بۇگىندە انەليا Anelya Alim New York كوسمەتيكا برەندىن (اقش ءوندىرىسى) قالىپتاستىرىپ، نيۋ-يوركتەگى ماكياج مەكتەبىنىڭ نەگىزىن قالاعان. كوسمەتيكا برەندى ارقىلى ول بۇكىلالەمدىك تhe makeup shou كورمەسىندە بوببي براۋن، دانەسسا ميريك، ماكياج اكادەمياسىمەن ءبىر كورمەدە ماكياج جاساۋدىڭ قىر-سىرىن كورسەتكەن. New York Fashion Week ءسان شوۋىن، وسى سياقتى 16 شوۋ ۇيىمداستىرعان. الەمگە ايگىلى امەريكالىق ءانشى بەيونسەنىڭ پروديۋسەرىمەن بىرگە جۇمىس ىستەگەن.

ايتا كەتسەك، EB-1 ۆيزاسى نەمەسە ەينشتەين ۆيزاسى – شەتەلدىك دارىندى دارىگەرلەرگە، عالىمدارعا، سپورتشىلارعا، مادەنيەت قايراتكەرلەرىنە جانە تابىستى كاسىپكەرلەرگە ارنالعان ۆيزا.

بيزنەس-لەديمەن بولعان سۇحباتتى نازارىڭىزعا ۇسىنامىز.

– انەليا حانىم، ءبىر جىل بۇرىنعى سۇحباتتارىڭىزدىڭ بىرىندە امەريكادا 3 ءتۇرلى بيزنەسىڭىز بار ەكەنىن ايتىپسىز. شىعارماشىلىق پەن كوممەرتسيانى قالاي ۇشتاستىراسىز؟ بىرنەشە بيزنەستى قاتار دوڭگەلەتۋگە ۇلگەرۋ قيىن ەمەس پە؟

– ءيا، بۇعان دەيىن قازاقستاندا مەيرامحانا بيزنەسى، سۇلۋلىق سالونى، كيىم-كەشەك بيزنەسىمەن اينالىسقانمىن. اقش-قا العاش كەلگەندە دە بىرنەشە بيزنەستى قولعا الدىم. ءدال قازىر نازارىم نەگىزىنەن نيۋ-يوركتەگى ماكياج مەكتەبىمىز بەن MLM جەلىلىك ماركەتينگىنە اۋىپ وتىر.

«ەگەر سەن جۇمىسىڭدى جاقسى كورسەڭ، كۇن سايىن جۇمىس ىستەۋگە دايىن بولاسىڭ» دەپ كونفۋتسي ايتقانداي، مەن ءوز جۇمىسىمدى قاتتى جاقسى كورەمىن. ادامدارعا سۇلۋلىق سىيلاعىم كەلەدى. مەنىڭ كومانداما، MLM جەلىلىك ماركەتينگىنە جۇمىسقا كەلگەن ءار ادامنىڭ دەنى ساۋ، باقىتتى، تابىستى بولعانىن قالايمىن. بۇل – مەنىڭ كومپانيامنىڭ ماقساتى.

– برەند كوسمەتيكالىق ءونىمىڭىز تۋرالى ايتىپ وتسەڭىز. اقش-تىڭ قاي قالالارىندا، باسقا قاي ەلدەردە ساتىلىمدا بار؟ قازاقستان نارىعىنا قاشان شىعارماق جوسپارىڭىز بار؟

