Qazaqstan qytailyq saiahatşylar üşın eŋ tartymdy baǧyttardyŋ bırıne ainalyp keledı. Kazakh Tourism ūlttyq kompaniiasy QHR naryǧynda elımızdıŋ turistık äleuetın ılgerıletu boiynşa jüielı jūmysyn jalǧastyruda. Guanchjou qalasynda qazaqstandyq turoperatorlar Qytaidyŋ turizm industriiasynyŋ 50-den astam ökılımen B2B-kezdesuler ötkızdı.

Kelıssözder barysynda mädeni demalys, gastronomiialyq jäne tabiǧi turizm, şoping, sondai-aq ıskerlık saparlar men MICE-şaralaryna arnalǧan turistık önımder men marşruttar tanystyryldy. Būl ekıjaqty kezdesu Qazaqstanǧa degen tūraqty qyzyǧuşylyqty arttyryp, ekı eldıŋ turistık naryǧy oiynşylary arasynda ūzaq merzımdı serıktestıktıŋ berık ırgetasyn qalaidy.

Qazaqstandyq delegasiia Qytaidaǧy Guangzhou International Travel Fair degen eŋ ırı turistık körmelerdıŋ bırıne qatysuda. Ekspozisiia Almaty qalasy Turizm basqarmasynyŋ qoldauymen ūiymdastyryldy. Keluşılerge klassikalyq marşruttarmen qatar, jaŋa turistık önımder de ūsynyldy.

Qazaqstan Qytaidan keletın turister üşın tartymdy baǧytqa ainaluda. 2024 jyly QHR Qazaqstandaǧy qonaq üiler men özge de ornalastyru oryndarynda toqtaǧan şeteldık turister sany boiynşa ekınşı orynǧa şyqty. Qazaqstandyq qonaq üilerde 173 987 QHR azamaty ornalasqan, būl ötken jylmen salystyrǧanda 66%-ǧa köp. Al jalpy keluşıler sany 650 myŋnan asty.

QHR-dan keletın turister aǧynynyŋ ösuıne vizasyz rejimnıŋ engızıluı, jaŋa tıkelei reisterdıŋ aşyluy men äue qatynasynyŋ jiıleuı, ışkı turizmdı Qytai naryǧynda belsendı ılgerıletu septıgın tigızdı.

Ötken jyly Qytaida Qazaqstannyŋ turistık äleuetın tanytuǧa baǧyttalǧan 30-dan astam ıs-şara ötkızıldı: ıskerlık kezdesulerden bastap körmelerge, mädeni tanystyrylymdar men aqparattyq turlarǧa deiın. Biyl mūndai 16 ıs-şara ötkızu josparlanyp otyr.

Kazakh Tourism