قازاقستان قىتايلىق ساياحاتشىلار ءۇشىن ەڭ تارتىمدى باعىتتاردىڭ بىرىنە اينالىپ كەلەدى. Kazakh Tourism ۇلتتىق كومپانياسى قحر نارىعىندا ەلىمىزدىڭ تۋريستىك الەۋەتىن ىلگەرىلەتۋ بويىنشا جۇيەلى جۇمىسىن جالعاستىرۋدا. گۋانچجوۋ قالاسىندا قازاقستاندىق تۋروپەراتورلار قىتايدىڭ تۋريزم يندۋسترياسىنىڭ 50-دەن استام وكىلىمەن B2B-كەزدەسۋلەر وتكىزدى.

كەلىسسوزدەر بارىسىندا مادەني دەمالىس، گاسترونوميالىق جانە تابيعي تۋريزم، شوپينگ، سونداي-اق ىسكەرلىك ساپارلار مەن MICE-شارالارىنا ارنالعان تۋريستىك ونىمدەر مەن مارشرۋتتار تانىستىرىلدى. بۇل ەكىجاقتى كەزدەسۋ قازاقستانعا دەگەن تۇراقتى قىزىعۋشىلىقتى ارتتىرىپ، ەكى ەلدىڭ تۋريستىك نارىعى ويىنشىلارى اراسىندا ۇزاق مەرزىمدى سەرىكتەستىكتىڭ بەرىك ىرگەتاسىن قالايدى.

قازاقستاندىق دەلەگاتسيا قىتايداعى Guangzhou International Travel Fair دەگەن ەڭ ءىرى تۋريستىك كورمەلەردىڭ بىرىنە قاتىسۋدا. ەكسپوزيتسيا الماتى قالاسى تۋريزم باسقارماسىنىڭ قولداۋىمەن ۇيىمداستىرىلدى. كەلۋشىلەرگە كلاسسيكالىق مارشرۋتتارمەن قاتار، جاڭا تۋريستىك ونىمدەر دە ۇسىنىلدى.

قازاقستان قىتايدان كەلەتىن تۋريستەر ءۇشىن تارتىمدى باعىتقا اينالۋدا. 2024 جىلى قحر قازاقستانداعى قوناق ۇيلەر مەن وزگە دە ورنالاستىرۋ ورىندارىندا توقتاعان شەتەلدىك تۋريستەر سانى بويىنشا ەكىنشى ورىنعا شىقتى. قازاقستاندىق قوناق ۇيلەردە 173 987 قحر ازاماتى ورنالاسقان، بۇل وتكەن جىلمەن سالىستىرعاندا 66%-عا كوپ. ال جالپى كەلۋشىلەر سانى 650 مىڭنان استى.

قحر-دان كەلەتىن تۋريستەر اعىنىنىڭ وسۋىنە ۆيزاسىز رەجيمنىڭ ەنگىزىلۋى، جاڭا تىكەلەي رەيستەردىڭ اشىلۋى مەن اۋە قاتىناسىنىڭ جيىلەۋى، ىشكى ءتۋريزمدى قىتاي نارىعىندا بەلسەندى ىلگەرىلەتۋ سەپتىگىن تيگىزدى.

وتكەن جىلى قىتايدا قازاقستاننىڭ تۋريستىك الەۋەتىن تانىتۋعا باعىتتالعان 30-دان استام ءىس-شارا وتكىزىلدى: ىسكەرلىك كەزدەسۋلەردەن باستاپ كورمەلەرگە، مادەني تانىستىرىلىمدار مەن اقپاراتتىق تۋرلارعا دەيىن. بيىل مۇنداي 16 ءىس-شارا وتكىزۋ جوسپارلانىپ وتىر.

Kazakh Tourism