– ونىمدەرىمىز – دەكوراتيۆتىك كوسمەتيكا. ءار كوسمەتيكا قۇرامىندا A, N, C دارۋمەندەرى بار. زياندى قوسپالارى جوق. ويتكەنى امەريكادا زاڭ قاتال. جالپى، دامىعان ەلدەر كوسمەتيكا نارىعىن قاتاڭ باقىلايدى. ولاردىڭ ارقايسىسىنىڭ ءوندىرىسى مەن ساتىلىمىندا وزىنە ءتان ەرەجەسى بولادى. سوندىقتان اتى جوق كوسمەتيكانى ساتىپ الۋعا بولمايدى. ويتكەنى ونىڭ نەدەن جاسالعانى بەلگىسىز. مۇمكىن ول دەنساۋلىققا قاۋىپ توندىرەتىن زياندى قوسپالاردان جاسالعان شىعار، كىم بىلەدى؟! قالاي ساتۋدى، كوسمەتيكاداعى ينگرەديەنتتەردى ءار ەل ءارتۇرلى تەكسەرەدى. مىسالى، مۇنى اقش-تا ازىق-تۇلىك پەن مەديكامەنتتەردىڭ ساپاسىن سانيتارلىق بويىنشا باقىلاۋ باسقارماسى (FDA), ەۋروپادا ەۋرووداق پەن وعان مۇشە ءار ەل، جاپونيادا دەنساۋلىق ساقتاۋ، ەڭبەك جانە ءال-اۋقات مينيسترلىگى، رەسەيدە روسپوترەبنادزور باقىلايدى. البەتتە، كوسمەتيكانىڭ ءبارى زيانسىز دەۋگە بولمايدى. دەگەنمەن دەكوراتيۆتىك كوسمەتيكا، اسىرەسە، قاتاڭ باقىلايتىن اقش پەن جاپونيادا زيانسىز بولىپ سانالادى.

ونىمدەرىمىز اقش-تىڭ بارلىق شتاتىندا ساتىلادى. اسىرەسە، نيۋ-يورك پەن لوس-اندجەلەس، فلوريدا، ورلاندو جانە مايامي، تەحاس تۇرعىندارى كوپ تۇتىنادى.

كوسمەتيكالارىمىز قازاقستان نارىعىندا دا ساتىلىپ جاتىر. ونلاين تاپسىرىس تۇسكەن سوڭ تاۋاردى نيۋ-يوركتەن جونەلتەمىز. جەكە سايتىم ارقىلى تاپسىرىس تۇسسە، ونىمدەرىمىزدى الەمنىڭ كەز كەلگەن جەرىنە جەتكىزە الامىز.

بۇل رەتتە ايتا كەتەتىنى، MLM كومپانياسىن اشىپ جاتىرمىز. قازىرگى تاڭدا وسى كومپانيا بويىنشا زاڭدىق تۇرعىداعى جان-جاقتى جۇمىستارى جۇرگىزىلىپ جاتىر. الدا وسى MLM ANELYA ALIM NEW YORK COSMETICS جەلىلىك ماركەتينگى ارقىلى كوسمەتيكالارىمىزدى بۇكىل الەمگە ساتىلىمعا شىعارماق جوسپارىمىز بار. ءساتىن سالسا، ءبىرىنشى ەۋروپا، ودان كەيىن تمد جانە ازيا، ياعني قىتاي، كورەيا اۋماعىندا ونىمدەرىمىزدىڭ قولدانۋ اياسىن كەڭەيتپەكپىز. بۇعان الەۋەتىمىز جەتەدى. ويتكەنى امەريكادا ۇلكەن نارىققا شىعۋعا مۇمكىندىك زور. جالپى، مەن نيۋ-يوركتەگى ءسان اپتالىعىنا قاتىسىپ تۇرامىن. ءبىزدىڭ كوسمەتيكامىز New York Fashion Week, HAMPTONS Fashion Week, Brooklyn Fashion Week سياقتى ءسان اپتالىقتارىنا دەمەۋشى بولادى. Anelya Alim New York ماكياج مەكتەبىن نيۋ-يوركتە تۇراقتى تۇردە شاقىرىپ تۇرادى. ەندى لونداننان دا، پاريج، ميلان، جاپوندىق ءسان سالاسىنان دا شاقىرتۋلار ءتۇسىپ جاتىر.

– ⁠ماكياج ادامعا قالاي اسەر ەتەدى؟ قانداي كۇش بەرەدى؟

– مەن بۇل تاقىرىپتا عىلىمي ماقالا جازعانمىن. وندا ماكياجدىڭ ادام پسيحولوگياسىنا قالاي اسەر ەتەتىنى تۋرالى تاريحي مالىمەتتەرگە ءۇڭىلدىم. بويانعان سوڭ ايناعا قاراعان ايەلدىڭ وزىنە دەگەن سەنىمدىلىگى ارتادى. ياعني ماكياجدان كەيىن نەيروندىق بايلانىس ارقىلى ميعا سيگنال بەرىلەدى. ايەل ادامنىڭ وزىنە دەگەن سۇيىسپەنشىلىگى ارتادى.

