىلىپ جاتقان جۇمىستارعا توقتالدى.

"قازاقستان تسيفرلىق ترانسفورماتسيا قارساڭىندا تۇر. قازۇۋ جەتەكشى عىلىمي-ءبىلىم بەرۋ ورتالىعى رەتىندە بۇل پروتسەسكە بەلسەندى قاتىسىپ كەلەدى. ءبىز بىلىكتى جانە كاسىبي مامانداردى دايارلاپ قانا قويماي، يننوۆاتسيالىق جوبالاردى دامىتۋدامىز. جاساندى ينتەللەكت – تەك تەحنولوگيا ەمەس، بۇل جاڭا مۇمكىندىكتەردىڭ كىلتى. ءبىزدىڭ مىندەتىمىز – تەك وسى تەحنولوگيالاردى ەنگىزۋ عانا ەمەس، سونىمەن قاتار ولاردىڭ تۇراقتى دامۋى ءۇشىن جاعداي جاساۋ. قازۇۋ قازاق ءتىلىن عىلىم تىلىنە اينالدىرۋ ماسەلەسىنە باسىمدىق بەرەدى. وسى تۇرعىدا وقۋ ورداسىنىڭ عالىمدارى قازاق تىلىندەگى جاساندى ينتەللەكتىنى جەتىلدىرۋگە بەلسەندى قاتىسۋدا. ءبىز اقپاراتتىق جۇيەلەردەگى مەملەكەتتىك ءتىلدىڭ ۇلەسىن ارتتىرۋعا ءتيىسپىز", – دەدى رەكتور.

سونداي-اق حالىقارالىق فورۋم بارىسىندا انتون دجوراەۆ، المات ءابىلحان، حايدار بۇلقايىر، رامازان ارانعازى، اسەت ورداباەۆ ءسوز سويلەپ، جاساندى ينتەللەكت سەكتورىن دامىتۋ بويىنشا ءوز ۇسىنىس-پىكىرلەرىن ورتاعا سالدى.

فورۋم اياسىندا الماتىداعى ۋنيۆەرسيتەت ستۋدەنتتەرىنىڭ جانە مەكتەپ وقۋشىلارىنىڭ ستارتاپ جوبالارىنا ارنالعان كورمە ۇيىمداستىرىلدى. مۇندا جاساندى ينتەللەكت ارقىلى ىسكە اسىرىلعان عىلىمي ازىرلەمەلەر قويىلعان.

سونداي-اق ءبىلىم الۋشى جاستار اراسىندا «FIFA PS» جارىسى ءوتتى. شارا سوڭىندا ۇزدىك ستارتاپتاردىڭ اۆتورلارى مەن «FIFA PS» جەڭىمپازدارىنا ديپلوم جانە باعالى سىيلىقتار تابىستالدى.