ساراەۆو قالاسىندا (بوسنيا جانە گەرتسەگوۆينا) 22 ەلدىڭ وقۋشىلارى قاتىسقان بالقان حالىقارالىق ماتەماتيكالىق وليمپياداسى (BMO) اياقتالدى. قازاقستاندىق وقۋشىلار ەل قورجىنىنا ءۇش كۇمىس جانە ءۇش قولا مەدال سالىپ، 100% كورسەتكىش كورسەتتى.

قازاقستان قۇراماسى جالپى التى جۇلدە يەلەندى:

 كۇمىس جۇلدە يەگەرلەرى:

• امير ساحيپوۆ — الماتى قالاسىنداعى رفمم-ءنىڭ 11-سىنىپ وقۋشىسى;

• مارعۇلان شارەل — استانا قالاسىنداعى Spectrum مەكتەبىنىڭ 11-سىنىپ وقۋشىسى;

• ەلدار ۇسەنوۆ — الماتى قالاسىنداعى نازارباەۆ زياتكەرلىك مەكتەبىنىڭ 10-سىنىپ وقۋشىسى.

 قولا مەدال يەگەرلەرى:

• دامير نۇرلانوۆ — اقتاۋ قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى;

• ءامىرلان امانجولوۆ — الماتى قالاسىنداعى Haileybury مەكتەبىنىڭ 11-سىنىپ وقۋشىسى;

• بەردىبەك ورىنباسار — اتىراۋ وبلىسىنداعى №1 «ءبىلىم-يننوۆاتسيا» ليتسەيىنىڭ 10-سىنىپ وقۋشىسى.

 «BMO وليمپياداسىنا قاتىسۋ – قازاقستان قۇراماسىنىڭ شىلدە ايىندا اۆستراليانىڭ كۆينسلەند قالاسىندا وتەتىن حالىقارالىق ماتەماتيكالىق وليمپياداعا (IMO) دايىندىعىنداعى ماڭىزدى كەزەڭ. مەملەكەتكە جاس تالانتتاردى قولداعانى ءۇشىن، سونداي-اق ۇستازدارىما جانە بارلىق جاتتىقتىرۋشى كومانداعا كاسىبي دايىندىق ءۇشىن شىن جۇرەكتەن العىس ايتامىن»، – دەدى وليمپيادانىڭ كۇمىس جۇلدەگەرى مارعۇلان شارەل.

ۇلتتىق قۇرامانىڭ جاتتىقتىرۋشىلارى – اسىلبەك يساحوۆ پەن مۇحتار قاباق.

جاس ماتەماتيكتەرىمىزدى قۇتتىقتايمىز!

ەستەرىڭىزگە سالا كەتەيىك، بۇل – قازاقستاندىق وقۋشىلاردىڭ ەكىنشى رەكوردتىق ناتيجەسى. 2024 جىلى دا ولار ۇزدىك ۇشتىكتەن كورىنگەن بولاتىن.