مىسالى، امەريكالىق جازۋشى، 50 كىتاپتىڭ اۆتورى لۋيزا حەي «21 كۇندە ءوزىڭدى جاقسى كور» دەگەن كىتابىندا اينامەن جۇمىس تۋرالى ايتادى. ەگەر ايەل ءار كۇن سايىن بويانىپ، ايناعا قاراسا، ءوز-ءوزىن جاقسى كورە باستايدى. ءوزىن جاقسى كورگەن كەزدە ايەل دەنى ساۋ، باقىتتى بولادى. ال ايەل باقىتتى بولسا، بارلىق وتباسى مۇشەلەرى، بالالارى دا، ءتىپتى بۇكىل حالىق باقىتتى بولادى دەگەن ءسوز. سوندىقتان كەز كەلگەن مەملەكەتتە ءبىرىنشى كەزەكتە ايەل ادامدى باقىتتى قىلۋعا ءمان بەرىلۋى كەرەك. ءوزىن باقىتتى سەزىنگەن ايەل شابىتتانىپ، جاسامپازدىق جۇمىستاردى جاسايدى، الەمنىڭ جاقسارا تۇسۋىنە ىقپال ەتەدى دەپ ويلايمىن. مەنىڭ ميسسيام – ايەلدەرگە وزدەرىن جاقسى كورە تۇسۋىنە كوسمەتيكا، ماكياج ارقىلى اسەر ەتۋ.

– قانداي برەندتەرمەن نەمەسە تانىمال تۇلعالارمەن سەرىكتەس رەتىندە جۇمىس جۇرگىزەسىز؟ بەيونسەنىڭ پروديۋسەرىمەن سەرىكتەس بولعانىڭىز راس پا؟ ونىمەن بايلانىسىڭىز قالاي ءوربىدى؟

– مەن اقش-قا كەلگەن سوڭ New York Fashion Week ءسان اپتالىعىن ۇيىمداستىرا باستادىم. ەكى جىل ىشىندە 17 شوۋ ۇيىمداستىردىم. سونداي كەزدە ونەر جۇلدىزدارىمەن كەزدەسىپ، ولارمەن تانىسىپ، بايلانىس ورناتۋعا مۇمكىندىك تۋدى. كوپتەگەن تانىمال جۇلدىزدارمەن تانىستىم. سونىڭ ىشىندە بەيونسەنىڭ سوپروديۋسەرى توني ەۆوردستان سالتاناتتى شاراعا شاقىرتۋ الىپ، ونىڭ كومانداسىنداعى قىزدارعا ماكياج جاسادىق. سول كەزدە توني ەۆوردسقا ۇلكەن ماراپات تابىستالدى.

ونىمەن بايلانىسىم كەزدەيسوق بولدى. كەزەكتى تاپسىرىس بويىنشا جۇمىس ىستەۋگە كەلگەنىمىزدە ءبىر ايەل ادامنىڭ ءتۇرى تانىس كورىندى. ونىڭ ينستاگرام اككاۋنتىنا كىرىپ كورگەن سوڭ تانىمال تۇلعا ەكەنىن بايقادىم. جالپى، امەريكادا الەمگە ايگىلى تانىمال ادامداردى سىرتىنان كوپ كەزدەستىرىپ قالۋعا بولادى. سوندىقتان كەيدە ولاردىڭ تانىمال ادام ەكەنىن اڭعارماي دا قالۋىمىز مۇمكىن.

– «الەمدەگى ەڭ تابىستى توپ-30 ايەل» قاتارىنا قوسىلىپسىز. قۇتتى بولسىن! وندا قانداي كريتەريلەر نەگىزىندە ءوتتىڭىز؟

– راقمەت. وندا نەگىزىنەن بيزنەستەگى كريتەريلەرگە قارادى. مەندە ول كەزدە قازاقستاندا 3 ءسان سالونىم بولدى. فرانشيزا بويىنشا جۇمىس جۇرگىزدىم. سونىمەن قاتار ءوزىمنىڭ برەندتى كوسمەتيكامنىڭ، اقش-تاعى ماكياج مەكتەبىمنىڭ جۇمىس ىستەپ تۇرعانىن، بىرنەشە بيزنەسىمنىڭ بارىن ەسكەرگەن بولۋى كەرەك، ماعان وزدەرى بايلانىسقا شىقتى. سونداي-اق مەن تۋرالى قازاقستاندىق جانە امەريكاندىق بۇقارالىق اقپارات قۇرالدارى وزدەرىنىڭ رەسۋرستارىنا تالاي مارتە جاريالاعان بولاتىن. مەنىڭ سۋرەتىم جۋرنالدىڭ باستى بەتىنە باسىلعان. وسى كريتەريلەر بويىنشا مەنى «الەمدەگى ەڭ تابىستى توپ-30 ايەل» قاتارىنا قوسۋعا لايىق كورگەن سياقتى.

– ءسىزدىڭ دوللارلى ميلليونەر ەكەنىڭىز ايتىلادى. ەگەر قۇپيا بولماسا، بايلىعىڭىز قانشا دوللارعا باعالانادى؟ فوربستا نەشىنشى ورىنداسىز؟

– دوللارلى ميلليونەر دەڭگەيىنە العاش رەت 28 جاسىمدا جەتتىم. قازىرگى تاڭدا تابىسىم ءوزىمنىڭ بيزنەستەرىمە ينۆەستيتسيا رەتىندە سالىنىپ جاتىر. بيزنەستەرىم اقش-تا دا، قازاقستاندا دا ءجۇرىپ جاتىر. دەگەنمەن قازىرگى تاڭدا نەگىزگى كۇشتى اقش-تاعى بيزنەسكە جۇمساپ جاتىرمىن. ازىرگە فوربس تىزىمىندە جوقپىن. دەگەنمەن جاقىن ارادا ونداعى تىزىمدە دە ەسىمىم پايدا بولادى دەپ ۇمىتتەنەمىن.

– كومانداڭىزدا قازىر نەشە ادام جۇمىس ىستەيدى؟

– قازىرگى ۋاقىتتا مەنىڭ كوماندامدا ۆيزاجيست، ستيليست، فوتوگراف، ۆيدەوگراف سياقتى ماماندار مەن مودەلدىك اگەنتتىكتىڭ ماماندارىن قوسقاندا 70-تەن اسا ادام جۇمىس ىستەپ ءجۇر.

– بولاشاقتا قازاقستانعا ورالىپ، وتاندىق كاسىپكەرلەردى وقىتىپ، ەل ەكونوميكاسىن كوتەرۋگە ۇلەس قوسقىڭىز كەلەتىنىن ايتىپسىز. وسى جانە باسقا دا الداعى جوسپارلارىڭىز جايلى ايتىپ وتسەڭىز.

– ارينە، ەلىمىزدىڭ دامۋىنا ءوز ۇلەسىمدى قوسقىم كەلەدى. جالپى، مەنىڭ نەگىزگى ماقساتىم – بايلىققا كەنەلۋ ەمەس. ويتكەنى مەن جوعارىدا ايتىپ وتكەنىمدەي، 28 جاسىمدا دوللارلى ميلليونەر دەڭگەيىنە جەتكەنمىن. قىمبات پاتەردە تۇرىپ، قىمبات كولىكتى تىزگىندەپ، بارشىلىقتى كوردىم. سودان كەيىن دە شىعار باقىتتىڭ اقشادا ەمەس ەكەنىن ءتۇسىندىم. مەن ءۇشىن قازىر باقىت دەگەنىمىز – باسقا ادامداردىڭ باقىتتى بولۋىنا جاردەمدەسۋ. مەنىڭ ءومىر ءسۇرۋ فيلوسوفيام قاراپايىم، ءوزىمدى قاراپايىم ۇستايمىن. كوپتەگەن ادامنىڭ ىشكى جان دۇنيەسىنىڭ تىنىش بولۋىنا، وزىنە دەگەن سەنىمدىلىگىنىڭ ارتۋىنا، باقىتتى كۇن كەشۋىنە اسەر ەتكىم كەلەدى. ءار ادام دەنىنىڭ ساۋ بولعانىن، باقىتتى دا باي بولعانىن قالايدى. بۇكىل الەمدەگى ادامدارعا وسى ءۇش كريتەريدى MLM جەلىلىك ماركەتينگ كومپانيام ارقىلى بەرگىم كەلەدى.

ال قازاقستان تۋرالى ايتار بولساق، مەن ءوز ەلىمدى قاتتى جاقسى كورەمىن. ەلىمە دەگەن العىسىم زور. مەن تاراز قالاسىندا دۇنيەگە كەلگەنمىن. اتا-انام مەنى پاتريوت ەتىپ تاربيەلەدى. بۇگىندە مەن امەريكادا وسىنداي جەتىستىكتەرگە اكەم مەن انامنىڭ ماعان دەگەن سۇيىسپەنشىلىگىنىڭ، سەنىمىنىڭ ارقاسىندا جەتىپ ءجۇرمىن. قازىرگى تاڭدا بالامدى جالعىز ءوزىم تاربيەلەپ كەلەمىن. ول مەنىڭ – بار بايلىعىم، ونى ماقتان تۇتامىن.

جالپى، قازاقستاندىقتار ءوز-وزدەرىنە سەنىمدى بولىپ، ەڭبەك ەتىپ، بيزنەس اشىپ، بايىسا ەكەن دەپ تىلەيمىن. قازاقستاننىڭ ەكونوميكاسىن كوتەرۋ ءۇشىن مىقتى زاڭدار، ماماندار كەرەك. مەملەكەتتى حالىق كوتەرەدى. سول ءۇشىن حالىق ءبىلىمدى بولۋى كەرەك. سوندىقتان بەلگىلى ءبىر دەڭگەيدە مەن دە قولىمنان كەلگەنشە اعارتۋشىلىق باعىتتا ستۋدەنتتەرگە، ەلىمىزگە ەڭبەگىمدى سىڭىرگىم كەلەدى. بۇل رەتتە موتيۆاتسيالىق كىتابىمدى جازىپ جاتىرمىن. الدا دەرەكتى فيلم، كينو ءتۇسىرىپ، بيزنەس فورۋمدار، شەبەرلىك ساباقتار وتكىزگىم كەلەدى. سونىمەن قاتار الداعى ۋاقىتتا ساياسي فورۋمدارعا قاتىسىپ، ەلدە بيزنەسمەندەردى كوپتەپ شىعارۋ، جاڭا جوبالار جاساۋ بويىنشا ءۇن قوسقىم كەلەدى. قازىر مەن امەريكادا بيزنەس تۇرعىسىندا ءبىلىمىمدى جەتىلدىرىپ جاتىرمىن. بايقاۋىمشا، اقش-تا مەملەكەت تاراپىنان بيزنەسكە كوپ قولداۋ كورسەتىلەدى. ۇلكەن كولەمدەگى گرانتتار بولىنەدى. ول گرانتتار، اسىرەسە، ايەلدەرگە، جالعىزباستى انالارعا بەرىلەدى. مەن اقش-تىڭ بيزنەس جۇيەسىن زەرتتەپ جاتىرمىن. سونى ءبىزدىڭ ەلىمىزگە دە ۇسىنعىم كەلەدى. سوندىقتان ۋاقىت تاۋىپ، وتاندىق باسىلىمدارعا پىكىر ءبىلدىرىپ، تەلەارنالارعا سۇحبات بەرىپ تۇرامىن. قاراپايىم وتباسىنان شىعىپ، وسىنداي جەتىستىككە ءوز ەڭبەگىممەن جەتكەن مەنىڭ ءۇنىمدى ەستىپ، وتانداستارىمىزدىڭ دا ءوز-وزىنە دەگەن سەنىمدىلىگى ارتسا ەكەن دەيمىن.

– سۇحباتىڭىزعا كوپ راقمەت! ارمان-مۇراتىڭىزعا جەتۋىڭىزگە تىلەكتەسپىز!

سۇحباتتاسقان نۇرداۋلەت كاكىش